Umwaka w'imikino 2024/2025 ni umwaka utarahiriye Real Madrid dore ko ubu hari ubwoba ko warangira nta gikombe na kimwe itwaye, ndetse ikagerekaho no kunyagirwa na mukeba wayo FC Barcelona mu mikino yombi bamaze gukina uyu mwaka.
Nyuma yo gusezererwa na Arsenal muri kimwe cya kane cya UEFA Champions League, benshi mu bafana ba Real Madrid bagiye bagaragaza ko batagifitiye icyizere umutoza Carlo Ancelotti nubwo yayifashije gutwara ibikombe byinshi mu myaka yashize.
Nubwo ari ibihe bishimishije ku bakeba babo b'i Barcelona, umutoza Hansi Flick we yagaragaje ko atishimiye kubona Real Madrid muri ibyo bihe birura ku bakunzi bayo. Yagize ati: "Ntabwo ari ibintu byiza kubona ibyabaye kuri Ancelotti. Real Madrid ifite umwe mu batoza beza ku isi, akwiye icyubahiro. Carlo yatwaye buri kimwe muri buri kipe, ni umuntu w'umugabo. Ndamwubaha cyane kandi biraza kuba ari byiza cyane kongera kumubona mu mpera z'icyumweru ku mukino wa nyuma wa Copa del Rey." Yasoje ati: "Navuga ko ari umutoza wo ku rwego rwo hejuru cyane."
Ku wa Gatandatu tariki 26 Mata 2025 ni bwo FC Barcelona izongera guhura na Real Madrid mu mukino wa nyuma wa Copa del Rey, aho Real Madrid izaba ishaka igikombe cya mbere muri uyu mwaka mu gihe Barcelona yo izaba ishaka icya kabiri nyuma yo gutwara Spanish Supercopa.
Ku wa Gatandatu w'iki cyumweru Hansi Flick na Ancelotti barongera batane mu mitwe