Snoop Dogg yacyeje umugore we ubwo yashyikirizwaga igihembo cy’umurage ukomeye muri BET Awards 2025

Ni igihembo gitangwa ku bantu bamaze imyaka myinshi bagira uruhare rukomeye mu iterambere ry’umuziki, imyidagaduro, ubuvugizi n’imibereho myiza y’imiryango. Snoop w’imyaka 53 yahawe iki gihembo ari kumwe n’abandi bahanzi b’amazina akomeye nka Mariah Carey, Jamie Foxx, na Kirk Franklin.

Ibirori byatangiye Dr. Dre, inshuti magara ya Snoop Dogg ndetse banakoranye imyaka irenga 30, amusobanura nk’umwe mu bahanzi b’indashyikirwa mu mateka y’injyana ya rap.

Yagize ati: “Ni umuntu wihariye. Yabaye icyitegererezo kuva kera kugeza n’ubu. Ubu ari mu bantu bake bigeze kuba ishusho ya muzika ikaze, ariko bakaba baranabaye isura y’imikino Olempike yo mu 2024. Urumva urwo rugendo!”

Mu gihe Snoop Dogg yageraga ku rubyiniro, yahageze aherekejwe n’umugore we Shante Broadus, bashakanye mu 1997. Mbere yo kuvuga ijambo rye, yabanje gushimira bagenzi be batatu bahawe igihembo kimwe, anabavugaho amagambo yuje urukundo n’icyubahiro.

Ati: “Kirk Franklin, indirimbo zawe zankoze ku mutima ndetse zanakijije mama. Waririmbiye mu muhango wo kumusezeraho bwa nyuma, wambaye hafi mu bihe bikomeye. Ndabigushimira.”

Yahise ahindukirira Jamie Foxx, avuga ko bamenyanye mbere y’uko ajya mu buhanzi, maze yongeraho ati: “Imana yarakurinze. Ubu uri kumwe n’abakobwa bawe beza. Uzamera neza, Jamie.”

Ku bijyanye na Mariah Carey, yavuze ko ubwo yari muri gereza mu 1990, yakundaga kureba kuri televiziyo indirimbo ye “Visions of Love”, ndetse yahitagamo kujya kureba iyo ndirimbo akayiririmbira mu mutima. Ati: “Iyo twahuraga, wanshimiraga nk’inshuti yawe y’igihe kirekire. Wambaye hafi kandi wagumye kuba umuryango kuri njye. Ndagukunda, MC.”

Mu buhamya bwe, Snoop yavuze ko afite ishimwe rikomeye kuri BET, umuryango we, abarimu bamwigishije kwandika no gusoma, n’abaraperi bose yahanganye na bo. Yashimiye kandi abari bagize Death Row, inzu y’ubuhanzi yamureze mu buryo bwa muzika.

Yaboneyeho gushimira Dr. Dre ku bwo kumwemera akamwandikira indirimbo nka “Deep Cover” na “Nuthin' but a G'thang”, avuga ko kumwandikira byamugiriye akamaro gakomeye. Ati: “Wampaye icyizere cyo kwandikira abandi, icyo ni kimwe mu bintu byangiriye akamaro kurusha ibindi.”

Aha ni ho Snoop yahereye, atura amagambo y’icyubahiro akomeye umugore we Shante maze aragira ati: “Ni we ntandaro yo kuguma nkomeye imbere. Afite uruhare rukomeye mu buzima bwanjye. Imana iri mu buzima bwanjye, ariko mfite n’umwamikazi mu rugo.”

Yakomeje agira ati: “Nta kintu na kimwe cyabayeho ngo Shante ntabe ahari. Yambaye hafi igihe cyose, yabaye byose kuri njye. Ni yo mpamvu ari hano ku rubyiniro, ni yo mpamvu ari mu buzima bwanjye.”

Snoop yagarutse ku mukobwa we Cori Broadus ndetse anatangaza ko umwuzukuru we wavutse mbere y’igihe (amezi atandatu) amaze iminsi mu bitaro by’abana bavuka batarageza igihe, ari hafi gutaha. Ati: “Agiye gutaha. Mwarakoze ku isengesho ryanyu.”

Yasoje avuga ko abana be b’abuzukuru 10 ari bo bamuhaye icyerekezo, anavuga nyina n’umuvandimwe we bitabye Imana nk’abamurindira mu ijuru. Yashimiye kandi umuhanzi Charlie Wilson wamubereye nk’umujyanama mu buzima, amufasha no gukomeza urugo rwe. Ati: “Ni we wanyigishije uburyo bwo gusubirana n’umugore wanjye, bityo nkongera kwiyubaka. Warakoze, Charlie.”

Mu gusoza ijambo rye, Snoop yavuze amagambo akomeye yuzuye ubushishozi, ati: “Umuziki wa rap wampaye ijwi, wampaye inzira isohoka mu buzima bubi, unyinjiza mu muryango, mu mitima, mu bihugu n’imico ntatekerezaga kugeramo. Kuba icyitegererezo si ukurata izina, ni umurage usiga, n’abantu ugarurira icyizere mu rugendo.”

Yasoje agira ati: “Mwe mwese mukiri bato, abakobwa n’abahungu, mukomeze. Mutinyuke. Kandi mbere ya byose, mujye muba mwe.”

Mu gusoza ibirori, Snoop yaririmbye indirimbo ze zakunzwe nka “Drop It Like It's Hot”, “Nuthin' But a G’ Thang”, afatanya na Charlie Wilson kuririmba “Beautiful”, hanyuma Warren G na Kurupt basoreza ku ndirimbo “Ain’t No Fun (If the Homies Can’t Have None)”.

Uyu muraperi, umaze kwamamara nk’umusesenguzi w’imikino Olempike ya 2024, yavuze ko ari isomo rikomeye ku isi kubona umuntu wagize ibihe bikomeye, akava mu bibazo by’amategeko, agaterwa icyizere na buri wese, ahinduka icyaremwe gishya. Ati: “Ndi wa muntu wa kera, ariko ibihe n’urukundo byatumye mba umuntu mushya.”

Kugeza ubu, hategerejwe filime izavuga ku buzima bwe, ndetse yatoranyijwe mu bantu 100 b’ingenzi ku isi mu 2025. Azagaragara kandi mu gihe kiri imbere nk’umucamanza muri The Voice ku nshuro ya 28.

Snoop Dogg yashimiye umugore we wamubaye hafi muri byose

Yashyikirijwe igihembo cy'intwari z'ibihe byose muri BET Awards 2025, maze ashimira buri wese wagize uruhare rukomeye mu buzima bwe