Ibigwi bya Patrick Vieira wagizwe umutoza mushya wa Senegal

Vieira w’imyaka 50 yavukiye i Dakar muri Senegal, ariko afite amateka akomeye mu mupira w’amaguru w’u Bufaransa kuko ari ho yakuriye nyuma yo kwimukirayo afite imyaka umunani. Yakiniye ikipe y’igihugu y’u Bufaransa imikino 107, akaba yaranayifashije kugera ku ntsinzi zikomeye.

Nk’uko tubikesha urubuga rwa Tranfermrk, uyu mutoza asimbuye Pape Thiaw wari umaze imyaka ibiri ayobora Senegal. Thiaw yayifashije kwegukana igikombe cya Afurika cya 2025, ariko nyuma aza kugira ikibazo gikomeye ubwo yayoboraga abakinnyi be kuva mu kibuga nyuma yo kutishimira icyemezo cy’umusifuzi.

Ibyo byakurikiwe n’impaka ndetse n’ibihano byatumye Senegal yamburwa icyo gikombe, maze gihabwa Morocco.

Mu gikombe cy’Isi cya 2026, Senegal yari yegereje cyane gukomeza mu mikino ya nyuma ubwo yahuraga n’u Bubiligi mu cyiciro cya 32. Senegal yari iri imbere ibitego 2-0, ariko ntiyabasha kubungabunga uwo mwanya, itsindwa ibitego 3-2 ku munota wa nyuma. Nyuma yo gusezererwa, Thiaw yirukanwe ku mirimo yo gutoza.

Vieira agarutse mu kazi ko gutoza

Kuri Patrick Vieira, izi ni zo nshingano za mbere zo gutoza ikipe y’igihugu mu mateka ye y’ubutoza. Ni na yo kipe y’igihugu ifite umwihariko kuri we kuko ari igihugu yavukiyemo, nubwo yahisemo gukinira u Bufaransa.

Vieira yatangiye urugendo rwe rw’ubutoza muri Manchester City, aho yari yarangirije umwuga wo gukina. Yatoje ikipe y’abatarengeje imyaka 21 y’iyi kipe kuva mu mwaka w’imikino wa 2012/13 kugeza mu wa 2015/16. Muri iyo myaka, yayoboye imikino 63, aho ikipe ye yagiraga impuzandengo y’amanota 1.65 kuri buri mukino.

Nyuma yaho, Vieira yafashe icyemezo cyo kujya muri Leta Zunze Ubumwe za Amerika, aho yatoje New York City FC muri Major League Soccer (MLS). Yamaze imyaka ibiri muri iyi kipe, ayitoza imikino 90, aho yagize impuzandengo y’amanota 1.58 kuri buri mukino.

Nyuma yo kwigaragaza muri Amerika, Vieira yasubiye mu Bufaransa, ahabwa akazi ko gutoza OGC Nice. Icyakora, ibintu ntibyagenze neza nk’uko byari byitezwe, kuko nyuma yo kuyitoza imikino 89 yagize impuzandengo y’amanota 1.22 kuri buri mukino, bituma yirukanwa mu 2020.

Crystal Palace, Strasbourg na Genoa

Mu 2021, Vieira yerekeje mu Bwongereza aho yagizwe umutoza wa Crystal Palace nyuma y’uko Roy Hodgson avuye kuri uwo mwanya.

Yatangiye neza, ayobora Palace kugera ku mwanya wa 12 muri Premier League mu mwaka we wa mbere, ndetse ikipe ye igaragaza umupira ushingiye ku gutera imbere no gushaka ibitego.

Gusa mu mwaka w’imikino wakurikiyeho, umusaruro waragabanutse ndetse n’imyitwarire y’ikipe irahinduka. Ibyo byatumye Vieira yirukanwa, afite impuzandengo y’amanota 1.22 kuri buri mukino.

Nyuma yaho, yagiye gutoza Strasbourg mu Bufaransa ndetse na Genoa mu Butaliyani, ariko nta hantu hose yigeze agera ku musaruro ukomeye cyane mu bijyanye n’amanota.

Ubu Vieira ahawe amahirwe mashya yo kwigaragaza, ariko noneho akaba agiye gukorera igihugu yavukiyemo.

Kuba azi umupira w’amaguru wo ku rwego rwo hejuru, kuba yarakiniye u Bufaransa imikino 107 ndetse akaba yaratoje amakipe yo mu bihugu bitandukanye, bituma Senegal imwitegaho byinshi.

Icyo benshi bazaba bategereje kureba ni niba Vieira azashobora gukoresha ubunararibonye afite kugira ngo asubize Senegal ku rwego rwo guhatanira ibikombe bikomeye muri Afurika ndetse no ku rwego mpuzamahanga.