Tessy witegura kurushinga n’umuraperi Shizzo yakorewe ibirori bya “Bridal Shower’ – AMAFOTO

Ubukwe bw’aba bombi buteganyijwe kuba ku tariki ya 10 Mutarama 2026, bukabera mu Intare Conference Arena.

Ibirori bya “Bridal Shower” bya Tessy byabaye ku wa 14 Kamena 2025, bibera kuri Meze Park i Kinyinya mu Mujyi wa Kigali. Ni ibirori byari byitabiriwe n’inshuti n’abo mu muryango we, barimo umuhanzikazi w’indirimbo zo kuramya no guhimbaza Imana Uwitonze Clementine wamamaye nka Tonzi, umunyamakuru wa Capital FM, Blandy Star, akaba n’inshuti ya hafi ya Tessy, ndetse n’abandi batandukanye.

Muri ibi birori, Tessy yahawe impano zitandukanye ndetse n’impanuro zizamugirira akamaro mu rugendo rushya rw’ubuzima bw’urugo agiye gutangira hamwe n’umukunzi we, umuraperi Shizzo, wamamaye mu ndirimbo zinyuranye.

Tessy yari ari kumwe kandi na ‘Marraine’ we, Erika, wamubaye hafi muri ibi birori byihariye. Ubutumire bw’ubukwe bw’aba bombi bugaragaza ko ibirori byose bijyanye n’ubukwe bwabo bizabera mu Intare Conference Arena, birimo gusaba no gukwa, gusezerana imbere y’Imana, ndetse no kwakira abatumiwe.

Ni urugendo rushya Tessy na Shizzo biteguye gutangira, mu byishimo no mu cyizere cy’ejo hazaza heza.

Mu bindi bihugu, cyane cyane mu Burayi, Amerika, Asia no mu bihugu bimwe bya Afurika byateye imbere mu myidagaduro, ibirori bya “Bridal Shower” bigira umwihariko wabyo.

Bridal Shower igamije cyane gutegurira umugeni ubuzima bw’urugo. Impano zitangwa akenshi zirimo: Ibikoresho byo mu gikoni (amasafuriya, amasahani, blender n’ibindi). Ibikoresho byo mu cyumba cy’abashakanye (amashuka y’ibitanda, imyenda y’igitanda, décor). Impano z’amasuku n’ibikoresho by’isukum cyangwa se ikarita z’amafaranga cyangwa ‘gift cards’.

Mu mico myinshi, Bridal Shower yitabirwa n’abagore gusa, cyane cyane: Inshuti za hafi z’umugeni, abavandimwe b’igitsina gore n’abakobwa bazaherekeza umugeni (bridesmaids).

Umugeni aba ari igicumbi cy’ibirori, kuko:  Yambara imyambaro idasanzwe (akenshi yera cyangwa ifite ijambo “Bride”), ahabwa amagambo y’impanuro n’urukundo, kandi afotorwa cyane, hakoreshwa “décor” igaragaza ko ari we witegurwa.

Abagore bakuru cyangwa abashakanye bafite uburambe batanga: Inama z’urukundo, uburyo bwo kubaka urugo rukomeye, no guhangana n’ibibazo by’ingo mu bwumvikane.

Mu byishimo n’urukundo, Tessy yasezeye ku bukumi mbere yo kwinjira mu rugendo rushya rw’urugo na Shizzo

Ab’inshuti n’abo mu muryango bahuriye i Kinyinya, bashyigikira Tessy mu birori bya “Bridal Shower”

Umuhanzikazi w'indirimbo zo kuramya no guhimbaza Imana akaba n'umwanditsi w'ibitabo, Tonzi yashyigikiye 'Tessy'

Umunyamakuru wa Capital FM, Blandy Star akaba n'inshuti y'akadasohoka ya 'Tessy' yamushyigikiye ku munsi udasanzwe mu buzima bwe

Ibyishimo by’umugeni witegura kurushinga: Tessy yakiriwe mu birori byuzuye urukundo n’impanuro

Kamarebe Nailla, usanzwe ari gafotozi wa Isango Star Radio/Tv [Uri ibumoso] ari kumwe na 'Tessy' witegura ubukwe tariki 10 Mutarama 2025

Ntambara Jacky, umugore wa Clapton Kibonge ni umwe mu bitabiriye ibirori bya "Bridal Shower" bya 'Tessy' witegura kurushinga

Erika, Marraine wa Tessy, yamubaye hafi muri ibi birori byamwerekaga urukundo n’inkunga

Mbere ya 10 Mutarama 2026, Tessy yahawe impano n’impanuro zizamugirira akamaro mu buzima bw’urugo

‘Bridal Shower’ ya Tessy yabaye umwanya wo gusangira ibyishimo no kwitegura urugendo rushya rw’ubuzima

Mu mwambaro w’umugeni n’akanyamuneza ku maso, Tessy yishimiye intambwe nshya igiye gutangira

KANDA HANO UREBE INDIRIMBO SHIZZO AFROPAPI YAKORANYE N'UMURAPERI BUSHALI