Iki giterane kizaba ku wa 15 no ku wa 16 Kanama 2026, muri ADEPR Ruhangiro buri munsi kuva saa Saba Mbiri za mu gitondo kugeza saa Kumi n'Ebyiri z'umugoroba, kikaba ari kimwe mu bikorwa ngarukamwaka iyi korali itegura mu rwego rwo gukomeza ivugabutumwa ryayo binyuze mu ndirimbo.
“Bethania Day” igiye kuba ku nshuro ya gatatu izarangwa n’ibihe bidasanzwe byo kuramya no guhimbaza Imana, gusenga n'inyigisho z’Ijambo ry’Imana. Izitabirwa n'amakorali anyuranye n’abakozi b’Imana batandukanye bazafatanya na Bethania Choir.
Mu bakozi b'Imana bazagabura ijambo ry'Imana harimo Ev. Ngendahimana Jean Bosco, Ev. Uzamuranga Donatha, Pastor Kanobana Jean Baptiste na Ev. Munyampirwa Serge. Hatumiwe amakorali arimo Rehoboth Choir, Abategereje Choir, Umubwiriza Choir y'i Rubavu na Korali Inkuru Nziza ya ADEPR Rugando muri Kigali.
Mu Kiganiro na inyaRwanda, Bethania Choir yararikiye Abakristo n’abandi bose bifuza kwifatanya na bo muri ibi bihe, bubasaba kuzitabira hakiri kare no kubahiriza amasaha y’igikorwa kugira ngo bafatanyirize hamwe mu kuramya no guhimbaza Imana.
Korali Bethania ibarizwamo Alicia Ufitimana wo mu itsinda rya Alicia and Germaine ry'abakobwa babiri bavukana bo muri Rubavu rikunzwe cyane mu muziki wo kuramya no guhimbaza Imana, rikaba rikunzwe mu ndirimbo zirimo: "Rugaba", "Uriyo", "Ibendera" na "Ibanga".
Mu butumwa bw'amashusho Alicia yasangije abamukurikira ku mbuga nkoranyambaga, yatumiye buri wese avuga ko hazaba hari abavugabutumwa beza n'amakorali atandukanye ati "Ntimuzabure pe, muzaze tubane".
Ku wa 22 Ukuboza 2024, ni bwo yakoze igiterane yise “Bethania Family Choir Day” ku nshuro ya kabiri. Insanganyamatsiko yacyo yari ishingiye kuri Zaburi 18:50, igira iti: “Ni cyo gituma Uwiteka nzagushima mu mahanga, ndirimba ishimwe ry’izina ryawe.”
Korali Bethania yatangiye ari iy’urubyiruko
Nk'uko twabitangarijwe n'Umuyobozi wa Korali Bethania, Uwilingiyimana Eric, iyi Korali yatangiye mu mwaka wa 2006, ari korali y’urubyiruko yari igizwe n’abana 33. Nyuma y’amezi 6 gusa, yahinduye izina iba Bethania, izina rifite igisobanuro gikomeye mu Byanditswe Byera. Bethania ni ahantu Yesu yakundaga kujya, akaba ari na ho Lazaro, Marita na Mariya bari batuye.
Kuva yatangira, Bethania yagiye iyoborwa n’abantu batandukanye barimo Bizimana Jean Bosco, Kaburame Jean de la Paix, Mahirwe Vainqueur, Rusangiza Richard, Kanyana Coline ndetse na Uwilingiyimana Eric, uyiyoboye kugeza ubu. Kugeza ubu, igizwe n’abaririmbyi 131, barimo abasore 28, abakobwa 40, abagabo 16 n’abagore 47.
Mu rwego rwo gukomeza ivugabutumwa, Korali Bethania imaze gukora indirimbo zirenga 20 z’amajwi (audio) ndetse n’izindi 7 zifite amashusho (video). Ibi bikorwa byose byatwaye amafaranga asaga miliyoni 4.5 Frw.
Korali kandi imaze gukora ingendo hafi 40 z’ivugabutumwa mu Rurembo rwa Rubavu no mu tundi turere tw’u Rwanda. Muri izo ngendo harimo izakorewe i Nyagatare, Nyamirama, Kabarondo, Rusizi ndetse no mu Ntara y’Amajyepfo, i Kiyumba.
Indirimbo za Bethania Choir zagiye zihimbwa n’abaririmbyi bayo ubwabo, barimo Ntamukunzi Cecile, Irankunda Gentil, Mukunzi Olivier, Niyigena Aline, Mahirwe Vainqueur, Mbabazi Keshen na Iradukunda Josué.
Ubuyobozi bwa korali buvuga ko budashyira imbere igihangano kimwe ngo kirute ibindi, kuko buri ndirimbo iba ifite ubutumwa bwubaka imitima kandi igaragaza impano n’ubushobozi Imana yahaye abaririmbyi.
Mu cyerekezo cy’imyaka itatu cya 2025–2027, Chorale Bethania yihaye intego zitandukanye zirimo gufasha urubyiruko n’abagore kwiga imyuga irimo ubudozi, gusudira no kubaka.
Iyi korali kandi irateganya kongera ubumenyi mu gucuranga, gutegura igitaramo kizafasha gufata amashusho y’indirimbo zayo mu buryo bwa live recording, kubaka urubuga rwa internet ndetse no kugura ibikoresho bigezweho bya muzika.
Kugeza ubu, hamaze gukusanywa amafaranga agera kuri miliyoni 3.5 Frw yo gufasha korali kwiyubaka, ariko haracyakenewe andi asaga miliyoni 15 Frw kugira ngo gahunda zose zateganyijwe zigerweho.
Bethania Choir imaze kumenyekana cyane mu karere ka Rubavu no hanze yako binyuze mu ndirimbo zayo, zimwe muri zo zikaba zarakunzwe ku mbuga nkoranyambaga. Mu ndirimbo zayo zizwi cyane harimo “Mwana Wanjye”, “Komeza Urugendo”, “Imigambi”, “Imana ni Umubyeyi Mwiza” na “Dufite Umwungeri Mwiza”, n’izindi.
Ubuyobozi n’abaririmbyi ba Bethania Choir bashimira Imana ku rugendo bamazemo imyaka myinshi, ndetse bagashimira inshuti n’abafatanyabikorwa bakomeje kubashyigikira. Bahamya ko bazakomeza ivugabutumwa binyuze mu ndirimbo no mu bikorwa by’urukundo, bagasaba abantu gukomeza kubaba hafi binyuze mu bitekerezo, amasengesho n’ubufasha butandukanye.
Bethania Choir igiye gukora ku nshuro ya gatatu igitaramo ngarukamwaka cya Bethania Day
Bethania choir ibarizwa muri ADEPR Ruhangiro muri Paruwasi ya Rubona, mu Rurembo rwa Rubavu
Korali Bethania yo muri ADEPR Ruhangiro, mu Rurembo rwa Rubavu, igiye gukora igitaramo ngarukamwaka cy’iminsi ibiri