Aba bana bari bato cyane, kuko umwe yari afite imyaka ine undi afite itanu, bigaga mu ishuri ry’incuke rya Christian Academy of Louisville, riherereye mu mujyi wa Louisville, muri Leta ya Kentucky, muri Leta Zunze Ubumwe za Amerika.
Iyi nkuru yamenyekanye cyane nyuma y’uko Lydia Stith Rosebush, nyina wa Jax, ayisangije abamukurikira ku rubuga rwa Facebook muri Werurwe 2017, bikurura abantu benshi ku mbuga nkoranyambaga.
Lydia Stith Rosebush yavuze ko mu mpera z’icyumweru yabwiye umuhungu we Jax ko agomba kwiyogoshesha. Jax yahise agira igitekerezo cyo kuwogosha ukaba mugufi nk’uwa Reddy, inshuti ye magara.
Jax yatekerezaga ko nagaruka ku ishuri ku wa Mbere afite inyogosho imeze nk’iya mugenzi we, mwarimu wabo azagorwa no kumenya uwitwa Jax n’uwitwa Reddy.
Nyina yavuze ko umuhungu we yari yishimiye cyane icyo gitekerezo, kuko yumvaga ko inyogosho nshya izatuma asa n’inshuti ye ku buryo bazashobora kuyobya mwarimu wabo.
Icyo Jax atari azi ni uko uyu mukino w’abana wari kuzavamo inkuru izakora ku mitima y’abantu benshi hirya no hino ku Isi.
Nk’uko tubikesha ikinyamakuru CNN, ubwo Jax na Reddy bageraga ku ishuri bafite inyogosho imwe, mwarimu wabo, uzwi nka Mrs. April, yinjiye mu mukino wabo, yigira nk’aho atabashaga kubatandukanya.
Ibi byashimishije aba bana, ndetse n’abandi biganaga batangira kwinjira muri uwo mukino, bahinduranya imyanya yabo.
Nubwo Jax yari umuzungu Reddy akaba umwirabura, aba bana ntibabonaga iryo tandukaniro nk’inzitizi y’ubucuti bwabo. Kuri bo, icyari ingenzi ni uko bari inshuti, bakunda gukina kandi bakishimira kumarana igihe.
Nyuma yo gushyira hanze amafoto n’inkuru ku rubuga rwa Facebook, Lydia Stith Rosebush yatunguwe n’uburyo byakiriwe n’abantu benshi.
Mu kiganiro yagiranye na WAVE, televiziyo ikorera i Louisville, yavuze ko yashyizeho iyo nkuru kubera ko yabonaga umuhungu we ari umwana usetsa kandi ukunzwe, atatekerezaga ko izagera ku bantu benshi gutyo.
Yavuze ko icyamutangaje cyane ari uko Jax atigeze agaragaza ko ibara ry’uruhu rya Reddy ari ikintu cy’ingenzi mu kumuvuga. Iyo yavugaga inshuti ye, ntiyatangiraga ku kuvuga ko ari umwana w’umwirabura.
Ubutumwa bwe bwaje gusangizwa inshuro zirenga 79,000, butuma ubucuti bw’aba bana bugera ku bantu benshi kandi butangira gufatwa nk’urugero rwiza rwo kubana nta rwikekwe.
Nubwo Jax na Reddy batatekerezaga ko bari gutanga ubutumwa bukomeye ku bijyanye n’ivangura, inkuru yabo yakiriwe n’abantu benshi nk’urugero rw’uburyo abana bashobora kubana neza batitaye kw’ibara ry’uruhu.
Kuri bo, kwiyogoshesha inyogosho imwe byari umukino usanzwe bagombaga gukina bakajijisha umwarimu wabo. Ariko ku bantu benshi babonye inkuru yabo, byabaye umwanya wo gutekerez.a ku buryo urwikekwe rwigishwa, atari ikintu abana bavukana.
Iyi nkuru yibukije benshi ko ubucuti budakenera ko abantu bahuza byose kugira ngo bakundane, ahubwo ko kubahana, kwishimana no kwakira itandukaniro ari byo bishobora kubafasha kubana neza.