Kugeza ku wa 16 Kamena 2026, Rupert ni we muntu wa kabiri ukize kurusha abandi muri Afurika, aho akurikira umuherwe wo muri Nigeria, Aliko Dangote, ufite umutungo ubarirwa muri miliyari 36.6$.
Uku kuzamuka kwa Rupert kwamufashije gusiga undi muherwe wo muri Nigeria, Abdulsamad Rabiu, wari umaze igihe bahatanira umwanya wa kabiri mu bakire ba Afurika. Kuri ubu Rabiu abarirwa umutungo wa miliyari 17.5$ nyuma y'uko agaciro k'umutungo we kagabanutse mu byumweru bishize.
Mu munsi umwe gusa, umutungo wa Rupert wazamutseho miliyoni 261$, bituma inyungu amaze kubona kuva uyu mwaka watangira zigera kuri miliyoni 724$.
Mu minsi mike ishize, Rupert yari afite miliyari 19.9$, ibintu byari byatumye benshi bavuga ko ari hafi cyane kwinjira mu itsinda ry'abaherwe bafite miliyari 20$. Kuri ubu iyo ntego akaba yayigezeho, ndetse aza no ku mwanya wa 136 ku rutonde rw'abakize kurusha abandi ku Isi.
Ubwiyongere bw'umutungo wa Rupert bufitanye isano rya hafi n'intsinzi ikomeje kugaragazwa na sosiyete y'ibicuruzwa by'akataraboneka ya Richemont, igenzura ibirango bikomeye ku Isi birimo Cartier na Van Cleef & Arpels.
Muri Gicurasi 2026, Richemont yatangaje ko yagize izamuka rya 11% mu bicuruzwa yagurishije, amafaranga yinjije agera kuri miliyari 22.4 z'Ama-Euro.
Iri zamuka ryatewe ahanini n'ubwiyongere bw'abakiliya muri Amerika ndetse n'isubukurwa ry'isoko ry'u Bushinwa. Ibicuruzwa by'imitako by'ibirango bya Cartier na Van Cleef & Arpels byazamutseho 14%, birenga kure ibyo abasesenguzi bari biteze.
Agaciro ka Richemont ku isoko ry'imari na ko kakomeje kuzamuka, aho kuri ubu kegereye miliyari 117$, nyuma y'uko imigabane yayo yikubye inshuro zirenga eshatu mu myaka itanu ishize.
Mu kwezi kwa Kamena, Rupert yanongereye ibikorwa bye muri Afurika y'Epfo nyuma yo kwigarurira umushinga munini wa The Bridge Stellenbosch, umwe mu mishinga ikomeye ihuza ibikorwa by'ubucuruzi, imyubakire n'imiturire mu Ntara ya Western Cape.
Si ibyo gusa kandi, kuko yanahawe uburenganzira bwo kugura imigabane mu masezerano afatwa nk'ay'ingenzi cyane mu rwego rw'ubuvuzi muri Afurika y'Epfo, ibintu byamuhaye ijambo rikomeye mu muyoboro w'ibitaro birenga 50 bifite uburiri busaga 9,000.
Abasesenguzi bavuga ko niba ibikorwa bya Richemont bikomeje kwitwara neza nk'uko bimeze ubu, Johann Rupert ashobora kurushaho kwegera urwego rw'abaherwe bakomeye ku Isi, ndetse agakomeza gutsinda abandi bahatanira imyanya yo hejuru mu bakire ba Afurika.
Uyu mugabo w'imyaka 75 y'amavuko ni umwe mu banyemari bafite ijambo rikomeye ku mugabane wa Afurika, aho imyaka myinshi amaze ayoboye ibikorwa by'ubucuruzi bifite agaciro ka miliyari z'amadolari hirya no hino ku Isi.