Ibyo wamenya kuri rutahizamu wahamagawe mu ikipe y’igihugu ya Cameroun uvugwa muri Rayon Sports

Rayon Sports ikomeje urugendo rwo gushaka abakinnyi bashya ndetse Perezida wa komite yayo y’inzibacyuho, Murenzi Abdallah, yavuze ko bazasinyisha abakinnyi batanu bashya mu kwezi kwa mbere barimo babiri b’Abanyarwanda na batatu b’Abanyamahanga.

Nyuma y’uko yumvikanye na Ssenoga Muhammad Kagawa ukomoka muri Uganda kuri ubu biravugwa ko iri no mu biganiro byo gusinyisha Jules Armand Kooh Bioumla ukina nka nimero 9, akaba yaravutse tariki ya 16 Kamena 2025 mu 1999 i Douala muri Cameroun.

Yatangiye gukina ruhago ahereye mu ikipe y’Abato ya Avion FC mbere y’uko ajya muri Stade Renard. Nyuma yo kugaragaza ubuhanga, yaje kwerekeza mu ikipe ya Astres de Douala muri 2019 asinya amasezerano ye ya mbere nk’umukinnyi wabigize umwuga.

Jules Armand Kooh ari muri Astres de Douala mu mwaka w’imikino wa 2023/2024 yabaye rutahizamu watsinze ibitego byinshi muri shampiyona bingana na 22. Muri uyu mwaka w’imikino yanatsinze igitego cyiza muri shampiyona abihererwa igihembo.

Mu mpeshyi ya 2024, yerekeje muri Club Africain yo muri Tunisia asinya amasezerano y’imyaka itatu. Akigerayo, yahise agira ikibazo cy’imvune igihe kirekire ndetse biza kurangira atandukanye nayo none kugeza ubu nta kipe afite.

Mu mwaka ushize yahamagawe mu ikipe y’igiihugu ya Cameroun umukino umwe gusa nyuma y’uko yari amaze igihe yitwara neza. Amakuru avuga ko uyu rutahizamu agera mu Rwanda kuri uyu wa Mbere aho ashobora gusinya amasezerano y’amezi atandatu.

Jules Armand aravugwa muri Rayon Sports

Jules Armand arikumwe na Bryan Mbeumo wa Manchester United mu ikipe y'igihugu ya Cameroun