Ibi byose byatangiye mu mpera z’icyumweru gishize, ubwo Jimmy Kimmel, umwe mu banyarwenya bakomeye muri Amerika, yakoreshaga amagambo akomeye kuri Melania Trump mu kiganiro cye "Jimmy Kimmel Live!".
Kimmel ntiyaripfanye, kuko yavuze ko Melania Trump ameze nk’umugore
"utegereje kuba umupfakazi" (expectant widow), amagambo yafashwe nko
gushinyagurira uyu muryango habura iminsi mike ngo habe ibirori by’abanyamakuru
(White House Correspondents' Dinner).
Uburakari bwa Melania Trump ku mbuga nkoranyambaga
Ku mugoroba wo kuri uyu wa Mbere tariki ya Mata 27, 2026, Melania
Trump ntiyatuje, kuko yahise yifashisha urubuga rwa X (rwahoze rwitwa Twitter),
maze asuka uburakari bwe mu itangazo rikomeye cyane ryatunguye benshi. Melania
yavuze ko amagambo ya Kimmel atari urwenya, ahubwo ari "urwango rugamije
gucamo ibice igihugu."
Yagize ati: "Kimmel ni umuntu w'ikigwari wihishe inyuma ya
televiziyo ya ABC. Igihe kirageze ngo uyu muyoboro ugaragaze aho uhagaze, ufate
icyemezo gikwiye kuri uyu muntu ukomeje gukwiza amagambo mabi y’urugomo."
Si ubwa mbere Kimmel n'umuryango wa Trump bashyamirana
Jimmy Kimmel azwiho kuba umwe mu banenga cyane Donald Trump
n’umuryango we kuva mu myaka yashize, ariko kuri iyi nshuro bisa n’aho yarenze
umurongo utukura. Ibi bibaye nyuma y'uko mu cyumweru gishize nabwo Kimmel yari
yibasiye Trump mu manza ze, ariko rero kuri iyi nshuro Melania yemeje ko
bidashobora kwihanganirwa.
Kugeza ubu, umuyoboro wa ABC ntacyo uratangaza kuri ubu
busabe bwa Melania Trump bwo kwirukana Kimmel, ariko abakurikirana imyidagaduro
muri Amerika bemeza ko uyu mwuka mubi ushobora kuvumbukamo ibindi bintu
bikomeye mu minsi iri imbere.