Nyuma y'uko ikipe ya Real Madrid isezerewe na Arsenal mu mikino ya 1/4 cya UEFA Champions League, ibinyamakuru bitandukanye bikomeje kwandika ko Carlo Ancelotti atazakomezanya n'iyi kipe yo muri Espagne.
Ku munsi w'ejo ubwo uyu mutoza ikipe atoza yari imaze gusezererwa yavuze ko uyu mukino wa Arsenal ushobora kuba ari uwe wa nyuma wa UEFA Champions League ndetse ko atazi icyo ahazaza he muri Real Madrid hahishe.
Ati: "Umukino wanjye wa nyuma wa Champions League? Muri uyu mwaka w'imikino?, Yego. Twagize ibihe bitangaje mu myaka yashize. Reka turebe uko bizagenda mu mwaka utaha. Sinzi ibizaba kandi sinshaka kubimenya. Hariho igihe cyibyo".
Mbere y'uko umukino uba nabwo Ancelotti yari yabajijwe ikibazo nkiki kerebana nahazaza he muri Real Madrid ayo yagisubije agira ati"Bishobora kubaho, mu ikipe yiyemeje impinduka. Nta kibazo namba: umunsi naba ndangije kuba hano, nakora ikintu kimwe gusa, gushimira ikipe. Niba amasezerano yanjye arangiye cyangwa atarangiye, simbyitayeho. ”
Umwe mu batoza bahabwa amahirwe yo kumusimbura ni Jurgen Klopp kuri ubu ufite inshingano zo kuba umuyobozi w'amakipe ya Red Bull gusa ntabwo azishimiye. Uyu mutoza ngo yiteguye kwinjira mu biganiro byo yatoza Real Madrid guhera mu mpeshyi y'uyu mwaka.
Jurgen Klopp w'imyaka 57 wanabayeho umukinnyi, yatangiye gutoza mu 2001 ahereye mu ikipe ya FSV Mainz 05 y'iwabo, ayivamo muri 2005 ajya muri Borussia Dortmund nayo ayivamo mu mwaka wa 2015 ajya muri Liverpool ari naho yakoreye amateka arimo gutwara igikombe cya shampiyona na UEFA Champions League. Yasezeye muri Liverpool mu mwaka ushize w'imikino avuga ko agiye kuba afashe ikiruhuko mu bijyanye no gutoza.