Amatangazo
yerekeye intambara z'ubucuruzi, imisoro ku bicuruzwa (tariffs), amakimbirane
mpuzamahanga cyangwa izindi gahunda za leta ashobora gutuma ibiciro
by'imigabane, amadevize n'ibindi bicuruzwa bizamuka cyangwa bikamanuka mu
masegonda make.
Ni
muri urwo rwego, sosiyete ya Trump Media & Technology Group (TMTG)
yatangije serivisi nshya yise Truth API, igamije kugurisha uburyo
bwihuse cyane bwo kubona ibyandikwa bishyirwa kuri Truth Social, urubuga rwa
Trump.
Truth
API ni iki?
Truth
API ni uburyo butuma ibigo bikora ubucuruzi bwihuse ku masoko y'imari n'abashoramari
bakomeye babona ibyandikwa bishya kuri Truth Social mu gihe gito cyane,
bapimisha mu ibice by'isegonda (milliseconds).
Ibi
bivuze ko abakiriya bishyura iyi serivisi bashobora kubona ubutumwa mbere y'uko
bugera ku bandi bakoresha urubuga bisanzwe, bikabaha amahirwe yo guhita bagura
cyangwa bagurisha imigabane mbere y'uko isoko ryose ribimenya.
Nubwo
TMTG itigeze ivuga yeruye ko ubutumwa bwa Donald Trump buri muri iyo serivisi,
benshi bavuga ko ari bwo bufite agaciro gakomeye kuko ari we ukurikirwa
n'abarenga miliyoni 13 kuri Truth Social.
Nk'uko
byatangajwe na Financial Times, abakiriya bashobora kwishyura kugeza ku $100,000
buri kwezi kugira ngo babone iyo serivisi, nubwo TMTG itaremeza ayo mafaranga
ku mugaragaro.
Kuki
iri gutera impaka?
Kwamamaza
iyi serivisi kwahise kuzamura impaka zishingiye ku mategeko no ku myitwarire.
Hari
abibaza niba bidashobora gutuma habaho insider trading, icyaha cyo gukoresha
amakuru y'ibanga mu bucuruzi bw'imigabane mbere y'uko ajya ahagaragara.
Nubwo
ubutumwa bwa Trump bushyirwa ku rubuga bwa nyuma bukajya ahagaragara ku bantu
bose, abanenga iyi gahunda bavuga ko guha bamwe amahirwe yo kububona mbere
y'abandi bishobora kubaha inyungu idakwiye ku isoko ry'imari.
Abahanga
bavuga iki?
Richard
Painter, wahoze ari umujyanama mukuru ushinzwe imyitwarire (Ethics Lawyer) wa
Perezida George W. Bush, yavuze ko ikibazo gishobora kuvuka igihe ubutumwa bwa
Trump bwerekeye ibyemezo bya leta nk'imisoro ku bicuruzwa, intambara cyangwa
izindi politiki za Amerika.
Yasobanuye
ko iyo umuntu aha abandi amakuru azi ko bazayakoresha mu bucuruzi bw'imari,
ashobora kubibazwa n'amategeko kimwe n'abayakoresheje.
Painter
yavuze ko iyo aza kuba ari Komiseri wa Securities and Exchange Commission (SEC)
yari gusaba ko iyi gahunda ihagarikwa cyangwa hakemezwa ko ubutumwa burebana
n'akazi ka leta butazigera bushyirwa muri Truth API.
Abademokarate
basabye iperereza
Abasenateri
bo mu Ishyaka ry'Abademokarate, Elizabeth Warren na Adam Schiff, bandikiye SEC
bayisaba gukora iperereza kuri Truth API kugira ngo harebwe niba itica
amategeko agenga isoko ry'imari.
SEC
yemeje ko yakiriye iyo baruwa ariko ntiyatangaje niba hari iperereza
izatangiza.
Ku
ruhande rwa TMTG, yavuze ko aba basenateri bari kugoreka ukuri, ishimangira ko
Truth API ishingiye ku makuru azajya aba yashyizwe ku mugaragaro, bityo ko
bidashobora gufatwa nka insider trading.
Ikibazo
cy'inyungu bwite
Ikindi
cyateje impaka ni uko Donald Trump agifite inyungu nini muri Trump Media.
Trump
afite hafi 41% by'imigabane y'iyi sosiyete, binyuze mu kigega kiyoborwa
n'abana be.
Abanenga
iyi gahunda bavuga ko bishobora gutuma Perezida yungukira ku butumwa atanga
nk'umukuru w'igihugu, ibintu bavuga ko bishobora guteza ikibazo cy'inyungu
bwite no gukoresha umwanya wa Perezida mu nyungu z'ubucuruzi bwe.
Warren
na Schiff bavuze ko iyo gahunda ishobora gukungahaza Wall Street n'abafite
amafaranga menshi, mu gihe ishobora gusiga inyuma abashoramari basanzwe.
Hari
abayishyigikiye
Nubwo
hari abanenga Truth API, hari n'abavuga ko atari ikintu gishya.
Joe
Saluzzi, umwe mu bashinze Themis Trading, yavuze ko ibigo byinshi bitanga
amakuru y'imari, ibitangazamakuru n'amasoko y'imigabane na byo bisanzwe
bigurisha amakuru yihuse nk'aya.
Icyakora,
yavuze ko ikibazo gikomeye atari amategeko gusa, ahubwo ari imyitwarire, cyane
cyane bitewe n'uko Trump ari Perezida wa Amerika kandi akaba anafite inyungu
muri sosiyete igurisha iyo serivisi.
Ni
bande bamaze kuyigura?
Kugeza
ubu, TMTG ntiyigeze itangaza umubare w'abamaze kwiyandikisha cyangwa amazina
y'ibigo byaguze Truth API.
Ibigo
bikomeye bikora ubucuruzi bwihuse ku masoko y'imari nka Goldman Sachs, JPMorgan,
Citadel Securities na Jane Street byabajijwe niba bizayikoresha, ariko byinshi
byanze kugira icyo bitangaza cyangwa ntibyagira icyo bisubiza.
Joe
Saluzzi yavuze ko atatunguwe n'iyo myitwarire, asobanura ko ibigo byinshi
bitifuza kuvuga ku mugaragaro niba bikoresha serivisi nk'iyi kubera uburemere
bw'impaka ziri kuyivugwaho.
Mu
gihe Truth API itangiye gukora, impaka ziracyakomeje ku kibazo cyo kumenya niba
ari uburyo busanzwe bw'ubucuruzi bw'amakuru cyangwa niba bushobora guteza
ikibazo ku bunyangamugayo bw'isoko ry'imari no ku nyungu bwite z'umukuru
w'igihugu.