Ibihugu 10 by’Afurika bifite lisansi ihendutse kurusha ibindi muri Kamena 2026

Amakimbirane yabaye hagati ya Leta Zunze Ubumwe z’Amerika na Iran yateye impungenge ku isoko mpuzamahanga rya peteroli, bituma ibiciro byayo bizamuka kubera ubwoba bw’ihungabana ry’itangwa ryayo binyuze mu nzira z’ingenzi z’ubwikorezi bwo mu nyanja.

Ibi byagize ingaruka zikomeye ku bihugu byinshi by’Afurika bishingira cyane ku gutumiza lisansi n’ibindi bikomoka kuri peteroli hanze, kuko byatumye ibiciro bizamuka ndetse n’ubuzima bw’abaturage burushaho guhenda.

Nyamara, nyuma y’uko impande zari mu makimbirane zigeze ku masezerano y’amahoro, ibiciro bya peteroli ku isoko mpuzamahanga byongeye kugabanuka munsi y’amadolari 90 ku ngunguru. Ibi byitezweho gutanga agahenge ku bihugu byari byarahuye n’izamuka ry’ibiciro by’ibikomoka kuri peteroli.

Muri Afurika, igiciro cya lisansi ni kimwe mu bipimo bikomeye byerekana uko ubukungu bw’igihugu buhagaze. Lisansi ikoreshwa cyane mu bwikorezi, ubuhinzi, inganda ndetse no mu gutanga amashanyarazi mu bice byinshi by’umugabane.

Ibihugu bibasha kugumana ibiciro bya lisansi biri hasi cyangwa bihagaze neza akenshi bibona inyungu zirimo kugabanya ibiciro by’umusaruro, koroshya ubwikorezi no gukurura abashoramari.

Mu gihe ibihugu nka Kenya n’Afurika y’Epfo byakomeje kubona ibiciro bya lisansi bizamuka kubera imisoro yiyongereye, ihindagurika ry’ifaranga n’ingaruka z’isoko mpuzamahanga, Nigeria yo yatangiye kubona igabanuka ry’ibiciro bitewe ahanini n’izamuka ry’ubushobozi bwo gutunganya peteroli imbere mu gihugu binyuze muri Dangote Refinery.

Nk’uko tubikesha Business Insider AFRICA, uru ni urutonde rw’ibihugu 10 by’Afurika bifite ibiciro bya lisansi biri hasi cyane muri Kamena 2026, hashingiwe ku mibare ya GlobalPetrolPrices.

Ikiza k’ibiciro bito bya lisansi bifasha kugabanya ikiguzi cy’ubwikorezi n’umusaruro, bigatuma ibicuruzwa na serivisi bihenduka ku baturage. Nanone bifasha kugenzura izamuka ry’ibiciro ku isoko (inflation) no kongera ubushobozi bwo guhangana mu bukungu.

Mu gihe isi ikomeje guhura n’ihindagurika ry’isoko ry’ingufu n’amakimbirane ya politiki mpuzamahanga, ubushobozi bw’ibihugu bwo kurinda abaturage n’abashoramari ihungabana ry’ibiciro bya lisansi buragenda burushaho kuba ikimenyetso cy’ubukungu bukomeye kandi burambye.

Ugereranyije n’ukwezi gushize kwa Gicurasi 2026, ibiciro bya lisansi muri Algeria, Tunisia, Niger, Nigeria, Gabon na Ethiopia byagabanutseho gato, mu gihe muri Misiri byazamutse mu buryo bworoheje. Ibi byerekana ko isoko ry’ibikomoka kuri peteroli rikomeje guhindagurika bitewe n’imiterere y’ubukungu n’iy’umutekano ku rwego mpuzamahanga.