Mu mpeshyi y'umwaka ushize ubwo umunyezamu w'Amavubi yari akimara kwerekeza muri Kaizer Chiefs mu ku masezerano y'imyaka ine yahawe umwanya wo gukina gusa nyuma biza guhinduka. Kuri ubu Ntwari Fiacre no kuza ku ntebe y'abasimbura biba bigoye dore ko umutoza,Nasreddine Nabi yahisemo kugira Bruce Bvuma umunyezamu wa mbere.
Nubwo uyu mukinnyi adakina mu ikipe ye ya Kaizer Chiefs ariko mu ikipe y'Igihugu y'u Rwanda, Amavubi, yakomeje kugenderwaho. Adel Amrouche utoza Amavubi aganira n'ikinyamakuru cyo muri Afurika y'Epfo, Far Post yahishuye ko hari ikipe yo muri shampiyona y'icyiciro cya kabiri mu Bufaransa imwifuza ndetse ko yizeye ko umutoza wa Kaizer Chiefs agiye gutangira kumuha umwanya wo gukina.
Yagize ati: "Hari ikipe yo muri shampiyona y'icyiciro cya kabiri mu Bufaransa yabajije ibijyanye nawe. Nizeye ko abatoza ba Chiefs, kandi ndizera ko hagati y'ubu na Kamena, azongera kubona amahirwe yo kongera gukina kuko tumukeneye mu mikino isigaye".
Yavuze ko mu mikino 2 Amavubi aheruka gukina yari ahagaze neza ndetse ko ari umuntu udasanzwe wo gukorana nawe. Yagize ati: "Yari mwiza. Natekerezaga kubura umwanya w'umukino bizamugiraho ingaruka, ariko yari mwiza. Ubona ko bagenzi be bamwizeye, kandi nanjye ndamwizeye. Ndamwizeye cyane kubera ubuhanga bwe. Ni umuntu udasanzwe wo gukorana nawe, ni umukozi ukomeye, kandi abakinnyi baramukunda. Abantu baramukunda mu Rwanda.".
Adel Amrouche byitezwe ko azafasha abakinnyi b'Amavubi kujya babona amakipe akomeye bajya gukinamo ku mugabane w'Iburayi.
Adel Amrouche yahishuye ko Ntwari Fiacre yifuzwa n'ikipe yo mu Bufaransa
Ntwari Fiacre yifuzwa n'ikipe yo mu Bufaransa