Uyu mushinga uri gutegurwa na Green Sky Capital, ikigo gishora imari mu mishinga y’ingufu zisukuye gikorera muri Qatar, gifite abanyamigabane barimo Al Mana Holding na Vision Invest.
Nk’uko amakuru yatangajwe na Banki y’u Burayi ishinzwe Kwiyubaka n’Iterambere (EBRD) abigaragaza, uru ruganda ruzubakwa mu gace ka Bétoya kagenewe inganda n’ibikorwa by’ubwikorezi, muri Nador West Med, mu Ntara ya Nador iherereye mu majyaruguru ashyira uburasirazuba bwa Maroc.
Uyu mushinga uracyari mu cyiciro cyo gusuzumwa, bityo amafaranga ateganyijwe gukoreshwa n’igihe nyakuri cyo gutangira gukora bikaba bitaremezwa burundu.
Inkuru dukesha ikinyamakuru Business Insider Africa ivuga ko, biteganyijwe ko uru ruganda ruzajya rutunganya hagati ya toni 176,000 na 200,000 z'amavuta y’indege buri mwaka.
Aya mavuta azwi mu Cyongereza nka Sustainable Aviation Fuel (SAF), akorwa hifashishijwe ibikoresho bitandukanye birimo amavuta yakoreshejwe mu guteka, ibinure by’amatungo n’ibisigazwa biva mu nganda zitunganya ibiribwa n’amavuta aribwa.
Mu gihe amavuta yakoreshejwe mu guteka asanzwe afatwa nk’imyanda, uyu mushinga ugamije kuyabyaza umusaruro, akifashishwa mu gukora ingufu zishobora gusimbura igice cya lisansi isanzwe ikorwa muri peteroli.
Uru ruganda ruzakoresha ikoranabuhanga rya Vegan HEFA ryazanywe n’ikigo Axens. Iri koranabuhanga rifasha guhindura amavuta n’ibinure mo lisansi y’indege n’ibindi bicuruzwa bikomoka ku ngufu zisubira.
Uru ruganda ruzajya runatanga mazutu ikomoka ku bikoresho fatizo bisubirwamo, naphtha ikoreshwa mu nganda zitandukanye ndetse n’ingano nto ya bio-propane.
Kugira ngo rukore ku rwego ruteganyijwe, uru ruganda ruzakenera toni zigera ku 200,000 z’amavuta n’ibindi binure buri mwaka. Bimwe muri ibyo bikoresho bizajya bikusanywa muri Maroc, cyane cyane amavuta yakoreshejwe mu guteka, mu gihe ibindi bizatumizwa mu mahanga.
Mu bizatumizwa harimo amavuta yakoreshejwe mu guteka n’ibisigazwa biva mu gutunganya amavuta aribwa. nAmavuta n’ibindi bikoresho bizakusanywa imbere mu gihugu bizajya bitwarwa n’amakamyo yabugenewe, mu gihe ibizava mu mahanga bizanyuzwa ku cyambu cya Nador West Med.
Kugira ngo uru ruganda rukomeze gukora mu buryo buhoraho, ruzakenera uburyo bwizewe bwo kubona ibyo bikoresho fatizo, kuko umusaruro warwo uzaterwa n’ingano y’amavuta n’ibindi binure bizajya biboneka.
Ku bijyanye n’inkunga y’amafaranga, EBRD irimo gusuzuma icyifuzo cyo gutanga inguzanyo ingana na miliyoni 105 z’amadolari yo gufasha kubaka no gutangiza uru ruganda.
Muri ayo mafaranga, miliyoni 85 z’amadolari ni yo ateganyijwe nk’igice cy’inguzanyo cyemewe gutangwa, mu gihe andi miliyoni 20 y’amadolari ateganyijwe gutangwa ariko ataremezwa burundu.
Biteganyijwe kandi ko muri iyo nkunga, amafaranga agera kuri miliyoni 20 z’amadolari ashobora guturuka mu Kigega Mpuzamahanga cy’Ikirere (Green Climate Fund), binyuze muri gahunda igamije gufasha ibigo byigenga bishora imari mu mishinga yo kugabanya imyuka ihumanya ikirere.
Umushinga ushobora kandi kungukira muri gahunda y’Umuryango w’Ubumwe bw’u Burayi yo kugabanya igitutu n’umutwaro ku bashoramari.
Abarenga kuri 050 bazabona amahirwe y’akazi
Uyu mushinga uteganyijwe gutanga amahirwe y’akazi mu gihe cyo kubaka no mu gihe uruganda ruzaba rwatangiye gukora.
Mu gihe imirimo yo kubaka izaba igeze ku rwego rwo hejuru, hazakenerwa abakozi bagera kuri 400. Nyuma yo gutangira gukora, biteganyijwe ko uruganda ruzakoresha abakozi bagera kuri 162.
Abakozi bazaturuka hanze y’ako gace bazacumbikirwa mu mijyi n’uduce tuyikikije, turimo Nador, Selouane na Beni Ensar, kuko nta macumbi y’abakozi ateganyijwe kubakwa ku ruganda.
Umushinga uteganyijwe kumara hafi amezi 22 kuva amasezerano yo kubaka atanzwe kugeza uruganda rutangiye gukora. Gahunda yatangajwe igaragaza ko amasezerano ateganyijwe mu Kwakira 2026, naho uruganda rukazatangira gukora muri Kanama 2028, mu gihe ibyo byiciro byose byagenda uko byateganyijwe.
Uyu mushinga uje mu gihe ibihugu n’ibigo bikora ubwikorezi bwo mu kirere bikomeje gushaka uburyo bwo kugabanya imyuka ihumanya ikirere ituruka mu ndege.
Uru ruganda nirurangira kandi rugatangira gukora, rushobora kuzagira uruhare mu guteza imbere inganda zikora ingufu zisubira muri Maroc, guteza imbere ikoreshwa ry’imyanda mu gukora ibindi bicuruzwa no guhanga imirimo mishya.
Biteganyijwe ko lisansi izakorwa muri uru ruganda ishobora kuzakoreshwa mu ndege zisanzwe, mu gihe ibindi bicuruzwa bizajya bivamo bishobora kugurishwa ku masoko yo hanze n’imbere mu gihugu.