Ni umukino wo mu itsinda rya 2 wabereye ku kibuga cya BC Place, i Vancouvermuri Canada. Amakuru yizewe avuga ko Kone yavunitse amagufa abiri y’ukuguru (fibula na tibia) nyuma yo gukorerwa ikosa rikomeye na Assim Madibo wa Qatar, wahise ahabwa ikarita itukura.
Uyu mukinnyi wo hagati w’imyaka 24, ako kanya yahise asohoka mu kibuga aho yakomezaga kwitabwaho n’abaganga.
Nk'uko tubikesha Mirror, umutoza wa Canada, Jesse Marsch, yemeje ko Kone yahise ajyanwa mu bitaro ari kumwe n’umubyeyi we, Suzanne, aho ari kwitegura kubagwa. Yagize ati: “Azitabwaho n’abaganga beza, kandi dufite icyizera ko azagaruka vuba.”
Nyuma y’uyu mukino, umukinnyi wamukoreye ikosa, Assim Madibo, yaje mu rwambariro gusaba imbabazi, agaragaza ko yababajwe n’ibyamubayeho.
Kapiteni wa Canada, Stephen Eustáquio, yavuze ko iki gikomere ari igihombo gikomeye ku ikipe, avuga ko Kone ari umukinnyi ufite impano idasanzwe (X factor) ikipe ikenera cyane.
Na ho Jonathan David, umwe mu bakinnyi bakomeye ba Canada, avuga ko nta mpamvu yo gukorera umukinnyi ikosa rikomeye mu gihe nta bushobozi bwo gutsinda umupira buhari.
Nubwo ibyo byago byabaye, Canada yitwaye neza itsinda Qatar ibitego 6–0. Nyuma y’igitego cya kane cyatsinzwe na Nathan Saliba, asimbuye Kone, yafashe umupira wanditseho izina rya Kone arawuzamura mu kirere mu rwego rwo kumuha icyubahiro, bikurura ibyishimo n’amarangamutima mu bafana.
Ismael Kone mu gihe cy’akababaro k’imvune ikomeye yagiriye mu mukino wahuje ikipe y'igihugu ya Canada n'iya Qatar.