Jasper Worship Team ni itsinda ry’abaririmbyi b’abakristo rishingiye ku ndangagaciro z’ivugabutumwa n’ubusabane n’Imana biciye mu muziki. Basengera mu Itorero Hermon Evangelical Church ryo muri Canada, Ottawa. Umushumba Mukuru uyoboye urusengero babarizwamo ni Bishop Augustin Kamarade ari na we wabahaye izina Jasper muri 2019.
"Twahoze turi chorale y'urusengero ariko nta zina bwite twagiraga. Twavuga ko Chorale yatangiranye n'urusengero muri 2014. Magingo aya uteranyije abaririmbyi n'abacuranzi twese hamwe turi 45, bose bafite umuhamagaro wo gukorera Imana binyuze mu muziki n’ubusabane" - Perezida wa Jasper Worship Team, Kim Alain Kazenga.
Jasper mu Kinyarwanda ni Yasipi, ni ibuye ry'agaciro rikunze kugaragara muri Bibiliya. Ryari irya cumi na kabiri ku mabuye yari agize umwambaro wo ku gituza w'abatambyi bakuru (Kuva 28:20 & 39:13). Kandi akaba ari ryo buye rya mbere ku nkike n'urufatiro rwa Yerusalemu nshya (Ibyahishuwe 21:18-19).
Iri tsinda ry'abaramyi rivuga ko impamvu ibahagurukije ari ukuvuga ubutumwa bwiza bwa Kristo bakamamaza mu isi yose!. Mu butumwa bwiza bamamaza bitsa ku rukundo rw’Umukiza "kuba yaraducunguye, tukamamaza gukomera kwe, ndetse no guhimbariza ishimwe rye iminsi yose."
Jasper WT ni urubyiruko rwomatanye na Yesu Kristo, bakaba baryoherwa cyane no kwibera mu buzima bw'amasengesho, umuziki usingiza Imana no guteranira hamwe [amateraniro] bumva ijambo ry'Imana banavuga imirimo itangaje y'Uwiteka.
Kujya muri Jasper WT bisaba iki?
Kugira ngo winjire muri Jasper WT, bisaba icya mbere kuba uri umukristo, wizera Yesu Kristo nk’Umwami n’umukiza w’ubugingo bwawe, ukaba witeguye kwitanga mu murimo w’Imana, ubuhanga mu muziki ndetse n’ubushake bwo kwiga no gukura mu mwuka.
Abari muri Jasper bahabwa umwanya n’amahirwe yo kwiga no gukura mu buryo bw’umwuka, bakagira umuryango ubafasha mu buzima busanzwe ndetse no kwagura impano zabo, "tutibagiwe gufashanya mu rugendo rujya mu ijuru".
Ubuyobozi bwa Jasper WT buvuga ko "kuba muri Jasper ni inzira yo gukorera Imana no kunguka inshuti, ubunararibonye no kwaguka mu bwenge bwo kuramya, ndetse no mu mwuka".
Mu rugendo rwabo rw'umuziki, Jasper Worship Team bamaze gukora ibikorwa bitandukanye. Bakoze Live Recording mu Ukuboza kwa 2024 y'indirimbo zabo, imwe muri izo ikaba yarasohotse ku mbuga zose (Youtube, spotify, apple music) muri weekend ya Pasika, ikaba yitwa "Calvary".
Ni indirimbo ivuga ku rukundo Imana "yadukunze ubwo Yesu Kristo yadupfiraga i Calvary, aho ni ho twacunguriwe, dukira urupfu rw’Iteka! Kuko ufite Yesu Kristo afite ubugingo! Duhamagarira ubataramwakira ko imbabazi zirahari Yesu abategeye amaboko, ugeze i Calvary araruhuka."
Jasper WT bamaze gutegura ibitaramo 3 byihariye byabo bwiye, aho abantu benshi bashoboye guhurira hamwe baramya umwami Yesu Kristo. Umunsi ku wundi batumirwa mu bitaramo, amacyesha [Veillee] n'ibindi insengero zitegura muri Ottawa.
Perezida wa Jasper Worship Team, Kim Alain Kazenga, aganira na inyaRwanda, yagize ati: "Imana yatugiriye ubuntu bwo gutumirwa mu mijyi itandukanye: Hamilton, Toronto, Montreal na Quebec City. Mu gihe cya vuba duteganya gukora igitaramo.
"Kandi dufite imishinga yo gusohora izindi ndirimbo, ziri mu nzira zisigashe gukorwaho ibintu bito bito. Byose hamwe bikazahurizwa hamwe muri album yacu ya mbere."
Ubudasa bwabo mu gukoresha imbuga nkoranyambaga
Jasper WT bazwiho gukoresha imbuga nkoranyambaga, cyane cyane Instagram, aho bashyiraho reels n’amashusho y’amateraniro, bagamije gushishikariza abantu guterana no kwereka ababakurikira uko gahunda zabo ziba ziteguye. Ni amashusho aba abereye ijisho ariko anafite ubutumwa, kandi bamaze kubigira umuco.
Hari ubwo bifata amashusho umwe muri bo akabaza bagenzi be uko amateraniro yo ku Cyumweru yagenze n'impamva y'urugendo yahavomye, maze buri umwe akisanzura akavuga ibyo yungukiyemo. Ni umwihariko wabo, kandi bagaragarizwa kenshi ko ubwo budasa bwabo mu ivugabutumwa bwizihira benshi babakurikira ku mbuga nkoranyambaga zabo.
Kim Alain Kazenga ati: "Twizera y'uko muri ino myaka, imbuga nkoranyambaga ari igikoresho gikomeye cy'ivugabutumwa. Aho ushobora gutangaza ibibera ku isi yose kandi mu gihe kihuse kandi ukanafasha na ba bantu badaheruka guterana cyangwa batazi Imana, tukabereka ibyishimo bitangwa n'Umwami Yesu."
Yavuze ko ari ibitekerezo byatangijwe na 'Media team' ya Jasper, "kandi ntabwo ari wowe gusa wabikunze". Ubu buryo bushya bwabateje imbere mu kumenyekana, gukomeza kugera ku bantu benshi, no kurushaho guhuza n’urubyiruko. Umusaruro wabyo ni uko ubutumwa bwabo bukwira vuba kandi mu buryo bugezweho.
Jasper WT ku rwego mpuzamahanga
InyaRwanda yabajije ubuyobozi bwa Jasper Worship Team niba muri gahunda zabo harimo kugeza umuziki wabo ku rwego mpuzamahanga, bakaba bakorana imishinga n'abahanzi b'ibyamamare n'amakorali akomeye ku Isi, gukora indirimbo ziri ku rwego rw'Isi ndetse n'ibitaramo bikomeye.
Perezida wa Jasper Worship Team, Kim Alain Kazenga, yavuze ko iyi "gahunda irimo gutegurwa", anateguza ibitaramo bikomeye mu Rwanda no muri Leta Zunze Ubumwe za Amerika. Ati: "Yego, hari gahunda y’uko Jasper Worship Team yakora ibitaramo mu Rwanda, USA ndetse n'ahandi hose ku isi ariko ni umugambi w'igihe kirekire".
Yunzemo ati: "Kugira ngo bizashoboke neza tugomba kuba dufite ibihangano byacu bwite byabaye mpuzamahanga. Iyi gahunda irimo gutegurwa, kandi yitezwe kugerwaho mu gihe kiri imbere. Bizaterwa n’uko Imana izabiyobora ndetse n’ubushobozi buzaboneka. Twifuza kuzagera ku isi hose tuvuga ubutumwa bwiza bwa Yesu."
Jasper Worship Team yahawe umugisha n'Imana wo kugira abaririmbyi bayiyobora umunsi ku wundi benshi batandukanye, byongeye b'abahanga - ibintu ubonera mu ndirimbo z'iri tsinda. Ubuyobozi bwa Jasper WT buvuga ko aba bose "bakora umurimo mwiza."
Yves Rwagasore uzwi mu ndirimbo "Njyewe Yesu wankunze" ni we mutoza w’amajwi, akaba afatanya na Meloe Byicaza. Kim Alain ati: "Ibyo byose tubifashwamo n'abakuriye imiririmbire: Yves Rwagasore na Meloe Byicaza. Tukanagira umucuranzi ukomeye ari we Isaac Byicaza. Abo bakaba ari bo batuyobora muri za repetition no mu gutegura no kwandika indirimbo zacu."
Umubano wa Jasper WT n’Itorero ibarizwamo
Jasper WT ibarizwa mu Itorero rya Hermoni (Evangelical Hermon Church) aho bakorera umurimo w’Imana mu buryo buhoraho. Aba baririmbyi bo guhangwa amaso mu muziki wa Gospel bavuga ko bafitanye umubano wimbitse n’itorero ryabo, haba mu buryo bw’umwuka no mu buzima bwa buri munsi nk'uko bitangazwa na Kim Alain Kazenga uyobora aba baririmbyi.
Yagize ati: "Abashumba bacu badufasha gukura no gusenga. Umushumba w’Itorero witwa Bishop Augustin Kamarade, tumushimira byinshi. Harimo kuba adushyigikira mu bikorwa byose no kudusabira. Akaba agira umutima wo kuba hafi y’urubyiruko muri rusange, aratwumva akatureberera nk’umubyeyi."
Jasper Worship Team barangamiye kwamamaza ubutumwa bwiza bwa Yesu Kristo ku Isi hose