Monzer Ali yijeje impinduka zikomeye muri MTN Rwanda

Monzer Ali azanye ubunararibonye bukomeye mu rwego rw’itumanaho, aho amaze imyaka 24 akorera muri uru rwego, harimo 21 amaze mu muryango mugari wa MTN Group. Ubumenyi bwe buhambaye mu ikoranabuhanga ryihuta, hamwe n’icyerekezo kireba kure, bimushyira mu mwanya mwiza wo gukomeza icyerekezo MTN Rwanda yamaze gutangira, mu guhindura ubuzima bw’Abanyarwanda binyuze mu ikoranabuhanga rifasha buri wese.

Yasimbuye Mapula Bodibe, wayoboye iyi Sosiyete mu bihe by’amavugurura n’intambwe zifatika. Mu nama rusange yo kumwakira, Mapula yashimye ubwitange n’umurava by’abakozi, anasiga ubutumwa bwuzuye icyizere ku buyobozi bwa Monzer, avuga ko asize MTN Rwanda mu maboko meza kandi akomeye.

Mu ijambo rye rya mbere nk’Umuyobozi Mukuru, Monzer yagaragaje uburyo yahumurijwe n’uburyo u Rwanda rwashyize imbere ikoranabuhanga nk’imwe mu nkingi z’iterambere. Yatangaje ko MTN Rwanda igiye kurushaho kuba umufatanyabikorwa w’igihugu mu rugendo rwo guhindura ubuzima bw’abaturage, hifashishijwe ikoranabuhanga rigezweho. Yashimiye Mapula kubera umurage ushingiye ku ndangagaciro, ubushishozi n’imiyoborere ishyira imbere abaturage byamuranze mu buyobozi bwe.

Icyerekezo gishingiye ku mahame atatu: Korohereza buri wese, guhanga udushya no kurengera ibidukikije

Monzer yinjiranye muri MTN Rwanda icyerekezo cyubakiye ku nkingi eshatu: korohereza buri wese kugera kuri serivisi z’ikoranabuhanga, guteza imbere udushya no gushyira imbere iterambere rirambye rirengera ibidukikije.

Ashyize imbere gahunda yo kugeza ikoranabuhanga ku Munyarwanda wese, hatitawe ku mibereho ye cyangwa aho atuye. Ibi birimo kwihutisha itangwa rya telefoni zigezweho ku giciro giciriritse, kwagura serivisi z’imari kuri telefoni (Mobile Money), no gukuraho inzitizi zibangamira Abanyarwanda kwinjira mu isi y’ikoranabuhanga.

Abinyujije mu bufatanye na Chantal Kagame, Umuyobozi wa Mobile Money Rwanda Ltd (MMRL), Monzer yatangaje ko agiye gushyira imbaraga mu kugera ku ntego yo gukomeza kwagura uburyo Abanyarwanda bakoresha serivisi z’imari mu buryo butekanye, bworoshye kandi bushyigikira iterambere ry’imibereho yabo ya buri munsi.

Kwagura 4G+ no gutegura ahazaza ha 5G

Mu by’ingenzi bigize icyerekezo gishya cya Monzer harimo kwagura ikwirakwizwa rya interineti yihuta ya 4G+ mu gihugu hose, hagamijwe ko buri Munyarwanda agira amahirwe yo kugera ku ikoranabuhanga ryihuse kandi ryizewe. MTN Rwanda izanakomeza gutegura uburyo buhamye bwo kwinjira mu isoko rya 5G, rizafasha u Rwanda mu iterambere ry’uburezi, ubuzima, ubucuruzi ndetse no mu gushishikariza urubyiruko guhanga imirimo ishingiye ku ikoranabuhanga.

Iterambere rirambye rirengera ibidukikije

Monzer yagaragaje ko impinduka ziganisha ku iterambere zitagomba kwirengagiza ibidukikije. Yatangaje gahunda yihariye MTN Rwanda izashyira mu bikorwa harimo gukoresha imodoka zikoresha amashanyarazi n’udushya twose two kugabanya ikoreshwa ry’ingufu zangiza ikirere. Hazanashyirwa imbaraga mu bikorwa byo kongera amashyamba, hagamijwe kugabanya imyuka ihumanya ikirere no gushyigikira imiterere kamere y’igihugu.

Serivisi zigiye kurushaho kunoga, abakiliya ku isonga

Monzer avuga ko serivisi zigenewe abakiliya zigiye kuvugururwa mu buryo bushya butuma umuturage agira uruhare runini mu buryo ahabwa serivisi. MTN Rwanda irimo gushyira imbere urubuga rwa interineti rworohereza abakiliya kwikorera serivisi (self-service portals), kuvugurura uburyo bwo kwakira no guha serivisi abakiliya ku mashami, ndetse no kunoza imikoreshereze y’imbuga z’ikoranabuhanga zayo. Ibi byose bigamije gukuraho imbogamizi mu guhabwa serivisi, no gushyira umukiliya ku isonga y’ibikorwa byose.