Ni imidali ishimangira ubwitange, n'umuhate wabaranze mu gihe cy’amezi 11 bamaze mu nshingano zo kurindira umutekano abaturage b'abasivili muri icyo gihugu.
Umuhango wo gushyikiriza imidali iri tsinda ry'abapolisi b'u Rwanda rikorera mu murwa mukuru Juba, wayobowe na Bwana Mussa Gasama, uyobora ishami rya Polisi y'umuryango w'Abibumbye (UNPOL) muri icyo gihugu.
Bwana Mussa Gasama yabashimiye umuhate na disipuline byabaranze mu kazi ko kurengera abaturage b'abasivili no gufasha Polisi ya Sudani y'Epfo.
Yagize ati: "Iyi midali mwambitswe, ni iy'ishimwe ku bwitange bwaranze buri wese muri mwe, ibikorwa byanyu muri rusange bigatanga umusaruro mu kurengera abaturage b'abasivili no gushimangira amahoro n'umutekano muri iki gihugu".
Yabagaragarije ko na nyuma yo gusoza inshingano mu butumwa, imidali bahawe izakomeza kubabera ikimenyetso kibatera imbaraga zo gukomeza gukora neza kurushaho n'ahandi bazaba bakorera.
Assistant Commissioner of Police (ACP) Corneille Murigo uyobora itsinda ry'abapolisi b'u Rwanda bari muri Sudani y’Epfo yishimiye kwakira abashyitsi baje mu muhango wo kwambika imidali y’ishimwe abapolisi abereye umuyobozi. yashimiye abapolisi bahawe imidali, ibikorwa by'indashyikirwa byabaranze mu butumwa bw'amahoro muri Sudani y'Epfo.
Abambitswe imidari ni itsinda (RWAFPU3-7) rigizwe n'umubare munini w'abapolisikazi, riyoborwa na Senior Superintendent of Police (SSP) Donatha Nyinawumuntu.
ACP Murigo yakomeje ashimira UNMISS, ku buryo ibaba hafi bigatuma babasha kuzuza neza inshingano zabo.
Yavuze ko bakomeje gushyira imbaraga nyinshi mu gucunga umutekano w'abaturage b'abasivili, babikomatanya n'ibikorwa byo guteza imbere imibereho myiza yabo no kurwanya icyo ari cyo cyose gishobora kubangamira uburenganzira bw'ikiremwamuntu, ashimira abapolisi ayoboye uko babyitwayemo hatitawe ku mbogamizi bagiye bahura na zo.
Aba bapolisi b’u Rwanda 185 bamaze amezi 11 bageze muri uyu mujyi wa Juba, bagize rimwe mu matsinda abiri y'abapolisi b'u Rwanda bari mu butumwa bwo kubungabunga amahoro muri Sudani y’Epfo, n’abandi badakorera mu matsinda (IPOs) bose hamwe bagera ku 185, harimo abapolisikazi 95 n’abagabo 90.
ACP Murigo yasoje ashimira ubuyobozi bw’umuryango w’abibumbye, izindi nzego z’umutekano bahuriye mu butumwa bw’umuryango w’abibumbye muri Sudani y’Epfo ndetse n'abaturage ku bufatanye babagaragariza, biri mu bibafasha gusohoza neza ishingano zabo zo kubungabunga amahoro muri iki gihugu.
