Noneho Kirikou na Double Jay banyuzwe – AMAFOTO + VIDEO

Ni igitaramo cyabereye muri Kigali Universe mu ijoro ryo ku wa Gatandatu aho cyari kigamije kugaragaza abanyempano bashya nk’uko bikubiye mu ntego za Harmony Africa Foundation.

Abanyempano 10 batangiye gufashwa bagaragaje impano zabo muri iki gitaramo cyasojwe gikesheje kuko umuhanzi wa nyuma yavuye ku rubyiniro mu masaha ashyira saa munani z’ijoro.

Nyuma yo kumurika izo mpano, hari hategerejwe igitaramo cy’abahanzi bikomeye mu Rwanda no mu Burundi ari bo Nasoon, Social Mula, Kenny Edwin, Fireman, Bushali, Double Jay na Kirikou.

Mu bari bategerejwe cyane bigendanye n’uko mu bihe byatambutse bagiye bagaragaza kutishimira imigendere ya bimwe mu bitaramo bataramiraga mu Rwanda, ni Double Jay na Kirikou.

Mu byo bajyaga bijujutira ni uburyo bacurangirwa aho bagaragazaga ko ibyuma bizimywa kugira ngo bataririmba ariko iri joro ibyuma byose byari nta makemwa ndetse nta n’ahantu na hamwe bigeze gahura n’akabazo na kamwe k’ibyuma.

Kimwe mu byafashije aba bahanzi kugira ngo igitaramo cyabo kigende neza, harimo kuba barakoranye imyitozo na Dj Bior bajya ku rubyiniro bumvikanye neza uko ibintu biza kugenda ndetse bigenda neza.

Social Mulla nawe yeretswe urukundo rudasanzwe cyane ko hari ku isabukuru ye, asoje kuririmba, yagiye guhoberana na Coach Gael nyiri Kigali Universe wari waje muri iki gitaramo.