Ikinyamakuru Forbes cyatangaje ko umuryango wa Walton, ukomoka ku bashinze sosiyete ya Walmart, ugeze ku mutungo ubarirwa muri miliyari 520 z'amadolari ya Amerika, ukaba urusha inshuro zirenga eshatu umuryango ukurikiyeho mu bukire muri Amerika.
Ku wa Mbere, Forbes yasohoye urutonde rw'imiryango yo muri Amerika ifite nibura miliyari 10 z'amadolari, igaragaza ko ubukire bw'umuryango wa Walton bwiyongereyeho miliyari 253 z'amadolari ugereranyije n'urutonde rwari rwasohotse muri Gashyantare 2024.
Iri zamuka ryatewe ahanini n'uko imigabane ya Walmart yazamutse cyane ku isoko ry'imari. Muri Gashyantare 2026, Walmart yabaye sosiyete ya mbere y'ubucuruzi bukorera mu maduka (brick-and-mortar retailer) igeze ku gaciro ka tiriyari imwe y'amadolari ku isoko ry'imari. Nubwo nyuma agaciro kayo kagabanutseho gato, imigabane yayo iracyariyongereye inshuro zirenga ebyiri mu myaka ibiri n'igice ishize.
Abagize uyu muryango bafite ubukire bukomoka ku migabane bagenzura muri Walmart, bingana na hafi 39% by'imigabane yose y'iyi sosiyete. Iyo migabane ifitwe n'abana batatu ba Sam Walton bakiriho, ari bo Rob Walton, Jim Walton na Alice Walton, hamwe n'imiryango yabo. Harimo kandi Christy Walton, umugore wa nyakwigendera John Walton, n'umuhungu we Lukas Walton.
Forbes ivuga ko agaciro k'iyo migabane konyine kari hafi miliyari 359 z'amadolari kugeza ku wa 22 Kamena 2026, bikaba bingana na hafi kane bya gatanu by'umutungo wose w'uruhande rwa Sam Walton.
Uretse imigabane ya Walmart, umuryango wa Walton unafite amafaranga ava ku nyungu z'isosiyete ndetse n'ishoramari ritandukanye. Mu myaka ya vuba kandi watangiye gushora imari mu makipe y'imikino.
Urugero ni Rob Walton n'umuryango we bafite 94% by'ikipe ya Denver Broncos yo muri NFL, ifite agaciro ka miliyari 6.8 z'amadolari. Na Lukas Walton aherutse kugura imigabane mu ikipe ya Chicago Bulls yo muri NBA muri Kamena uyu mwaka.
Forbes igaragaza ko umuryango wa Walton ukurikirwa n'umuryango wa Koch, ufite sosiyete Koch, Inc., ufite umutungo ubarirwa muri miliyari 157 z'amadolari.
Ku rwego rw'isi, umutungo w'umuryango wa Walton uracyari munsi gusa uw'umuherwe Elon Musk, wabaye umuntu wa mbere ugejeje umutungo ku rwego rwa tiriyari imwe y'amadolari, aho Forbes imubarira umutungo wa miliyari 997 z'amadolari ya Amerika.