Uyu
mukino waranzwe n’ubuhangange bwa Indiana Pacers kuva ku isegonda rya mbere,
aho bageze ku manota 80-39 mbere y’uko igice cya mbere kirangira, ibintu
byasize Cavaliers nta cyo barwanaho.
Pascal
Siakam ni we wigaragaje cyane mu bakinnyi ba Pacers, atsinda amanota 21. Yari
ayoboye abandi batandatu b’iyi kipe bose barengeje amanota 10, byerekana
imbaraga z’ubufatanye bw’iyi kipe.
Mu
gihe Cavaliers bari bamerewe nabi mu kibuga, byabaye bibi kurushaho ubwo
umukinnyi wabo w’icyamamare Donovan Mitchell yavunitse, bigatuma atabasha
kurangiza umukino.
Mitchell
wari umaze imikino ibiri yikurikiranya atsinda amanota 40, yatangiye kumva
uburibwe ku kirenge cy’ibumoso bituma asohoka mu kibuga, icyizere cyo gukomeza gitangira
kuyoyoka ku ikipe ya Cleveland Cavaliers.
Nubwo
Cleveland Cavaliers bagerageje kugaruka mu mukino, amakosa yabo 22 yabahaye
akazi katoroshye kuko Pacers bayabyaje amanota 35, byabafashije gukomeza
kuyobora nta nkomyi.
Muri
uyu mukino, habayeho n’imvururu ubwo Bennedict Mathurin wa Indiana yakubitaga
De’Andre Hunter, bombi bagahanwa, bikongera umujinya mu kibuga.
Myles
Turner na Obi Toppin bose barangije bafite amanota 20, mu gihe Tyrese
Haliburton yatanze imipira myiza harimo n’iyo yatanze atareba ku nkangara
yabyaye amanota yishimiwe n’abafana.
Turner
yavuze ko batsinzwe umukino wa gatatu bikabababaza, ariko uyu wa kane
bawugarutsemo bafite ishyaka rikomeye, abakinnyi bose bakitanga uko bashoboye.
Pacers isigaje gutsinda umukino umwe gusa ngo isezerere Cavaliers burundu.
Indiana imaze kugira intsinzi eshatu kuri imwe ya Cavaliers