Hari abagabo badaha agaciro ibyo bakorerwa n’abagore bakundana na bo, bakirengagiza ibyiyumvo byabo kugeza ubwo umubano wabo ujemo agatotsi.
Dore ibintu bitanu bishobora gutuma umukobwa arambirwa umusore bakundana.
1. Kubura ubunyangamugayo
Kuba inyangamugayo ni imwe mu nkingi z’urukundo rurambye. Iyo umusore/umugabo ahora abeshya umukobwa/umugore bakundana cyangwa akamuhisha ukuri, bituma agenda atakaza icyizere yari amufitiye.
Nubwo umugore ashobora kwihangana igihe kirekire, gukomeza guhura n’imyitwarire nk’iyo bishobora gutuma arambirwa uwo mubano. Ni yo mpamvu ari ngombwa ko abashakanye cyangwa abakundana babwizanya ukuri kandi bakirinda ibikorwa bishobora gusenya icyizere bafitanye.
2. Kutamwumva no kudaha agaciro ibitekerezo bye
Umubano mwiza usaba ko abakundana bumva ibitekerezo bya buri wese kandi bakubahana. Iyo umugabo afata ibyemezo byose atagishije inama umugore bakundana, cyangwa akirengagiza ibyo amubwira, ashobora kumwumvisha ko nta gaciro amufitiye.
Umugore na we akwiye kugira umwanya wo gutanga ibitekerezo no kugira uruhare mu byemezo bireba umubano wabo. Kutumvikana bishobora kubaho, ariko kuganira no kubahana bifasha abakundana gukemura ibibazo batabangamiye umubano wabo.
3. Kubura icyizere
Icyizere ni ingenzi mu rukundo. Iyo umugabo ahora akeka umugore bakundana, akamushinja ibintu adafitiye ibimenyetso cyangwa agahora amukurikirana, bishobora guteza amakimbirane no kumunaniza mu marangamutima.
Icyakora, kugira icyizere ntibivuze kwirengagiza ibibazo bibaye mu mubano. Iyo hari imyitwarire itera impungenge, abakundana bakwiye kuyiganiraho mu bwubahane, bagashaka uko bongera kubaka icyizere aho guhora bashinjanya.
4. Kutamwitaho
Umugore ashobora kurambirwa umubano igihe yumva ko ari we wenyine uhora awitaho, mu gihe umugabo bakundana atagaragaza ko amwitayeho.
Kumwitaho bishobora kugaragarira mu kumutega amatwi, kumubaza uko ameze, kumufasha igihe afite ibibazo no kumwereka ko amukunda. Ni na ngombwa gukomeza gushyikirana no gufata umwanya wo kuganira ku byiyumvo bya buri wese.
Iyo umwe ahora yumva ko yirengagijwe, ashobora kugenda yiheba, bikazagera aho yumva ko gukomeza uwo mubano nta cyo bikimumariye.
5. Kumuca inyuma
Guhemukira uwo mukundana ukaryamana n’undi muntu cyangwa ukagira undi mubano w’urukundo mu ibanga bishobora gusenya icyizere cyari hagati yanyu.
Umugabo uca inyuma umugore bakundana ashobora kumukomeretsa bikomeye, cyane cyane iyo yari amwizeye kandi yaramwiyeguriye. Bamwe bahitamo guhita batandukana na we, abandi bakagerageza kubabarira, ariko bigasaba igihe n’imbaraga kugira ngo bongere kubaka icyizere.
Ni yo mpamvu umuntu ukunda undi akwiye kuba umunyakuri ku byo ashaka mu mubano, aho kwemera ko bakundana hanyuma akamuca inyuma.
Kubaka urukundo rurambye bisaba ubunyangamugayo, icyizere, kubahana, kwita ku byiyumvo bya mugenzi wawe no gushyikirana. Iyo ibyo bibuze, umubano ushobora kugenda ucika intege kugeza ubwo umwe mu bakundana ahitamo kuwuvamo.
Abakundana bakwiye kumenya ko gukomeza umubano atari inshingano z’umuntu umwe, ahubwo ko bisaba uruhare rwa bombi.