Riderman na Gisa cy’Inganzo basusurukije abitabiriye; Coach Gael

Ni igitaramo cyabaye ku mugoroba wo ku wa Kane, tariki 11 Ukuboza 2025, muri Kigali Conference and Exhibition Village, ahazwi nka Camp Kigali.

Mu gace ka “Meet Me Tonight”, Coach Gael, washinze Kigali Universe, yaganiriye n’urubyiruko ku by’ingenzi bikubiyemo amahitamo, inzozi n’ubushabitsi.

Yatangaje ko kuva akiri umwana yifuzaga kuzaba Guverineri wa Banki Nkuru, ndetse ngo yatekerezaga ko azajya “asinya ku noti z’amafaranga zisohoka mu gihugu”.

Mu butumwa bwe, Coach Gael yashimangiye ko intsinzi ishingira ku mahitamo umuntu akora buri munsi.

Yabwiye urubyiruko ko gutangira akazi ko kwikorera bitagira igihe runaka cyiza, ko ahubwo bishingira ku kwiyemeza. Yatanze ingero z’abagize impinduka ku isi barimo:

Mark Zuckerberg, washinze Facebook afite imyaka 12, nyuma akagura Instagram mu rugendo rwageze kuri Meta;

Umushinwa washinze KFC, watangiye afite imyaka 66 kandi ubucuruzi bwe bukagera ku rwego rw’isi.

Uyu mugabo yavuze ko mu buzima bwe yatangiye Business ze eshatu zose ariko zose zirahombye. Yibutse urugendo rwe kuva afite imyaka 18, ubwo yaranguraga CD akazicuruza, ariko agarutse asanga yahombye;

Mu gihe yari muri Amerika, we na Kenny Mugarura batekereje Business y’inkoko 2000, ariko nayo irahomba; Nyuma binjira mu buhinzi, ariko ntibyabahiriye.

Nubwo bimeze gutyo, yavuze ko ibyo bihombo byamubereye isomo rikomeye: “Nigira mu gihombo kuruta ibyo nungutsemo.”

Coach Gael yavuze ko kuba yarashoye imari mu myidagaduro bishingiye ku rukundo rwe kuri uyu mwuga, ariko kandi abwira urubyiruko ko buri wese ahitamo inzira imuhuza n’intego ze.

Yagarutse ku mahirwe menshi ariho uyu munsi, harimo Internet na AI, avuga ko “uyu munsi umuntu ashobora gukora ikintu cyose uko abyifuza.”. “Mwari mubizi ko buri wese wicaye aha afite ububasha bwo kugera ku makuru mu buryo bwihuse, mu buryo bwiza kandi bunononsoye kuruta Bill Clinton ubwo yabaga Perezida wa Amerika.”

Yungamo ati “Amahirwe dufite ubu nonaha ariko mba mbona dukinisha cyane, ni uko dufite uburenganzira ku ikoranabuhanga noneho haje AI, badushyiriraho ibintu byose. Ntekereza ko ibyo bintu bifite ingufu cyane tutabasha gutekereza. Usanga uburyo tubikoresheje ni ubwo kwishimisha gusa, yego nabyo si bibi ariko bigire umwanya wabyo.”

Ku bijyanye no kuba yasimbuza bamwe mu bahanzi batandukanye na Sosiyete y’umuziki we ya 1:55 AM, yavuze ko ibyo abifata nk’Ibintu bisaba kwitondera.

Iki gikorwa cyasize benshi bigaragara ko bungutse ubumenyi bukomeye mu buryo bwo gutangira no gucunga umushinga, mu gihe abandi bishimiye umunezero w’umuco n’imyidagaduro byaranze ijoro.

Abitabiriye basusurukije kandi na Riderman na Gisa Cy’Inganzo. Riderman yacuranze indirimbo ze zakanyujijeho mu myaka myinshi zose zigahagurutsa abafana, mu gihe Gisa cy’Inganzo we yinjije ubuhanga bwe mu bihangano byuje ubugwaneza n’ubutumwa, bituma igitaramo kirushaho gususuruka.

Ariko kandi umuraperi Logan Joe ntiyabashije kuririmba muri iki gitaramo n’ubwo yari kuri gahunda, kuko ubwa mbere ahamagarwa atabonetse ku gihe yari yahawe.

Umuraperi Riderman yataramiye abitabiriye igitaramo cy'urwenya cya Gen-z Comedy cyabaye mu ijoro ryo kuri uyu wa Kane tariki 11 Ukuboza 2025

Riderman yifashishije indirimbo ze zinyuranye zakunzwe mu myaka irenga 19 ishize ari mu muziki, yanyuze abitabiriye Gen-z Comedy

Amagana y'abafana yafatanyije na Riderman kuririmba zimwe mu ndirimbo ze zakomeje izina rye mu rugendo rwe rw'umuziki

Riderman yaririmbye ananyuzamo agatanga ubutumwa bujyanye no kwirinda indwara zandurira mu mibonano mpuzabitsina

Coach Gael ari kumwe n'abavandimwe be bitabiriye igitaramo cya Gen-z Comedy kiba kabiri mu kwezi mu rwego rwo gususurutsa Abanya-Kigali

Umunyarwenya wamamaye nka 'Umushumba' yongeye kugaragaza ko ari uwo guhanga amaso mu gususurutsa abantu

Abanyarwenya Mugisha na Rusine banahurira muri filime bataramiye abantu muri Gen-z Comedy

Umukinnyi wa filime wamamaye nka Papa Iddy yafatanyije na Mugisha na Rusine ku rubyiniro muri iki gitaramo

Umunyarwenya Ravanelly, 'D'amour Selemani ku rubyiniro rwa Gen-z Comedy yabereye muri Camp Kigali

Umunyarwenya Pilate uri mu bagezweho muri iki gihe yisunze ingingo zinyuranye atembagaza benshi

Coach Gael yatanguwe na Rwema amuha impano y'ifoto yashushanyije, amushimira uruhare rwe mu guteza imbere ubuhanzi

Umunyarwenya akaba n'umunyamakuru, Muhinde yongeye kunezeza amagana y'abantu yitabiriye iki gitaramo cya Gen-z Comedy giterwa inkunga na Sosiyete y'Itumanaho ya MTN Rwanda