Ni icyemezo cyafashwe nyuma y'uko urukiko rusanze Meta, ifite Facebook, Instagram, WhatsApp na Threads, yaragize uruhare mu guteza abana n'ingimbi ibibazo bitandukanye, ariko ntifate ingamba zihagije zo kubarinda.
Umucamanza Bryan Biedscheid yavuze ko ibikorwa bya Meta byabaye ikibazo gikomeye ku baturage, bityo igomba kugira uruhare mu gukemura ingaruka zabyo.
Aya mafaranga yiyongera ku yandi miliyoni 375 z'amadolari Meta yari yaraciwe mbere muri uru rubanza, bivuze ko amafaranga yose isabwa kwishyura ageze kuri miliyoni 942 z'amadolari.
Urukiko rwanategetse Meta kuvugurura uburyo imbuga zayo zikora ku bakoresha bato, harimo gushyiraho amabwiriza akomeye yo kubarinda, kugabanya uburyo bakoresha izo mbuga, kugenzura neza imyaka y'abazikoresha no gukaza ingamba zo kubuza abantu bakuru kwegera abana babinyujije ku mbuga nkoranyambaga. Hari kandi amabwiriza mashya agenga uburyo AI chatbots zayo zikorana n'abana.
Umushinjacyaha Mukuru wa New Mexico, Raúl Torrez, yavuze ko iki cyemezo gishobora kubera urugero izindi leta n'ibindi bihugu bishaka kubaza ibigo by'ikoranabuhanga inshingano zabyo mu kurinda abana.
Ku ruhande rwayo, Meta yatangaje ko itemeranya n'icyemezo cy'urukiko, ivuga ko kimenyekanisha nabi ibyo yakoze mu rwego rwo kurinda urubyiruko, kandi ko igiye kujuririra iki cyemezo.