Newcastle United yaguze Amar Dedic kuri Miliyoni £30

Nk'uko byatangajwe na Newcastle United, uyu mukinnyi w’imyaka 24 uzambara nimero 37 yongeye guhura n’umutoza Matthias Jaissle, bakoranye muri Red Bull Salzburg.

Dedic yavuze ko yishimiye cyane kwerekeza muri Newcastle, cyane cyane kubera kongera gukorana na Jaissle. Ati:“Ni ibyiyumvo byihariye kandi ni icyubahiro gikomeye kuri njye kuba umukinnyi wa Newcastle United.”

Dedic ashobora guhita atangira gukina mu mukino Newcastle izakira na Liverpool ku Cyumweru, kubera ko Tino Livramento akiri mu mvune.

Jaissle yavuze ko Dedic azongerera Newcastle imbaraga haba mu kwirwanaho no mu busatirizi. Ati: “Azadufasha haba mu kwirwanaho ndetse no mu gutera, ibyo bikaba bihuye n’imikinire dushaka gukoresha.”

Nubwo atigeze akina muri Premier League, Dedic afite ubunararibonye bushobora kumufasha kumenyera vuba. Mu mwaka ushize, ubwo yakinaga muri shampiyona ya Portugal, yagaragaje ubushobozi bwo kuzamuka afasha ikipe mu busatirizi.

Mu mikino 24 yakinnye muri Primeira Liga, Dedic yabaye uwa kabiri muri bamyugariro bo ku mpande mu gutwara umupira awerekeza mu gice cy’ubusatirizi, aho yabikoze inshuro 49. Yabaye kandi uwa gatatu mu gutwara umupira awutera imbere inshuro 202, ndetse muri rusange awutwara inshuro 325.

Uyu myugariro ashobora gukina ku mpande zombi z’ubwugarizi, kandi Newcastle yizeye ko azayifasha cyane mu gihe shampiyona ya Premier League itangiye.

 Newcastle United yaguze Amar Dedic kuri miliyoni £30