Loader yavuze uko yakiriye kuba Producer wihariye wa Bruce Melod

Uyu musore wanyuze muri studio ya Jiva Records mbere y’uko atangira kwikorera, yabwiye InyaRwanda, ko amasezerano yagiranye na 1:55 AM, ari nayo yagejeje mu kuba Producer wihariye na Bruce Melodie, ariko kandi hari byinshi bizatangazwa mu gihe kiri imbere.

Ati “Ntabwo haciyeho igihe kinini, ariko n'ubundi muragenda mubimenya uko igihe kigenda baragenda babitangaza."

Kuba Bruce Melodie yamuhisemo nka Producer we wihariye, Loader yabibonye nk’ibintu byiza kandi by’agaciro gakomeye. Yagize ati “Ni byiza cyane, ni ibintu byiza nyine gukorana nawe. Kandi n'iby'igiciro kinini kuri njye."

Yakomeje ashimangira ko gukorana na Bruce Melodie bimufasha kwagura ubumenyi no kunguka byinshi mu mwuga we kuko uyu muhanzi afite impano idasanzwe. Yagize ati "Kubera ko ari umuhanzi w'umuhanga, iyo muri gukora wunguka byinshi nyine, ikindi nyine tuba duhari kugirango twige."

Loader yanavuze ko Bruce Melodie yamwise “Nyirubugenge” bitewe n’ubuhanga bwe mu guhanga indirimbo. Yavuze ko iri zina ryamushimishije cyane kuko ryerekana ko ibyo akora bikora ku mutima wa Bruce Melodie.

Ati “Izina narihawe na Bruce Melodie. Buriya Bruce Melodie ni umuhanga cyane mu kurema ibintu bishya, rero akantu ka Bruce ntikabura, byaraje arambwira ati ‘wowe uri nyirubugenge,’ nyine yakozwe ku mutima n'ibyo nkora, aravuga ati ‘wowe uri nyirubugenge,’ kandi wumva ni byiza."

Uyu Producer kandi yatangaje ko afite umushinga w’indirimbo ari gutegura uzasohoka mu minsi iri imbere, ndetse ko hari n’ibindi byagiye bikorwa ku bufatanye n’umunyamakuru Adesope umaze iminsi ari mu Rwanda. Yagize ati: "Hari imishinga igiye gusohoka yagizeho uruhare."

Loader ashimangira ko gukorana na Bruce Melodie bitamuhaye gusa umwanya wo gukora umuziki w’umwihariko, ahubwo binamufasha kwiga byinshi no kwagura impano ye mu mwuga wa Producer.

Loader yigeze kubwira InyaRwanda, ko kwinjira mu bantunganya indirimbo z’abahanzi byaturutse ku rukundo akunda umuziki, no kuba Se yari umucuranzi ukomeye wa Gitari.

Ariko kandi yakuriye muri korali cyane byatumye ahura cyane n’ibyuma by’umuziki kenshi. Ati “Impamvu yatumye ninjira muri ‘Production’ ni uko Papa wanjye acuranga gitari, bityo byatumye nkura mbona ibicurangisho byinshi by’umuziki. Nakunze nkunda umuziki ariko nkumva nahitamo kuwutunganya cyane."

Loader ni Mubyara wa Producer Kiiiz. Ndetse, avuga ko batangiranye urugendo rw’umuziki n’ubwo Kiiiz yamamaye mbere ye, ariko kandi indirimbo nyinshi yamufashije gutunganya no kurangiza.