Sobanukirwa amateka ya BigShoe na Socrates Award yahawe Bukayo Saka muri Ballon d’Or 2026

Muri ibyo birori, yanasomeye abari aho ubutumwa bw’umwana wo mu Rwanda witwa Byiringiro, wavuwe amaso abifashijwemo n’umuryango wa BigShoe.

Saka yashimiwe uruhare agira mu guteza imbere imibereho myiza y’abaturage, by’umwihariko gufasha abana badafite ubushobozi bwo kubona ubuvuzi bakeneye. Ubutumwa bwa Byiringiro bwagaragaje impinduka z’ubufasha yahawe ko byafashije ubuzima bwe, kuva ku ngorane zo kwiga no gukina na bagenzi be kugeza ku kongera kugira icyizere cy’ejo hazaza.

Byiringiro yagarutse ku buzima yabagamo mbere yo kuvurwa

Mu butumwa yasomeye abari aho, Saka yasangije abari mu birori amagambo ya Byiringiro, umwana w’imyaka 14 utuye mu Rwanda, wavuze ko yatangiye kugira ikibazo cyo kutabona neza afite imyaka 12.

Byiringiro yavuze ko kuba yaratuye mu cyaro kidafite amashanyarazi, kandi afite ikibazo cy’amaso, byatumaga ubuzima bwe burushaho kumugora.

Yagize ati: “Amazina yanjye ni Byiringiro, mfite imyaka 14, ntuye mu cyaro cyo mu Rwanda. Ubwo nari mfite imyaka 12 natangiye guhuma amaso. Mu cyaro cy’iwacu nta mashanyarazi yahabaga, kandi n’aho twari dutuye byari bikomeye.”

Yakomeje avuga ko ikibazo cy’amaso cyamugiragaho ingaruka ku myigire no mu buzima busanzwe, ku buryo byamugoraga gusoma ibyo mwarimu yandikaga ku kibaho ndetse no gukina na bagenzi be.

Ati: “Ndi ku ishuri ntabwo nabashaga gusoma ku kibaho ibyo mwarimu yandikaga, nkanagorwa no gukina na bagenzi banjye, kandi nashakaga gukina nk’undi mwana wese.”

Ibyo Byiringiro yavuze bigaragaza uburyo ikibazo cy’ubuzima gishobora kugira ingaruka ku myigire y’umwana, imibanire ye n’abandi ndetse n’uko yiyumva mu buzima bwa buri munsi.

BigShoe yamufashije kongera kubona icyizere

Byiringiro yashimiye umuryango wa BigShoe wamufashije kubona ubuvuzi bw’amaso yari akeneye, avuga ko nyuma yo kuvurwa yashoboye kongera gusoma ku kibaho no gukomeza ubuzima bwe nk’abandi bana.

Yagize ati: “Ndashimira BigShoe yampaye ubuvuzi bw’amaso nari nkeneye. Uyu munsi nasoma ku kibaho n’iyo naba ndi hanze y’ishuri. Igikomeye ni uko ntagihangayitse numva ko ndi ngenyine, ubu mbayeho nk’undi mwana wese.”

Yavuze ko ubufasha yahawe butamufashije gusa kongera kubona neza, ahubwo bwamugaruriye icyizere n’icyerekezo cy’ejo hazaza.

Byiringiro yatangaje ko afite inzozi zo kuzaba umwarimu w’Icyongereza, agaragaza ko yemera ko na we ashobora kugera ku nzozi ze.

Ati: “Nagize icyizere cy’ejo hazaza, numva nzagera ku nzozi zange. Umunsi umwe nzaba umwarimu w’Icyongereza. Ntekereza ko mwe muri hano mwageze ku nzozi zanyu mwari mufite mu buto, ubu nange nzagera ku zange. Imana ibahe umugisha n’ibyiringiro.”

Socrates Awards ni igihembo bwoko ki?

Igihembo cya Socrates Awards gitangwa mu birori bya Ballon d’Or, kikaba kigenewe gushimira abakinnyi bagaragaje uruhare rukomeye mu bikorwa by’ubugiraneza no guteza imbere imibereho myiza y’abaturage.

Cyatangiye gutangwa muri 2022, cyitirirwa Sócrates, wahoze ari umukinnyi w’ikipe y’igihugu ya Brazil, wamenyekanye haba ku mpano ye mu mupira w’amaguru ndetse no ku ruhare yagize mu bikorwa by’imibereho n’uburenganzira bw’abaturage.

Iki gihembo ntigishingira ku musaruro w’umukinnyi mu kibuga gusa, ahubwo kireba n’uruhare agira mu guhindura ubuzima bw’abandi binyuze mu bikorwa bifatika.

Ku bwa Bukayo Saka, ibikorwa byo gufasha abana kubona ubuvuzi ni bimwe mu byatumye agaragazwa nk’umukinnyi ukwiriye iki gihembo. Umuryango wa BigShoe ukorana n’abafatanyabikorwa mu gufasha abana bakeneye kubagwa no kubona ubuvuzi batashobora kwiyishyurira.

Ni bande begukanye iki gihembo mbere ya Saka?

Mu bakinnyi n’abahawe ibihembo byabanje harimo:

• Sadio Mané — 2022.
• Vinícius Júnior — 2023.
• Jenni Hermoso — 2024.

Ni iki cyatumye BigShoe ishingwa?

Igitekerezo cyaturutse ku nkuru y’umwana w’umukobwa wo muri Togo witwaga Nourisson, wavukanye indwara y’ibibari (cleft lip and palate). Iyi nkuru yakoze ku mitima y’abafana b’umupira w’amaguru bari mu mujyi wa Wangen im Allgäu mu Budage, maze batangira gukusanya amafaranga yo kumufasha kubagwa.

Ubu bufasha bwabaye intangiriro y’umushinga wa BigShoe, nyuma ugenda waguka ugera ku bana benshi bo mu bihugu bitandukanye.

BigShoe yashinzwe mu mwaka wa 2006 mu Budage, mu gihe cy’Igikombe cy’Isi cyabereye muri icyo gihugu. Yatangijwe na Dr. Igor Wetzel, agamije gufasha abana bo mu miryango itishoboye kubona ubuvuzi n’ibikorwa byo kubagwa batari gushobora kwiyishyurira.

Ni ibihe bikorwa BigShoe ikora?

• Ifasha abana bo mu miryango itishoboye kubona ubuvuzi n’ibikorwa byo kubagwa.
• Ikorana n’abaganga, abafana b’umupira w’amaguru n’abakinnyi kugira ngo abana babone ubuvuzi badashobora kwiyishyurira.
• Yafashije abana barenga 3,000 ku isi hose, nk’uko urubuga rwayo rubigaragaza.

Uruhare rwa Bukayo Saka ni uruhe?

Saka ni umwe mu bakinnyi bifatanyije na BigShoe mu bikorwa byayo. Muri 2022, yafashije gutera inkunga ibikorwa byo kubaga abana 120 bo muri Kano muri Nigeria. Mu bikorwa byakurikiyeho, yafatanyije n’abandi baterankunga gufasha abana bo mu bihugu birimo u Rwanda kubona ubuvuzi.

Kuba Saka yarasomeye abari mu birori ubutumwa bwa Byiringiro byahaye umwanya inkuru y’umwana wo mu Rwanda, igaragaza ko ibikorwa by’ubugiraneza bishobora kugira uruhare rukomeye mu buzima bw’umuntu.

Inkuru ya Byiringiro yerekana ko kubona ubuvuzi bukenewe bishobora gufasha umwana kongera kwiga neza, gukina na bagenzi be no kugira icyizere cy’uko ashobora kugera ku nzozi ze.

Igihembo cya Socrates Awards cyahawe Saka rero nticyerekeye gusa igikombe yatwaye, ahubwo kigaragaza n’agaciro ko gukoresha ubushobozi, izina n’amahirwe umuntu afite mu gufasha abandi.

Ku bana nka Byiringiro, ubwo bufasha bushobora kuba intangiriro y’ubuzima bushya, bukabafasha kuva mu bwigunge no kongera kureba ejo hazaza bafite icyizere.

Bukayo Saka yegukanye igihembo cya Socrates Awards muri Ballon d’Or ya 2026