Ibi yabitangaje mu gihe abahanzi bagenzi be, barimo Sheebah Karungi, Ava Peace, na Jowy Landa, bakomeje guterana amagambo ku mbuga nkoranyambaga bapfa indirimbo ‘Nobody’ na ‘No One’, buri umwe avuga ko ari iye byemewe.
Spice Diana ati: “Iki kibazo si gishya, ariko gukora kinyamwuga ni wo muti”
Spice Diana yavuze ko amakimbirane nk’aya atari mashya mu muziki, ndetse na we yigeze guhura n’ingaruka z’icyo kibazo. Nubwo atigeze abishyira hanze, yavuze ko yakuyemo isomo rikomeye: gukorera mu mucyo no kubika ibimenyetso byerekana uko yishyuye n’uwo bagiranye amasezerano.
Yagize ati: “Ibi ni ibintu bimaze igihe. Buri wese arashaka kubaho, ariko si byiza. Njye mpitamo gukorana n’abantu bake b’abanyamwuga bazi agaciro k’indirimbo. Abantu nka King Saha na Nince Henry ntibakwiba, kuko bazi umwanya n’imbaraga bijyana no gukora umuziki.”
Yavuze ko hari abanditsi bashya badafite uburambe bagira umuco wo kwakira amafaranga make bagahita bagurisha indirimbo indi nshuro ku wundi muhanzi. Yongeyeho ko ibyo bikorwa bishingira ku kutamenya agaciro k’ubuhanzi.
“Gushyamirana ntacyo bitanga, ahubwo dukwiye gukora kinyamwuga”
Uyu muhanzikazi wubashywe muri Source Management yanenze imyitwarire y’abahanzi bakunze kugirana amakimbirane ku mbuga nkoranyambaga, avuga ko bitarinda ubuhanzi bwabo kwangirika.
Yagize ati: “Intonganya n’ishyari ntibikemura ikibazo. Ahubwo dukwiye gukunda akazi kacu, tugakorana n’abanditsi twizeye, tukandika amasezerano tugashyiraho umukono, tukabika inyemezabwishyu, kugira ngo ejo hatazavuka impaka z’uwanditse n’ufite uburenganzira ku ndirimbo.”
Icyifuzo cye: Ubumenyi n’ubunyamwuga nibyo bizubaka umuziki
Spice Diana yasabye abahanzi n’abanditsi bose kwigira hamwe uburyo bwo gukora umuziki mu bwubahane no mu mucyo, aho buri ruhande ruzajya rugaragaza neza uruhare rwarwo binyuze mu masezerano yanditse.
Yasoje agira ati: “Ubuhanzi ni umurimo ukomeye kandi utwara amafaranga menshi n’ingufu nyinshi. Dukeneye kubwubaha, tukabukorera kinyamwuga, tukirinda kunyuranya n’indangagaciro zabwo."
Spice Diana yagiriye inama abahanzi yabafasha kwirinda ibibazo byo kwibwa indirimbo