Mu kiganiro yagiranye n’itangazamakuru kuri iki Cyumweru
tariki ya 9 Ugushyingo 2025, Kitoko yemeje ko Meddy yashinze urusengero rukorera ‘online’,
rukora ivugabutumwa buri wa Gatandatu, kandi ko ari umwe mu baryitabira kenshi.
Ati: “Meddy yari asanzwe ari umuntu usenga, yari atarerura
ngo avuge ngo ndakijijwe, ariko nkanjye twabaga turi kumwe yari umurokore. Ubu
ni umugabo ufite umuryango mwiza. Ikirenzeho, afite urusengero rukorera kuri
murandasi, turasenga buri wa Gatandatu.”
Kitoko avuga ko we na Meddy ari inshuti kuva bakiri mu
rugendo rwo kwiyubaka mu muziki. Bamenyanye Meddy akiri umuhanzi ukizamuka
afite indirimbo “Amayobera.”
Ati: “Twahuriye i Butare duhita tujya mu bintu byinshi
ntashobora kuvugira hano. Ariko twajyanye no kuririmbira muri Afurika y’Epfo mu
gikombe cy’Isi, icyo gihe badutoyemo, turagenda bituma turushaho kumenyana.”
Kuva icyo gihe, ngo bakomeje kugirana ubucuti bwihariye — aho
mu bihe bitandukanye Kitoko yagiye gusura Meddy muri Leta Zunze Ubumwe za
Amerika, nawe akamugenderera mu Bwongereza.
Ati: “Umbajije mu bantu twakoranye indirimbo nagarura Meddy.
Meddy ni inshuti yanjye kurusha uko turi abahanzi, tuvugana hafi buri cyumweru.
Nziko bitakoroha, ariko agarutse twakora igitaramo cyiza.”
Kitoko yagarutse gutura mu Rwanda nyuma y’imyaka 12 abarizwa mu
Bwongereza, aho yari yaragiye mu bikorwa by’ubuzima busanzwe n’umuziki ariko
atakiboneka cyane mu ruhando rw’iwabo.
Yageze i Kigali ku Cyumweru tariki ya 9 Ugushyingo 2025, avuga
ko mu by’ibanze yitegura gukora harimo gushaka ibikorwa azitaho, no kwitegura
igitaramo azahuriramo na Davido kizabera muri BK Arena tariki ya 15 Ukuboza 2025,
cyatewe inkunga na Skol.
Ati: “Ntabwo nigeze ngira amahirwe yo gusabana n’abafana
banjye cyane, iyo nayo ni impamvu yatuma ntaha. Hanze ni heza bitewe n’icyo
ugiye kurebayo, ariko iyo ugiye gusa kuko abandi bagiye birakurangaza. Nanjye
kuba nje hano nzi ibinzanye. Sinagize amahirwe yo gukora umuziki neza, n’ubwo
habaye amahirwe yo kumenyekana byihuse.”
Mu myaka amaze mu Bwongereza, Kitoko yavuze ko yabonye abantu
baho bafata umwuga nk’umwuga nyawo — bakawushyiramo umurava n’ubushishozi,
bitandukanye n’uko yabonye umuziki ukorwa mu Rwanda.
Kuva yagarutse, Kitoko yavuze ko yiteguye gutangira ibindi
bikorwa bigaragaza urugendo rwe rushya, harimo n’indirimbo nshya ndetse
n’ibitaramo bizatuma yongera kuganira n’abafana be ku mugaragaro.
Kitoko Bibarwa ubwo yageraga ku kibuga cy’indege Mpuzamahanga
cya Kigali nyuma y’imyaka 12 yari amaze mu Bwongereza
Umuhanzi Mpuzamahanga Kitoko Bibarwa yatangaje ko inshuti ye
Meddy yashinze urusengero rukorera kuri murandasi
Kitoko yavuze ko ari umwe mu bakurikirana ivugabutumwa rya
Meddy ribera 'Online' buri wa Gatandatu
Kitoko yagaragaje ko Meddy ari inshuti ye y’ukuri, bahujwe
n’umuziki kuva ku ndirimbo “Amayobera"
Kitoko yavuze ko yiteguye kongera gusabana n’abakunzi be mu gitaramo azahuriramo na Davido tariki ya 15 Ukuboza 2025 muri BK Arena
Kitoko mu kiganiro n’itangazamakuru kuri iki Cyumweru tariki ya 9 Ugushyingo 2025