Kuri iki Cyumweru Saa moya z'umugoroba i Cairo mu Misiri kuri 30 June Stadium ikipe ya Pyramids FC yari yakiriye Mamelodi Sundowns yo muri Afurika y'Epfo mu mukino wo kwishyura wa CAF Champions League.
Byari nyuma y'uko umukino ubanza wari wabereye muri Afurika y'Epfo wari warangiye amakipe yombi anganya igitego 1-1.
Uyu mukino wo kwishyura Pyramids FC yari imbere y'abafana bayo yawitwayemo neza iwutsinda ibitego 2-1.
Igitego cya mbere cyatsinzwe na Fiston Kalala Mayele ku munota wa 23 ku mupira wahinduwe imbere y'izamu myugariro wa Mamelodi Sundowns awukozaho ukuguru usanga uyu rutahizamu ahita arekura ishoti riruhukira mu nshundura.
Igitego cya kabiri cyo cyatsinzwe na myugariro Samy akoresheje umutwe ku mupira waruvuye kuri kufura ku munota wa 56 naho ku wa 75 Rayners aza kwishyuramo kimwe.
Pyramids FC yo mu Misiri yahise yegukana igikombe cya CAF Champions League cya mbere mu mateka yayo. Iyi kipe mu nzira zayo ziyigeza ku gikombe yasezereye APR FC yo mu Rwanda mu ijonjora rya kabiri muri iri rushanwa.
Fiston Kalala Mayele yishimira igitego yatsinze
Pyramids FC yegukanye igikombe cya CAF Champions League ku nshuro ya mbere