Raporo ya Business Insider Africa igaragaza ko ibihugu nka Namibia, Niger na South Africa biri mu bihugu biri gukurura amaso y’isi kubera umutungo kamere bifite, cyane cyane uranium n’andi mabuye y’agaciro akenewe mu ikorwa rya batiri z’imodoka z’amashanyarazi ndetse n’inganda z’ikoranabuhanga.
Uranium ni imwe mu mabuye ari kurwanirwa cyane kuko ikoreshwa mu gukora ingufu za nucléaire. Nyuma y’uko u Bufaransa bugize ibibazo mu kubona uranium muri Niger nyuma ya coup d’état yabaye muri 2023, bwatangiye gushaka andi masoko mashya muri Afurika y’Amajyepfo, cyane cyane muri Namibia.
Namibia iri kuzamuka nk’imwe mu nkingi z’ingenzi mu bucuruzi bw’aya mabuye ku rwego mpuzamahanga. Iki gihugu gifite uranium, lithium, graphite, copper n’amabuye adasanzwe akenerwa cyane mu nganda zikora ikoranabuhanga rigezweho.
Abashoramari baturuka i Burayi, muri Amerika, mu Bushinwa no mu bihugu byo mu Burasirazuba bwo Hagati bakomeje kuhahurira bashaka kubona imigabane muri uwo mutungo.
Ku ruhande rw’u Bushinwa, bwakomeje gushora amafaranga menshi mu mishinga y’ubucukuzi bw’amabuye y’agaciro muri Afurika. Uretse kuba bufite imigabane minini mu birombe bya cobalt na lithium muri Repubulika Iharanira Demokarasi ya Congo, ruri no gufasha Namibia gushyiraho inganda zitunganya uranium n’andi mabuye y’agaciro aho kuyohereza hanze adatunganyijwe.
Afurika y’Epfo na yo iri mu bihugu bifite akamaro gakomeye muri aya marushanwa kubera ububiko bunini bwa manganese ikoreshwa mu gukora batiri ndetse n’andi mabuye y’agaciro y’ingenzi.
Raporo zitandukanye zigaragaza ko amasosiyete y’Abashinwa akomeje kwagura ibikorwa byayo muri iki gihugu mu rwego rwo kwigarurira urwego rw’ibikoresho bikenerwa mu nganda z’imodoka z’amashanyarazi.
Abasesenguzi bavuga ko Afurika iri kugenda iba ikibuga gikomeye cy’ihangana ry’ubukungu hagati y’ibihugu bikomeye. Mu gihe u Bushinwa bumaze imyaka myinshi bwiganje muri uru rwego, ibihugu byo mu Burayi na Amerika na byo biri gushora imari nyinshi mu kubaka imihanda, gari ya moshi n’inganda zizabafasha kubona ayo mabuye y’agaciro bitabagoye.
Icyakora, ibihugu bya Afurika biragenda byifuza ko ayo mabuye atazongera koherezwa hanze ari ibikoresho bidatunganyijwe. Namibia ni kimwe mu byatangiye gushyiraho amategeko asaba ko igice cy’ayo mabuye gitunganyirizwa imbere mu gihugu kugira ngo abaturage baho babone imirimo kandi igihugu cyunguke byinshi kurushaho.
Mu gihe icyifuzo cy’isi ku mabuye y’agaciro gikomeje kwiyongera, biragaragara ko Namibia, Niger na Afurika y’Epfo bizakomeza kuba ku isonga mu bihugu Afurika ifite byitezweho kugira uruhare rukomeye mu bukungu bw’isi mu myaka iri imbere.