Uyu muco watangijwe na Shyam Sundar Paliwal wahoze ayobora uyu mudugudu, nyuma y’uko umukobwa we Kiran yitabye Imana muri 2007.
Yafashe icyemezo cyo guhindura agahinda yatewe no kubura umukobwa we igikorwa gifitiye akamaro ibidukikije, ariko kinashishikariza abaturage guha agaciro abana b’abakobwa.
Twifashishije amakuru yatangajwe n’ibitangazamakuru birimo The Guardian na India Today, ndetse n’amakuru ajyanye n’umushinga wa Piplantri, kugira ngo tumenye inkomoko y’uyu muco, impamvu watangijwe n’uko uhuza kurengera ibidukikije no guteza imbere imibereho y’abakobwa.
Abaturage ntibagarukira gusa ku gutera ingemwe, ahubwo baranazikurikirana kugira ngo zikure. Ibi bituma gukura kw’ibiti kugereranywa n’uko abakobwa bakura, bikagaragaza isano iri hagati yo kubungabunga ibidukikije no kwita ku bana b’abakobwa.
Uyu muco ugaragarira no mu birori bya Raksha Bandhan, aho abagore bo muri uyu mudugudu bahambira rakhis ku biti.
Iyi ni imigozi ikoreshwa mu muco w’Abahindu mu kugaragaza urukundo n’ubuvandimwe. Muri Piplantri, iki gikorwa kinibutsa abaturage ko ibiti bikwiye kurindwa no kwitabwaho.
Uretse kurengera ibidukikije, uyu mushinga unagamije gufasha abakobwa kugira umutekano n’ubwigenge ku mutungo n’amafaranga azabafasha mu gihe kizaza.
Binyuze muri gahunda yitwa Kiran Nidhi Yojana, imiryango n’abaturage bakusanya amafaranga agashyirwa ku ruhande kugira ngo azafashe umukobwa mu bihe bizaza.
Iyi gahunda kandi ijyana n’imihigo yo kwigisha abakobwa no kurwanya kubashyingira bakiri bato. Intego ni ukubafasha kubona amahirwe yo kwiga no kwitegura ubuzima bwabo bw’ahazaza.
Umuco wa Piplantri ugaragaza uko igikorwa cyo gutera ibiti gishobora kurenga kurengera ibidukikije, kikagira uruhare mu guhindura imyumvire ku gaciro k’abana b’abakobwa.
Binyuze muri iyi gahunda, abaturage bahuza kubungabunga ibidukikije no gushyigikira abakobwa, kugira ngo bakurire mu muryango ubaha agaciro kandi utekereza ku hazaza habo.