Ni igikorwa cyabaye kuwa Kane tariki 12 Kamena 2025 kibera ku Rwibutso rwa Jenoside rwa Kigali ruri ku Gisozi, kikaba cyitabiriwe n’abayobozi batandukanye muri izi Minisiteri, urubyiruko ririmo abahanzi, abakinnyi ndetse n’abandi bo muri ibyo byiciro byagarutsweho haruguru babuze ababo muri Jenoside yakorewe Abatutsi mu 1994.
Abayobozi, Urubyiruko, Abahanzi, Abakinnyi, Imiryango y'abakoraga muri MIJEUMA, n'abaje kwifatanya muri iki gikorwa babanje kunamira no gushyira indabo ku mva zishyinguyemo abarenga 250,000 bazize Jenoside yakorewe Abatutsi mu 1994.
Mu mpanuro Minisitiri w’Urubyiruko n’Iterambere ry’Ubuhanzi, Dr. Utumatwishima Jean Nepo Abdallah yatanze, yagaragaje ko "dukwiye kurangwa n'indangagaciro z’ubupfura, urugwiro, ubufatanye, ishyaka, umurava, gushyira imbere inyungu rusange, ubumwe, kwanga ikibi no kucyamagana, kutironda no guharanira amahoro byarangaga abo twibuka none."
Minisitiri Dr. Utumatwishima kandi yasabye urubyiruko, abahanzi n’abakinnyi gukoresha neza impano zabo, binyuze mu majwi, amashusho, inyandiko, impano zitandukanye mu mikino na siporo, ubumenyi mw’ikoranabuhanga n’ibindi; bamagana ibinyoma by’abavuga nabi u Rwanda.
Minisitiri w’Ubumwe bw’Abanyarwanda n’Inshingano Mboneragihugu Dr. Jean Damascène Bizimana, we yahaye umukoro abitabiriye iki gikorwa, wo kwigira ku mateka u Rwanda rwanyuzemo bagaharanira kubaka u Rwanda ruzira amacakubiri.
Yagize ati: ”Aya mateka ni amateka yabayeho ariko anatubere amasomo adufasha kumenya aho twavuye, tuzirikana ko dufite Igihugu cyiza kiyobowe neza, gifite Umukuru w’Igihugu, Nyakubahwa Kagame Paul, ureberera Abanyarwanda bose nta vangura. Buri wese mu rwego rwe kuva kuri Minisitiri, utwara imodoka, ukora isuku, aharanire kugira uruhare mu guhindura aya mateka, dukomeze kugira Igihugu cyiza kizira amacakubiri, ivangura, n’ingengabitekerezo ya Jenoside.”
Minisitiri wa Siporo Nelly Mukazayire nawe witabiriye iki gikorwa, we yibukije urubyiruko ko ari bo mutima n’ubwonko bw’ejo hazaza, bityo ko rukwiye gukomeza guharanira ubumwe n'ubudaheranwa. Ati: ”Rubyiruko rwacu nimwe mutima n’ubwonko bw’ejo hazaza. Mukwiye kumenya ko mufite uruhare runini mu guharanira ko ibyo twubaka cyangwa tuvuga buri munsi binyuze mu mikino umuco n’ubuhanzi, bizaba inkingi ikomeye y’igihugu kizira amacakubiri n’urwango n’ivangura.”
REBA MU MASHUSHO UKO IKI GIKORWA CYAGENZE
Minisitiri Utumatwishima ari mu bitabiriye iki gikorwa
Minisitiri wa Siporo Nelly Mukazayire nawe yitabiriye iki gikorwa
Minisitiri w'Ubumwe bw'Abanyarwanda n'Inshingano Mboneragihugu, Dr Damascene Bizima nawe yitabiriye iki gikorwa
Ni igikorwa cyitabiriwe n'ingeri zitandukanye
