Aya mahugurwa yatangijwe ku wa Mbere, tariki ya 19 Ukwakira 2026, ku cyicaro gikuru cya Polisi y’u Rwanda giherereye ku Kacyiru, akaba azamara iminsi itanu.
Yitabiriwe n’abapolisi n’abandi bakozi b’inzego zishinzwe kubahiriza amategeko baturutse mu bihugu 10 bigize Umuryango uhuza abayobozi bakuru ba Polisi bo mu Karere ka Afurika y’Iburasirazuba (EAPCCO). Ibyo bihugu ni u Rwanda, u Burundi, Comoros, Djibouti, Ethiopia, Kenya, Somalia, Sudani y’Epfo, Sudani na Uganda.
Nk’uko byatangajwe na Polisi y’u Rwanda, aya mahugurwa agamije gusuzuma no kunoza imikoreshereze y’igitabo cy’amabwiriza agenga ishyirwa mu bikorwa ry’amategeko hitabwa ku ihame ry’uburinganire (Handbook on Gender-Responsive Law Enforcement), hamwe n’igitabo cyifashishwa n’abahugura abandi (Trainer’s Guide).
Ibi bitabo byateguwe mu mushinga wa Empowering Every Badge, ku bufatanye bw’Ibiro by’Umuryango w’Abibumbye bishinzwe kurwanya ibiyobyabwenge n’ibyaha (UNODC) n’Ishami ry’Umuryango w’Abibumbye ryita ku Bagore (UN Women), ku nkunga ya Guverinoma y’u Budage.
Mu ijambo rye, DIGP Ujeneza yasabye abitabiriye aya mahugurwa kuzasangiza bagenzi babo ubumenyi bazungukira muri yo, ndetse bagaharanira ko ibyo bitabo byinjizwa muri gahunda z’amahugurwa y’inzego za Polisi zo mu bihugu byabo.
Yagaragaje ko guhugura abandi ari uburyo bwo guhindura ubumenyi umuntu ku giti cye afite ubushobozi bugirira akamaro urwego akorera, binyuze mu gufasha abandi kugira ubumenyi n’ubushobozi bwo gutanga serivisi zita ku buringanire no kurengera uburenganzira n’agaciro bya buri muntu.
Yagize ati: “Amahugurwa yo guhugura abandi bisobanuye guhindura ubumenyi mufite ku giti cyanyu ubushobozi bw’inzego mukorera, binyuze mu kubaha ubumenyi, ubushobozi n’uburyo bwo guhugura bagenzi banyu mu bihugu byanyu ku buringanire, gutanga serivisi zita ku buringanire no kurengera uburenganzira n’agaciro bya buri muntu.”
DIGP Ujeneza yongeyeho ko umusaruro w’iyi gahunda uzagaragarira mu kunyurwa kw’abaturage na serivisi bahabwa, ndetse no mu bushobozi bw’abapolisi bwo kumenya, gukumira no gukurikirana ibibazo by’ihohoterwa rishingiye ku gitsina, no gutanga ubufasha bukwiye ku barikorewe.
Ku ruhande rwe, Umuyobozi Mukuru w’Ubunyamabanga bwa EAPCCO akaba n’Umuyobozi w’Ibiro bya Interpol mu Karere ka Afurika y’Iburasirazuba, Apollo S. Africa, yavuze ko aya mahugurwa yari akenewe kugira ngo hasuzumwe ibyo bitabo mbere y’uko bikoreshwa ku rwego rwagutse mu bihugu bigize uyu muryango.
Yasobanuye ko igitabo cy’amabwiriza cyonyine kitari gihagije, kuko byari ngombwa ko gisobanurirwa n’abapolisi batagize uruhare mu kucyandika.
Ibyo ni byo byatumye hategurwa n’igitabo cyifashishwa mu guhugura abandi, kugira ngo abazahugura bagenzi babo bazabashe kugisobanura no kugishyira mu bikorwa neza.
Yasabye abitabiriye amahugurwa gutanga ibitekerezo bishingiye ku bunararibonye bwabo, kugira ngo ibyo bitabo birusheho kunozwa kandi bikoreshwe hakurikijwe imiterere n’ibikenewe muri buri gihugu.
Aya mahugurwa ateganyijwe gufasha abayitabiriye kugira ubumenyi n’ubushobozi bwo guhugura bagenzi babo, hagamijwe guteza imbere imikorere y’inzego zishinzwe kubahiriza amategeko, kunoza serivisi zihabwa abaturage no kurushaho kurengera uburenganzira n’agaciro bya buri muntu, hatitawe ku gitsina cye.
