Umuhanzi w'umunyabigwi mu muziki nyarwanda wamamaye mu ndirimbo "Umwana Ni Umutware", akaba n'umwarimu w'urukundo bitewe n'impuguro akunze guha abashakanye n'urubyiruko rwitegura kurushinga, Ngarambe François-Xavier , yatomoye umugore we bamaze imyaka 32 babana nk'umugabo n'umugore.
Yagize ati: “Mugore wanjye nkunda, Malayika wanjye wo ku butaka, Kagoyire Yvonne-Solange, intangiriro y’uyu mwaka wa 2026 ihuriranye n’isabukuru y’imyaka 32 y’ugushyingirwa kwacu. Nkwifurije umwaka mwiza wuzuye urukundo n’isabukuru nziza y’urushako rwacu.”
Yakomeje agaragaza ko hashize imyaka 32 bombi basezeranye kubana akaramata ku bushake bwabo, nta gahato gaturutse ku bandi, bambikanye impeta nk’ikimenyetso cy’urukundo n’ubudahemuka basezeranye.
Ngarambe yashimiye Imana yabahuje, ikabana nabo mu rugendo rwabo rw’urushako, ikagaragaza ubudahemuka bwayo, ikanabashoboza kuzuza inshingano yabashinze. Ati: "Ndashimira Imana yaduhuje, ikabana natwe, ikatugaragariza ubudahemuka bwayo, idushoboza kuzuza inshingano yadushinze"
Ngarambe wiyita "Umuvugo w’urukundo wa Solange", yasoje ubutumwa bwe bwo ku wa 01 Mutarama 2026, agira ati: “N’uyu munsi ndakubwira ko nkomeje kukwakira nk’umugore wanjye, ko ari wowe wenyine nkunda, ko ngukunda wese, kugeza ku ndunduro. Imana iguhe umugisha.”
Tariki ya 10/9/2025, ni bwo imyaka 32 yazuye, Ngarambe na Kagoyire basezeranye mu mategeko ya Repubulika y’u Rwanda. Ku munsi w'isabukuur y'imyaka 32 y'urushako, Ngarambe yabwiye Solange ati: "Mugore wanjye nkunda kandi unkunda, ...Nkwifurije isabukuru nziza. Uwo munsi niswe umugabo wawe, nawe witwa umugore wanjye;
Nubwo, uwo munsi, tutahise, dutangira kubana, kuko twari dutegereje gusezerana imbere y’Imana, Yo Muremyi w’ugushyingirwa, twumvise inshingano ikomeye yo kubera igihugu cyacu umutako mwiza ukibereye, urugo rwacu rukaba mu ngo zibereye igihugu cyacu umusingi ukomeye, ku buryo tutaba intandaro z’uko cyasenyurwa n’ubuhemu umwe yagirira undi."
Yakomeje agira ati: "Imana idukomeze, idushoboze ubutumwa twahawe bwo kugaragaza ubwiza bw’urukundo, bw’ugushyingirwa n’ubw’umuryango, kugira ngo igihugu kitubara mu ngo zicyubatse, gikomeze gisusurutswe n’umuriro w’urukundo utugurumana mu mitima. Ndagukunda ubu kugeza ku ndunduro. Umugabo wawe ugukunda kandi ukunda.."
Xavier na Solange bibera mu Ijuru ryabo rito
Ngarambe na Kagoyire bafatwa nk'abarimu b'urukundo
Kuva bakoze ubukwe, hashize imyaka 32 baryohewe n'urushako
Ngarambe yamamaye cyane mu ndirimbo "Umwana Ni Umutware"