Miliyoni 62$ zatanzwe mu kwimura impunzi z’Abanyasomaliya muri Amerika zikomeje guteza impaka

Ayo mashyirahamwe yagize uruhare mu kwakira no gufasha impunzi zaturutse mu bihugu bitandukanye mu gihe cy’imyaka myinshi, ndetse ko kuva mu 1993 amaze gufasha Abanyasomaliya bagera kuri 29,000 kwimukira muri Minnesota.

Uko Minnesota yabaye indiri y’impunzi

Minnesota, imwe muri Leta Zunze Ubumwe za Amerika, yabanje kumenyekana nk’ahantu hahurira Abahmong, ubwoko bukomoka mu Majyepfo y’Uburasirazuba bwa Aziya.

Mu myaka ya za 1970, Leta Zunze Ubumwe za Amerika zatangiye gahunda yo kwakira Abahmong bahungaga amakimbirane yo muri Laos, aho bamwe bari barafashije Urwego rw’Ubutasi rwa Amerika, CIA, kurwanya imitwe y’Abakomunisiti.

Walter Mondale, wari Visi Perezida wa Leta Zunze Ubumwe za Amerika ku butegetsi bwa Jimmy Carter, n’uwari Guverineri wa Minnesota, Al Quie, bagize uruhare mu gushyigikira gahunda yo kwakira izo mpunzi.

Amashyirahamwe ya Catholic Charities na Lutheran Social Services yari asanzwe afite ubunararibonye mu gufasha abantu bavanywe mu byabo n’intambara mu Burayi kuva mu gihe cy’Intambara ya Kabiri y’Isi, bituma Leta iyegera kugira ngo afashe muri gahunda zo kwakira impunzi.

Miliyoni 62 z’amadolari zakoreshejwe iki?

Nk’uko ikinyamakuru New York Post cyabitangaje, ayo mashyirahamwe yakiriye amafaranga ya Leta agamije gufasha impunzi kubona ibikenerwa mu ntangiriro z’ubuzima bushya, birimo ibiribwa, aho kuba ndetse n’abakozi babafasha kumenyera ubuzima bushya.

Iki kinyamakuru cyavuze ko kuva mu 1993, ayo mashyirahamwe yagiye afasha Abanyasomaliya bagera ku 29,000 kwimukira muri Minnesota, buri mpunzi ikabarirwa amafaranga agera ku madolari 2,500 yo kwishyura serivisi zitandukanye.

Parker Thayer, impuguke mu by’abimukira ukorera mu kigo Capital Research Center i Washington, yabwiye icyo kinyamakuru ko amafaranga Leta itanga mu bikorwa byo kwimura no kwakira impunzi muri Minneapolis ari menshi cyane, ndetse ko yose hamwe ashobora kugera kuri miliyoni amagana y’amadolari.

Yavuze kandi ko kuva muri 2021, Ihuriro ry’Abepiskopi Gatolika muri Amerika ryakiriye amasezerano ya Leta yo gufasha abimukira afite agaciro ka miliyoni 140 z’amadolari.

Icyakora, ayo mafaranga yose ntasobanura ko ari inyungu ayo mashyirahamwe yakuye muri iyi gahunda, kuko amasezerano agenewe kwishyura ibikorwa na serivisi zitandukanye.

Umubare w’Abanyasomaliya muri Minnesota warazamutse

Nyuma y’uko intambara y’abenegihugu itangiye muri Somalia mu myaka ya za 1990, Leta Zunze Ubumwe za Amerika zatangiye kwakira impunzi z’icyo gihugu. Minnesota yari isanzwe ifite uburyo bwo kwakira impunzi, bituma iba himwe mu hantu benshi bimukira.

Nk’uko inkuru ya New York Post ibivuga, kuri ubu Abanyasomaliya baba muri Minnesota barenga 100,000. Ibi byatewe n’impunzi zahageze, abandi bimukirayo baturutse mu zindi Leta, ndetse na gahunda yo guhurizayo imiryango.

Parker Thayer yavuze ko gahunda z’ubufasha bw’imibereho muri Minnesota na zo zashishikarije bamwe mu Banyasomaliya kwimukira muri iyo Leta, nubwo bari barabanje gutuzwa ahandi muri Amerika.

Impaka ku bufasha bw’impunzi n’imikoreshereze y’amafaranga ya Leta

Inkuru ya New York Post yagarutse kandi ku mpaka zijyanye na gahunda zo kwakira impunzi muri Amerika, cyane cyane nyuma y’iperereza ku buriganya mu mafaranga ya Leta yagenewe ibikorwa by’imibereho muri Minnesota.

Mu mwaka ushize hagaragaye ibirego by’uburiganya bushobora kugera kuri miliyari icyenda z’amadolari.

Umuvugizi wa Catholic Charities Twin Cities yabwiye New York Post ko iryo shyirahamwe ryahagaritse gahunda zarwo zo gufasha impunzi n’abimukira muri 2018. Lutheran Social Services of Minnesota yo ntiyugeze igira icyo ivuga kuri iyo nkuru.