Uyu myugariro w’Umunya-Brazil yabibwiye
abanyamakuru i Munich ati: "Ikipe yagiye yigira ku byo yanyuzemo uko imyaka
yagiye ihita, ubu izi uko yitwara mu mikino nk’iyi n’ibikenewe,"
"Hari byinshi byahindutse muri PSG kuva nagera hano. Twagize ibihe byiza n’ibindi bigoye, ariko dufite amahirwe akomeye yo gukora igikorwa cy’igitangaza no kwandika amateka akomeye kuri iyi kipe. Ni ubwa kabiri ngeze ku mukino wa nyuma wa Champions League, kandi sinshaka ko aya mahirwe aducika."
PSG irakina umukino wa nyuma wa Champions League ku nshuro ya kabiri, imyaka itanu nyuma yo gutsindwa na Bayern Munich i Lisbon mu mukino wabaye nta bafana bitewe n’icyorezo cya COVID-19.
Marquinhos, ubu ufite imyaka 31 akaba ari we mukinnyi umaze igihe kinini mu ikipe y’ubu ya PSG, ni umwe mu bakinnyi babiri gusa bagikina muri iyi kipe bakinnye uwo mukino wa nyuma mu 2020, hamwe na Presnel Kimpembe, ariko uyu akaba atakibona umwanya uhagije.
Yageze muri PSG mu 2013, kandi yagiye anyura mu bihe bikomeye birimo no gutsindwa nabi kwatangaje benshi, nk’uko byagenze mu 2017 ubwo batsindaga Barcelona ibitego 4-0 mu mukino ubanza, ariko bakaza gutsindwa 6-1 mu mukino wo kwishyura.
Luis Enrique, wari umutoza wa Barcelona icyo gihe, ni we utoza PSG muri iki gihe, akaba ayoboye ikipe igizwe n’abasore bakiri bato bafite imbaraga n’ubuhanga.
Marquinhos yakomeje agira ati: "Dufite umutoza udasanzwe watwiteguriye neza. Nubwo turi ikipe igizwe n’abakinnyi bato, biragaragara ko twiteguye gukina imikino nk’iyi, Ibi byose ni uruvangitirane rw’ibintu byinshi byahujwe. Uko ikipe yakuze, uko dufite umutoza ukomeye, abakinnyi b’abahanga bongewemo. Ni yo mpamvu turi hano uyu munsi."
Umwaka ushize PSG yasezerewe muri 1/2 mbere y’uko Kylian Mbappe ajya muri Real Madrid, ariko nubwo batakimufite, batwaye shampiyona y’u Bufaransa n’igikombe cy’igihugu, ndetse banasezereye amakipe atatu yo mu Bwongereza: Liverpool, Aston Villa na Arsenal kugira ngo bagere ku mukino wa nyuma.
PSG irakina na Inter Milan ku mukino wa nyuma wa UEFA Champions League