Iki cyemezo cyafashwe ku wa Kane, tariki ya 15 Ukwakira 2026, gitangazwa na Minisitiri w’Umutekano w’Imbere mu Gihugu, Jacquemain Shabani, binyuze mu butumwa bwemewe bwohererejwe ba guverineri b’intara.
Muri ubwo butumwa, ba guverineri basabwe gushyira mu bikorwa iki cyemezo nta gutinda, bakemeza ko cyashyizwe mu bikorwa mu turere bashinzwe ndetse bakageza raporo ku rwego rubishinzwe.
Mu mashyaka yahagaritswe harimo Leadership et Gouvernance pour le Développement (LGD) ya Matata Ponyo, Piste pour l’Émergence (PISTE-E) ya Seth Kikuni, Alliance pour l’Alternance et le Progrès (AAP) ya Théophile Mbemba Fundu na Union Démocratique Africaine Originelle ya Claudel Lubaya.
Andi mashyaka yibasiwe n’iki cyemezo ni Mouvement du Peuple Congolais pour la République (MPCR) ya Jean-Claude Vuemba, Alliance des Travaillistes pour le Développement (ATD) ya José Makila Sumanda, Parti National pour la Nouvelle Énergie du Congo (PNEL) ya Michel Mwika Banza na Mouvement Lumumbiste Progressiste (MLP) ya Franck Diongo.
Harimo kandi Union des Patriotes Congolais (UPC) ya Thomas Lubanga, Action pour la Dignité du Congo et son Peuple (ADCP) ya Corneille Nangaa, Convention des Fédéralistes pour la Démocratie Chrétienne (COFEDEC) ya Filia Tshipasa Kahindo na Actions Alternatives pour la Renaissance du Congo (AARC) ya Élysée Minembwe.
Ubutumwa bwamenyesheje ihagarikwa ry’aya mashyaka bwohererejweho kopi inzego zitandukanye za Leta, zirimo Ibiro bya Perezida wa Repubulika, Ibiro bya Minisitiri w’Intebe, Polisi y’Igihugu, Urwego rw’Ubutasi (ANR) n’Urwego rushinzwe Abinjira n’Abasohoka (DGM).
Icyakora, inyandiko yatangajwe ntisobanura impamvu z’iri hagarikwa, igihe rizamara cyangwa ingingo z’amategeko zashingiweho. Igaragaza gusa ko ibikorwa by’ayo mashyaka bibujijwe, ariko ntivuga ko yasheshwe burundu.
Iki cyemezo cyafashwe nyuma y’iminsi itatu hatangajwe ishingwa ry’umutwe wa Front pour la Refondation de la Nation (FRN), uhuza ibikorwa bya politiki n’ibya gisirikare, uyobowe na Joseph Kabila.