Abakurikiranira hafi umupira w’amaguru mu Rwanda n’abakunzi bawo bacitse ururondogoro nyuma y’itangazo FERWAFA yashyize hanze Ejo.
Iri shyirahamwe ryavuze ko nyuma y'ibiganiro bitandukanye ryagiranye n'amakipe ya APR FC, Rayon Sports, Kiyovu Sports na Police FC; None
ku wa 18 Kanama 2026 hemejwe ko Super Cup 2026 izakinwa n'amakipe ane, mu
mikino ibiri ya ½ cy'irangiza n'umukino wa nyuma nk'uko byari biteganyijwe.
Ryavuze ko kubera ko APR FC yayimenyesheje ko
itazitabira iri rushanwa muri ubu buryo bw'amakipe ane, hemejwe ko Mukura
Victory Sports & Loisirs, yabaye iya gatanu muri BK Pro League ya 2025/2026
ari yo izitabira iri rushanwa nk'ikipe ya 4.
Super Cup ni iki?
Super Cup si igikombe gikinirwa mu Rwanda gusa ariko aho gikinirwa hose aba ari igikombe kiruta ibindi. Akenshi mu bihugu bitandukanye ni cyo gitangiza umwaka w’imikino aho gihuza amakipe aba yaritwaye neza.
Nko mu Bwongereza, Arsenal yatwaye igikombe cya shampiyona yakinnye na Manchester City yatwaye FA Cup ndetse iranayitsinda gusa, bo bacyita Community Shield.
Mu bihugu byinshi iki gikombe gikinwa n’amakipe abiri, iyatwaye igikombe cya shampiyona n'iyatwaye icy'igihugu usibye mu bihugu bike nka Espagne aho kuva muri 2020 gikinwa n’amakipe ane.
Aya amakipe ane ni
iyatwaye shampiyona, iya Kabiri, iyatwaye igikombe cy’Umwami ndetse n'iyatsindiwe
ku mukino wa nyuma. Bivuze ko haba harimo ikipe ifite igikombe uko byagenda
kose.
Super Cup ya FERWAFA ya 2026 yaburiwe igisobanuro
Ubusanzwe iki gikombe mu Rwanda cyahuzaga ikipe yatwaye igikombe cya shampiyona n'icy’Amahoro ariko muri uyu mwaka byarahinduwe hafatwa umwanzuro ko kigomba gukinwa n’amakipe ane.
Ibi byo kongera amakipe ni byo byatumye APR FC yikura muri iri rushanwa kubera ko ivuga ko uyu mwanzuro wafashwe itagishijwe inama kandi ikaba yari yarateguye izindi gahunda.
Iyi kipe y’Ingabo z’igihugu ni yo ifite igikombe cya shampiyona giheruka ndetse n'icy’Amahoro.
Ubundi nka mbere muri Espagne iyo ikipe yabaga yatwaye igikombe cya shampiyona
n'icy’Umwami nk'uku ntabwo Super Cup yakinwaga yahitaga itwarwa n’ikipe yatwaye ibyo
byombi. Gusa mu Rwanda ho, Super Cup igiye gukinwa nta kipe ifite igikombe irimo, ibituma
iki gikombe kirimo kirabura igisobanuro.
Iyo ugerageje kureba mu mateka y’umupira niba hari
ahandi ibi bintu byigeze biba urahabura. Kuba ikipe yakwikura mu irushanwa ni
ibisanzwe ariko ntaho byigeze biba ko igikombe kiruta ibindi gikinwa nta kipe irimo
yatwaye igikombe gituma iryo rushanwa riba.
Super Cup ya FERWAFA ya 2026 yaburiwe igisobanuro nyuma y'uko APR FC ifite igikombe cya shampiyona n'icy'Amahoro yikuyemo