Mu bakinnyi bashya bahamagawe mu ikipe y'Igihugu y'u Rwanda, Amavubi izakina na Algeria mu mikino ya gicuti harimo n'ukinira Lutton Town yo mu Bwongereza.
Kuri uyu wa Gatatu nibwo Adel Amrouche utoza Amavubi yashyize hanze abakinnyi 27 azifashisha mu mukino wa gicuti ikipe y'igihugu izakinamo na Algeria.
Muri aba bakinnyi harimo n'abahamagawe ku nshuro ya mbere bakina ku mugabane w'Iburayi. Abo ni Aly Enzo Hamon w'imyaka 22 usanzwe ukinira Angouleme CFC yo muri shampiyona y'icyiciro cya kane mu Bufaransa.
Uyu mukinnyi ukina yugarira yatangiye gukina ruhago ahereye mu ikipe ya Pôle Espoirs Saint-Sébastien yo mu Bufaransa ,nyuma akomereza mu ikipe ya Guingamp naho mu mwaka ushize yerekeza muri Angoulême arinayo akinira kugeza ubu.
Aly Enzo Hamon ufite Se wakini w'Umunyarwanda witwa Yves Mudeyi yigeze guhamagarwa mu ikipe y'Igihugu y'u Bufaransa y'abatarangeje imyaka 17.
Hari Darly Nkulikiyimana usanzwe ukinira FC Dendereh yo muri shampiyona y'icyiciro cya mbere mu Bubiligi. Uyu mukinnyi yari mu bakinnyi bakiriwe n'ishyirahamwe ry'umupira w'amaguru mu Rwanda, FERWAFA muri 2022 arikumwe n'ababyeyi be.
Hari kandi Kayibanda Claude Smith ukinira Lutton Town y'abatarangeje imyaka 21. Uyu mukinnyi w'imyaka 18 ukina mu kibuga hagati afite ababyeyi bakomoka mu Rwanda yatangiye gukina ruhago muri 2018 ahereye muri iyi kipe y'abato ya Lutton Town gusa mu mwaka ushize nibwo yasinye amasezerano ya mbere muriyo.
Mu bakinnyi bahamagawe kandi harimo na Kagere Medie ukinira Namungo FC yo muri Tanzania. Uyu mukinnyi asubiye mu Mavubi nyuma y'iminsi 792 Rutahizamu w'imyaka 38 Meddie Kagere ahamagawe.
Rutahizamu Kagere yaherukaga kugaragara mu Amavubi, Tariki 29/03/2023 mu mukino Amavubi yatsinzwemo na Bènin ibitego 3-0 (forfeit) Dore ko umukino wari warangiye ari igitego 1-1.
Ikipe y'igihugu y'u Rwanda,Amavubi izahaguruka mu Rwanda kuri uyu wa Gatanu bagere muri Algeria ku wa Gatandatu aho bazakina imikino ibiri ya gicuti. Umukino wa mbere uteganyijwe tariki ya 5 z'ukwezi gutaha naho uwa kabiri uzakinwe tariki ya 9.
Kayibanda Claude Smith asanzwe akinira Lutton Town y'abatarangeje imyaka 21
Aly Enzo Hamon yakiniye u Bufaransa bw'abatarengeje imyaka 21
Hari Darly Nkulikiyimana yari yarigeze kwakirwa na FERWAFA