Duhereye muri Libya, ku wa Kabiri w'icyumweru gishize ni bwo ikipe ya Al Ahli Tripoli ikinamo Manzi Thierry na Bizimana Djihad yanyagiye Asaria ibitego 4-0 mu gikombe cy'igihugu. Muri aba bakinnyi b'Amavubi nta n'umwe wigeze abanza mu kibuga ndetse nta nubwo bigeze basimbura, gusa hari bari ku ntebe y'abasimbura.
Al Ahli Tripoli irasubira mu kibuga kuri uyu wa Mbere saa moya z'umugoroba ikina na Swehly SC muri shampiyona. Muri shampiyona y'icyikiro cya mbere muri Tunisia, ku wa Gatandatu ikipe ya Stade de Tunisien ikinamo Mugisha Bonheur yanganyije na Olympic de Beja ikinamo Ishimwe Anicet.
Uyu mukino warangiye amakipe yombi anganyije 0-0. Ku ruhande rwa Stade Tunisien Mugisha Bonheur yari yabanje mu kibuga mu gihe ku ruhande rwa Olympic de Beja ho Ishimwe Anicet yari yinjiye mu kibuga asimbuye ku munota wa 86.
Kugeza ubu Stade de Tunisien iri ku mwanya wa 6 ku rutonde rwa shampiyona ikaba izasubira mu kibuga ikina na JS Manouba ku Cyumweru. Ni mu gihe Olympic de Beja yo iri ku mwanya wa 10 ku rutonde rwa shampiyona ikaba izasubira mu kibuga ikina na Metlaoui mu mpera z'iki Cyumweru.
Muri shampiyona y'icyiciro cya mbere muri Afurika y'Epfo, mu ikipe ya Kaizer Chiefs ikinamo Ntwari Fiacre,ku wa Gatandatu yanganyije na Chippa United 0-0.
Uyu munyezamu w'Amavubi ntabwo yigeze abanza mu kibuga ndetse nta nubwo yari ku ntebe y'abasimbura. Kugeza ubu Kaizer Chiefs iri ku mwanya wa 8 ku rutonde rwa shampiyona ikaba izasubira mu kibuga ikina na Gallants ku wa Gatandatu.
Muri shampiyona y'icyiciro cya mbere mu Misir, ku wa Kane ikipe ya Zed FC ikinamo Rafael York yanyagiwe na Ceramica Cleopatra FC 4-1. Uyu mukinnyi w'Umunyarwanda ntabwo yabanje mu kibuga ndetse yewe ntabwo yari ku ntebe y'abasimbura. Kugeza ubu Zed FC iri ku mwanya wa 5 mu itsinda B irimo ry'imikino ya kamparamaka.
Muri shampiyona y'icyiciro cya mbere muri Azerbaijani,ku munsi wejo ikipe ya FC Zira ikinamo Mutsinzi Ange yatsinze Sumqayit ibitego 3-1.
Kuru uyu mukino ntabwo uyu myugariro w'ikipe y'igihugu y'u Rwanda, Amavubi, yabanje mu kibuga ariko yinjiyemo asimbuye ku munota wa 85. Kugeza ubu FC Zira iri ku mwanya wa kabiri ku rutonde rwa shampiyona ikaba izasubira mu kibuga ikina na Kapaz ku wa Gatandatu.
Muri iyi shampiyona kandi ku wa Gatandatu, Sabail FK ikinamo Nshuti Innocent yatsinzwe na Sabah ibitego 3-2. Uyu rutahizamu w'Amavubi yari yabanje mu kibuga ndetse ni nawe watsinze igitego cya mbere ku munota wa 22 gusa yaje gusimbuzwa ku munota wa 65.
Kugeza ubu Sabail FK izasubira mu kibuga ikina na Araz ku Cyumweru. Mu Bubiligi, ikipe ya Beerschot ikinamo Hakim Sahabo ntabwo yigeze ikina mu Cyumweru gishize ariko izajya mu kibuga ku wa Gatanu ikina na Kortrijik.
Muri shampiyona y'icyiciro cya kabiri mu Bubiligi,ku wa Gatanu ikipe ya Raal La Louviere ikinamo Samuel Gueulette yatsindaga Lommel ibitego 2-1. Ni ibitego bya Yeboah Amankwah witsinze ku munota wa 79 na Mouhamed Belkheir watsinze ku munota wa 92 kuri 1 cya Lommel cyo cyatsinzwe na Schoofs ku munsi wa 78.
Nyuma yuko iyi kipe itsinze yahise ijya ku mwanya wa 2 ku rutonde rwa shampiyona n'amanota 59 inganya n'ikipe ya mbere ariko yo ikaba iyirusha intsinzi. Aya makipe abiri ya mbere yahise azamuka muri shampiyona y'icyiciro cya mbere mu Bubiligi. Ni mu gihe guhera ku ikipe iri ku mwanya wa 3 ku rutonde rwa shampiyona kugeza ku iri ku mwanya wa 5 zo zizabanza zigakina imikino ya kamparamaka.
Izaba yabaye iya mbere izahura n'ikipe yabaye iya kabiri mu mikino ya kamparamaka y'amakipe arwana no kutamanuka muri shampiyona y'icyiciro cya mbere, ubundi niyitsinda ihite izamuka mu buryo budasubirwaho.
Raal La Louviere iberewe kapiteni na Samuel Gueulette wanabaye umukinnyi w'umukino kuri uyu mukino,yazamutse muri shampiyona y'icyiciro cya kabiri mu mwaka ushize w'imikino. Ni ku nshuro ya mbere mu mateka iyi kipe igiye gukina muri shampiyona y'icyiciro cya mbere mu Bubiligi.
Muri iyi shampiyona y'icyiciro cya kabiri mu Bubiligi,ku wa Kane ikipe ya Rhode Island ikinamo Kwizera Jojea yatsinzwe na Portland Hearts of Pine ibitego 2-1. Muri uyu mukino ntabwo uyu mukinnyi w'Umunyarwanda yari yabanje mu kibuga ariko yinjiyemo asimbuye ku munota wa 82.
Kugeza ubu ikipe ya Rhode Island iri ku mwanya wa 10 ku rutonde rwa shampiyona ikaba izasubira mu kibuga ikina na Westechester SC ku Cyumweru.
Nshuti Innocent yatsinze igitego gusa byarangiye ikipe ye itsinzwe ibitego 3-2