Nyuma yuko Al Hilal Omdurman itangaje ku mbuga nkoranyambaga zayo ko kwinjira ku mukino bafitanye na MC Alger kuri uyu wa Gatanu saa 15:00 kuri Stade Amahoro ari ubuntu, ibi byatumye benshi bizera ko bazaza kwihera ijisho uyu mukino w'amakipe y'ubukombe muri Afurika.
Itangazo Al Hilal ryavugaga ko kwinjira ari ubuntu ku mukino wayo na MC Alger
Mu gitondo cyo kuri uyu wa Gatatu tariki ya 19 Ugushyingo 2025 ni bwo hasohotse ibiciro by'amatike yo kwinjira kuri uwo kandi Al Hilal yari yatangaje ko ari ubuntu. Aganira na InyaRwanda, Yasir Hassan Ibrahim Umuyobozi Mukuru wa Al Hilal Omdurman yatangaje ko ari ubuntu ku banyeshuri b'Abanyasudani biga mu Rwanda gusa, bitandukanye n'itangazo ryari ku mbuga nkoranyambaga z'iyi kipe.
Yagize ati: "Murabizi neza ikibazo cy'intambara dufite iwacu, itangazo mwabonye rirareba abanyeshuri b'Abanyasudani biga mu Rwanda gusa, ntabwo bireba buri wese."
Yakomeje avuga ko Al Hilal izabaha amatike binyuze kuri 'System' iyacuruza ndetse ko abandi bifuza kureba umukino bazagura amatike. Ati: "Twe turabazi, tuzabaha amatike y'ubuntu nyuma yo kuyagura. Rero abandi bagure amatike kuko ari ku giciro cyo hasi."
Al Hilal Omdurman izakira MC Alger kuri uyu wa Gatanu saa 15:00 muri Stade Amahoro mu mukino ubanza mu itsinda C rya CAF Champions League. Ni ku nshuro ya gatatu Al Hilal igiye guhura na MC Alger, mu nshuro ebyiri ziheruka, Al Hilal yatsinze umwe banganya undi.
Ibiciro bishya byo kwinjira kuri uyu mukino byasohotse 
Amafoto ya Al Hilal ikorera imyitzo ya mbere muri Stade Amahoro
Abakinnyi ba Al Hilal my myiteguro y'umukino