Ubushakashatsi bwatangajwe na The Conversation bugaragaza ko umuco wo gusoma ibitabo birebire ugenda ugabanuka muri Amerika, haba mu mashuri yisumbuye ndetse no muri za kaminuza.
Imibare yerekana ko mu 2024, abantu bakuru basomye nibura igitabo kimwe mu mwaka bari 49%, mu gihe mu myaka 10 mbere bari hafi 55%. No mu mashuri yisumbuye, abarimu bavuga ko umubare w'ibitabo basaba abanyeshuri gusoma ugenda ugabanuka.
Ubushakashatsi bwerekanye ko abarimu b'Icyongereza mu mashuri yisumbuye basigaye basaba abanyeshuri gusoma impuzandengo y'ibitabo bitarenze bitatu ku mwaka, mu gihe mbere wasangaga basoma nibura bine cyangwa birenga. Hari n'aho abanyeshuri basoma ibice by'ibitabo gusa aho gusoma igitabo cyose.
Abarimu bo muri za kaminuza bavuga ko ibi byatumye abanyeshuri benshi baza badafite ubushobozi bwo gusoma inyandiko ndende cyangwa gukurikira igitekerezo kuva gitangiye kugeza kirangiye.
Abashakashatsi bavuga ko gusoma ibitabo byose bifasha ubwonko kubaka ubushobozi bwo gutekereza byimbitse, gukurikirana ibitekerezo no gusesengura amakuru. Iyo abanyeshuri bamenyereye gusoma gusa incamake cyangwa ibice by'ibitabo, bishobora kubagora gusobanukirwa amasomo yo muri kaminuza.
Hari bamwe mu barimu batangiye kugabanya ingano y'amasomo baha abanyeshuri kugira ngo babashe kuyakurikirana, ariko abandi bavuga ko igisubizo atari ukugabanya ibyo basoma, ahubwo ari ukubafasha kongera gukunda no kumva akamaro ko gusoma ibitabo byose.
Abahanga bemeza ko gusoma igitabo cyose bitandukanye cyane no gusoma incamake cyangwa kureba videwo isobanura igitabo. Basaba amashuri kongera gushishikariza abanyeshuri gusoma ibitabo byuzuye kugira ngo bongere ubushobozi bwo gutekereza no gusesengura.
Nubwo ikoranabuhanga ryatumye kubona amakuru byoroha, abahanga bavuga ko ridashobora gusimbura akamaro ko gusoma igitabo cyose. Bemeza ko kongera umuco wo gusoma ari imwe mu nzira zafasha abanyeshuri gutsinda neza no kubaka ubushobozi bwo gutekereza bwimbitse.
Source: The Conversation – College professors face an emerging challenge: We know students are no longer reading entire books (23 Nyakanga 2026).