Nta yo mu Rwanda irimo! Kaminuza zo muri Afurika ziri ku isonga muri 2026

Iyi raporo ishingiye ku bushakashatsi bukorwa na za kaminuza, ubufatanye mpuzamahanga, izina zifite ku rwego rw'Isi ndetse n'uruhare zigira mu guteza imbere ubumenyi.

Afurika y'Epfo na Misiri byiganje ku rutonde

Mu rutonde rw'uyu mwaka, Afurika y'Epfo ifitemo kaminuza enye, mu gihe Misiri ifitemo eshanu. Ibi bivuze ko ibi bihugu byonyine bifite kaminuza icyenda mu 10 za mbere muri Afurika, bikomeza kugaragaza ubudahangarwa bwabyo mu rwego rw'uburezi n'ubushakashatsi.

Kaminuza ya Cape Town yongeye kugumana umwanya wa mbere muri Afurika, ikomeje gushimwa kubera ubushakashatsi bwayo, ubufatanye n'ibigo mpuzamahanga ndetse n'izina rikomeye ifite ku rwego rw'Isi.

Nigeria ni yo yonyine ihagarariye Afurika y'Iburengerazuba

Muri Afurika y'Iburengerazuba, University of Ibadan yo muri Nigeria ni yo yonyine yinjiye mu 10 za mbere. Iyi kaminuza yaje ku mwanya wa kane muri Afurika, ndetse iza ku mwanya wa 264 ku Isi.

Ibi byerekana ko nubwo hari za kaminuza nyinshi muri aka karere, zikiri inyuma ugereranyije n'izo muri Afurika y'Epfo na Misiri mu bijyanye n'ubushakashatsi n'icyubahiro mpuzamahanga.

Nta kaminuza yo mu Rwanda yagaragaye

Nta kaminuza yo mu Rwanda yaba iya Leta cyangwa iyigenga yagaragaye muri uru rutonde rwa kaminuza 10 za mbere muri Afurika.

N’ubwo u Rwanda rukomeje gushora imari mu burezi no guteza imbere ubushakashatsi, iyi raporo igaragaza ko hakiri urugendo kugira ngo za kaminuza zarwo zibashe guhangana n'izimaze igihe zigaragaza ubushobozi ku mugabane wa Afurika.

Uko amakaminuza yasuzumwe

Abateguye uru rutonde bavuga ko batashingiye ku ireme ry'amasomo cyangwa imibereho y'abanyeshuri gusa, ahubwo bibanze ku bipimo birimo: umusaruro w'ubushakashatsi, izina kaminuza ifite ku rwego mpuzamahanga, izina ifite mu karere iherereyemo, umubare w'inyandiko z'ubushakashatsi zitangazwa, ndetse n’ubufatanye n'ibigo mpuzamahanga.

Banibukije ko abanyeshuri bashaka kaminuza bakwiye no kwita ku bindi birimo ireme ry'uburezi, aho kaminuza iherereye, amafaranga y'ishuri ndetse n'ubuzima bwo kuri campus.

Kaminuza 10 za mbere muri Afurika mu 2026

1. University of Cape Town (Afurika y'Epfo)
2. Cairo University (Misiri)
3. Stellenbosch University (Afurika y'Epfo)
4. University of Ibadan (Nigeria)
5. Ain Shams University (Misiri)
6. Alexandria University (Misiri)
7. University of Pretoria (Afurika y'Epfo)
8. Mansoura University (Misiri)
9. University of KwaZulu-Natal (Afurika y'Epfo)
10. Zagazig University (Misiri)

Mu gihe Afurika ikomeje gushora imari mu burezi no mu bushakashatsi, uru rutonde rugaragaza ko hakiri intera nini hagati y'ibihugu byamaze gutera imbere muri uru rwego n'ibikiri mu rugendo rwo kuzamura ireme rya za kaminuza zabyo.