Umuryango w’Ubumwe bw’u Burayi (EU) wasabye u Burusiya gutanga amakuru yihuse kandi asobanutse kuri urwo rupfu.
Umuvugizi wa Komisiyo y’u Burayi, Eva Hrncirova, yavuze ko amakuru yizewe ku byorezo n’ubushakashatsi kuri mikorobe ari ingenzi kugira ngo hamenyekane uko ibintu bihagaze.
Umuyobozi w’Ishami ry’Umuryango w’Abibumbye ryita ku Buzima (OMS), Tedros Adhanom Ghebreyesus, na we yasabye ibisobanuro ku makuru avuga ko hari undi mukozi wari urwaye umusonga utaramenyekana icyawuteye.
Amerika yatangaje ko yasabye guverinoma y’u Burusiya ibisobanuro, ndetse ko iri kuvugana n’ibindi bihugu kugira ngo ihane amakuru kuri iki kibazo.
Umuvugizi wa Perezida Vladimir Putin, Dmitry Peskov, yavuze ko atari azi ibyerekeye icyifuzo cya Amerika, ariko ashimangira ko u Burusiya bwamenyesheje OMS ibyabaye.
Peskov kandi yavuze ko amakuru menshi yatangajwe n’ibitangazamakuru atari ukuri, asaba ko abaturage bakurikira amakuru atangwa n’ikigo cy’u Burusiya gishinzwe kurwanya no gukumira indwara, Rospotrebnadzor.
Iki kigo cyatangaje ko nta kibazo cy’icyorezo cyagaragaye mu mujyi wa Irkutsk no mu gace k’iwawo. Abantu barenga 90% bari barahuye na Chipilova bari bamaze gukurikiranwa, kandi nta bimenyetso by’indwara zandura byari byagaragaye.
Mongolia, igihugu gihana imbibi n’u Burusiya, yafashe ingamba zo gukaza igenzura ku mipaka mu rwego rwo kwirinda, nubwo abayobozi bavuze ko ibyago byo gukwirakwira kw’indwara ari bike.
Perezida Donald Trump na we yavuze ko ateganya kugirana ibiganiro na Vladimir Putin mu gihe cya vuba, aho iki kibazo gishobora kuba mu byaganirwaho.
Kugeza ubu, impamvu y’urupfu rwa Chipilova n’amakuru ajyanye n’uburwayi bw’abandi bakozi b’icyo kigo biracyakurikiranwa.