Intumwa z’iyi kipe ziyobowe na Emilio Butragueño, ushinzwe itangazamakuru muri Real Madrid, zirerekeza mu murwa mukuru w’u Bwongereza kuri uyu wa Mbere, tariki ya 26 Ukwakira 2026.
Muri izo ntumwa
harimo Kylian Mbappé, uri mu bakinnyi bahabwa amahirwe yo kwegukana iki gihembo
gihabwa umukinnyi witwaye neza kurusha abandi ku Isi.
Kugaruka kwa Real Madrid muri uyu muhango bibaye nyuma
y’uko umwuka utari mwiza wari umaze igihe hagati yayo n’Ishyirahamwe ry’Umupira
w’Amaguru ku Mugabane w’u Burayi (UEFA) utangiye gushira.
Real Madrid yari yarakajwe no kudahabwa igihembo kwa
Vinícius Jr
Kutitabira kwa Real Madrid byatangiye mu 2024, ubwo
iyi kipe yafashe icyemezo cyo guhagarika ku munota wa nyuma urugendo yari
gukora ijya i Paris mu Bufaransa, ahagombaga kubera umuhango wa Ballon d’Or.
Icyo gihe, amakuru y’uko Vinícius Júnior atari buhabwe
igihembo yari yamenyekanye, nubwo benshi bamufataga nk’umukinnyi wari ufite
amahirwe menshi yo kucyegukana.
Real Madrid ntiyishimiye icyo cyemezo, yemeza ko UEFA
ishobora kuba yari ifite uruhare mu kutagihabwa kwa Vinícius, bitewe
n’amakimbirane yari afitanye na yo ashingiye ku mushinga wa Super League, wari
uyobowe n’iyi kipe yo muri Espagne.
Icyo gihembo cyegukanywe na Rodri, wari umukinnyi wa
Manchester City n’Ikipe y’Igihugu ya Espagne, nubwo Vinícius yari yagize umwaka
mwiza, afasha Real Madrid kwegukana La Liga na UEFA Champions League mu mwaka
w’imikino wa 2023-2024.
Real Madrid ntiyitabiriye kandi umuhango wa Ballon
d’Or wa 2025, bituma imara imyaka ibiri idafite abahagarariye iyi kipe muri ibi
birori.
Amakimbirane hagati ya Real Madrid na UEFA yarangiye
Muri Gashyantare 2026, Real Madrid, UEFA n’Ihuriro
ry’Amakipe y’Umupira w’Amaguru i Burayi (EFC) batangaje ko bumvikanye, bityo
hasozwa amakimbirane yari amaze igihe, ahanini ashingiye ku mushinga wa Super
League.
Uyu mushinga wari uyobowe na Real Madrid, yashakaga
impinduka mu mikorere y’amarushanwa y’amakipe akomeye i Burayi, cyane cyane ku
bijyanye n’uburyo amafaranga ava mu burenganzira bwo kwerekana imikino kuri
televiziyo agabanywa.
Impande zombi zagaragaje ko ayo masezerano ari
intambwe nziza kuri buri wese. UEFA yashimangiye uruhare rukomeye Real Madrid
ifite mu mupira w’amaguru w’i Burayi no ku rwego mpuzamahanga.
Ku ruhande rwa Real Madrid, byitezwe ko ibitekerezo
bimwe yari yaratanze mu mushinga wa Super League bizitabwaho, cyane cyane
ibyerekeye uburyo bushya bwo kwerekana imikino kuri televiziyo, bwagura isoko
kandi bukagabanya ikiguzi ku bafana.
Florentino Pérez ntaraba ahari
Nubwo Real Madrid iraba ihagarariwe muri uyu muhango,
Perezida wayo Florentino Pérez ntaritabira ibirori birabera i Londres.
Intumwa z’iyi kipe ziyobowe na Emilio Butragueño,
zikazaba zirimo n’abakinnyi batandukanye bahataniye ibihembo, barimo Kylian
Mbappé, Felicia Schröder, Marc Cucurella na Yan Diomande.
Kutitabira kwa Pérez kwatumye havuka ibitekerezo
by’uko bishobora kuba bifitanye isano n’amahirwe ya Mbappé yo kwegukana Ballon
d’Or. Harry Kane na we ari mu bahabwa amahirwe menshi yo kwegukana iki gihembo.
Real Madrid irasubira mu birori bya Ballon d’Or nyuma y’imyaka ibiri itari kumwe na Perezida wayo