Ibi ntabwo ari ikibazo cy’u Bwongereza gusa. Ishami ry’Umuryango w’Abibumbye ryita ku Buzima (WHO) rivuga ko hafi umuntu umwe muri batandatu ku isi ahura n’irungu, mu gihe mu bangavu n’abantu bakiri bato rigera hafi umuntu umwe kuri batanu.
Mu Bwongereza, Gen Z imara igihe kinini iri yonyine
Raporo nshya ya Resolution Foundation yiswe All By Myself yagaragaje impinduka zikomeye mu gihe urubyiruko rumara ruri rwonyine.
Abagabo bafite imyaka 18–29 ubu bamara hafi amasaha 6 n’igice ku munsi bari bonyine, akaba ari amasaha abiri arenze ayo bamara bonyine mu 2014–2015. Ku bagore bo muri iyo myaka, igihe bamara bonyine cyiyongereyeho hafi isaha n’igice, kigera ku masaha atanu ku munsi.
Raporo ivuga ko abagabo bakiri bato ubu bamara barenga bibiri bya gatanu by’amasaha baba maso bari bonyine.
Ibi ntibisobanura ko buri muntu muri Gen Z afite irungu, cyangwa ko kuba umuntu ari wenyine bisobanuye ko afite ikibazo cy’irungu. Ariko imibare igaragaza ko igihe urubyiruko rumara rutari kumwe n’abandi cyiyongereye cyane.
Gukorera mu rugo biri mu mpamvu zikomeye
Abashakashatsi bagaragaza ko imwe mu mpamvu z’ingenzi ari impinduka zabaye mu buryo abantu bakoramo.
Kuva akazi ko gukorera mu rugo kagenda kaguka, cyane cyane nyuma ya COVID-19, abantu benshi batakaje amahirwe yo guhura n’abo bakorana buri munsi.
Resolution Foundation ivuga ko gukorera mu rugo ari byo byagize uruhare kuri hafi bibiri bya gatatu by’izamuka ry’igihe abantu bafite imyaka yo gukora bamara bari bonyine ku kazi. Nanone, urubyiruko rumara hafi inshuro eshatu igihe kinini rukorera rwonyine ugereranyije na 2014–2015.
Parth Pandya, umwe mu banditsi ba raporo, yavuze ko ikibazo kidakwiye kureberwa gusa ku gihe urubyiruko rumara kuri telefoni cyangwa kuri internet, ahubwo ko n’uburyo rukora n’aho rukorera bikwiye kwitabwaho.
Ikoranabuhanga ryaba rifite uruhe ruhare?
Telefoni n’imbuga nkoranyambaga byorohereje Gen Z kugumana umubano n’abantu bari kure. Ariko kuba umuntu ashobora kuvugana n’abantu benshi kuri internet ntabwo buri gihe bisimbura umubano w’abantu bahura imbonankubone.
Resolution Foundation ivuga ko ubwiyongere bukabije bw’imikoreshereze ya telefoni n’imbuga nkoranyambaga bwahinduye uburyo abantu basabana, cyane cyane mu rubyiruko.
Ariko abashakashatsi banagaragaza ko ikoranabuhanga atari ryo ryonyine risobanura impinduka zose ziri kuba. Ni ukuvuga ko ikibazo atari telefoni gusa. Uburyo umuntu ayikoresha, uko asanzwe abanye n’abandi ndetse n’imibereho ye muri rusange na byo bishobora kugira uruhare.
Abahanga batandukanya ibintu bibiri: kuba umuntu ari wenyine no kumva afite irungu.
Umuntu ashobora guhitamo kumara igihe ari wenyine kandi akaba nta kibazo afite. Ariko umuntu ashobora no kuba hagati y’abantu benshi, akavugana n’abantu ku mbuga nkoranyambaga, ariko imbere muri we akumva nta muntu amwumva cyangwa afitanye na we umubano ukomeye.
WHO isobanura irungu nk’ikibazo kijyanye no kutabona umubano w’imibanire umuntu yifuza. Ni ikibazo gishobora kugira ingaruka ku buzima, imibereho myiza ndetse n’imibanire y’abantu.
Ese iki kibazo kigaragara no mu bindi bihugu?
Ubushakashatsi mpuzamahanga bwakozwe mu bihugu umunani mu 2026 bwagaragaje ko hafi umuntu umwe kuri babiri bafite imyaka 18–24 yavuze ko yumva afite irungu.
Muri ubwo bushakashatsi, hafi bane muri 10 mu bantu bakuru bose bari babajijwe bavuze ko bafite irungu, mu gihe ku bafite imyaka 18–24 umubare wazamutse ukagera hafi kuri kimwe cya kabiri. Abashakashatsi kandi basanze abafite irungu bafite amahirwe menshi yo kugira ibimenyetso by’agahinda gakabije n’ubwoba.
Ibi bishimangira ko ikibazo cy’irungu mu rubyiruko atari ikibazo cy’igihugu kimwe, ahubwo ko ari ikibazo kiri kugaragara mu bice bitandukanye by’isi.
COVID-19 nayo yasize impinduka
Igihe COVID-19 yari ikomeye, abantu benshi bamaze igihe kinini batava mu ngo, amashuri n’akazi bimukira kuri internet, naho guhura n’inshuti n’abandi bantu biragabanuka cyane.
Ku rubyiruko, ibyo byaje mu gihe benshi bari bubaka ubucuti, batangira amashuri makuru cyangwa binjira ku isoko ry’umurimo. Abashakashatsi bakomeje kwiga uburyo iyo myaka y’ukwigunga yaba yaragize uruhare mu guhindura imibanire y’urubyiruko.
Nubwo bimeze bityo, ntibyaba bikwiye kuvugwa ko COVID-19 ari yo yonyine yateye ikibazo cy’irungu muri Gen Z, kuko impinduka mu mibanire, akazi, imikoreshereze y’ikoranabuhanga n’imibereho rusange na zo ziri mu bigize iki kibazo.
Irungu rishobora kugira ingaruka ku buzima?
WHO ivuga ko irungu no kubura imibanire ihamye bishobora kugira ingaruka zikomeye ku buzima bw’umubiri n’ubw’umutwe ndetse no ku mibereho y’umuntu. Ku isi hose, hafi umuntu umwe muri batandatu ahura n’irungu.
Ku rubyiruko, ikibazo kirushaho kwitabwaho kuko WHO ivuga ko irungu rikunze kugaragara cyane mu bangavu n’abantu bakiri bato.
Ubushakashatsi bwo mu bihugu umunani na bwo bwagaragaje isano ikomeye hagati y’irungu n’ibimenyetso by’agahinda gakabije ndetse n’ubwoba ku rubyiruko.
Ese kugabanya gukoresha Telefone byaba igisubizo kirambye?
Ikibazo cy’irungu muri Gen Z ntigishobora gukemurwa no kubwira urubyiruko gusa ngo rugabanye i telefoni.
Abashakashatsi bagaragaza ko hakenewe kurebwa ibintu byinshi icyarimwe: uburyo abantu bakorera, amahirwe yo guhura n’abandi, imibanire mu miryango n’abaturage, uburyo urubyiruko rubona akazi ndetse n’ahantu rushobora gusabana n’abandi.
WHO na yo isaba ko ibihugu n’abafatanyabikorwa batangira gufata ubusabane n’imibanire myiza nk’igice cy’ingenzi cy’ubuzima, aho kubifata nk’ikibazo cy’umuntu ku giti cye gusa.
Ikibazo rero si ukumenya niba Gen Z ifite abantu benshi ishobora kuvugana na bo. Ikibazo gikomeye ni ukumenya niba ifite abantu ishobora kwiringira, kuganiriza ku byiyumvo byabo no kubana na bo mu buzima busanzwe.