Hari abamaze imyaka 6 batazi uko 'studio' imeze! Abahanzikazi 5 babaye inkumburwa mu muziki

Binyuze mu nkuru z’abahanzi nka Marina, Tete Loaper ndetse n’abandi babaye ibyamamare mu myaka yashize, haragaragara uburyo ikibazo cy’ihagarikwa ry’umuziki n’abakobwa gifite imizi migari – uhereye ku mikorere mibi muri studio, imyumvire y’ababyeyi, ubushobozi buke, kugeza ku kutitabwaho nk’uko basaza babo bashyigikirwa.

Ibi byose bibaye mu gihe hari benshi bagishimishwa n’ijwi, imyandikire n’imyitwarire byihariye bya bamwe muri aba bahanzi – nk’uko Marina aherutse kubwira InyaRwanda, ko yumva ijwi rya Queen Cha ryagombye kongera kumvikana mu matwi y’abakunzi b’umuziki.

InyaRwanda yakoze urutonde rw’abahanzikazi 5 batumvikanye mu ndirimbo nshya mu gihe kirenze imyaka itatu, n’ubwo bagifite igikundiro mu mitima y’abafana.

Gutandukana kwa hato na hato no kudahuza ku ntego ya buri umwe, byagiye bituma abari barafatanyije gushinga itsinda bashwana mu buryo bukomeye, ariko kandi hari abahanzi ku giti cy'abo b'abakobwa bakomeje guhanyanyaza ariko ntibyakunda.

Ariko kandi hari bamwe bumvikana bavuga ko kuba nta mafaranga ari mu muziki w'u Rwanda, ari kimwe mu byo babona bituma badasohora indirimbo.

Mu myaka 31 ishize, umuziki w'abakobwa mu Rwanda wagiye utera imbere, ku buryo hari amatsinda yaje azengereza basaza babo, ariko n'abo babaye nka wa muriro w'amashara.

1.Asinah

Uyu muhanzikazi wamenyekanye mu njyana ya Dancehall aheruka gushyira ku isoko indirimbo 'Turn Up' yakoranye n'umuraperi Gatsinzi Emery wamamaye nka Riderman. Yabaye idasanzwe mu rugendo rw'aba bombi, kuko yasohotse mu rwego wasobanura ko byari bigamije gukomeza ubushuti, n'ubwo Isi itashimye ko bakomeza gukundana.

Iyi ndirimbo kandi imaze kurebwa n'abantu barenga ibihumbi 16. Uyu mukobwa w'ikimero yari amaze igihe ashyize imbere mu gukora umuziki, nk'imwe mu nzira nziza zo kongera kwiyubaka.

Muri iki gihe ari kuvugwa mu itangazamakuru, kubera umugabo w'umukire avuga ko yamukubitiye mu modoka, ndetse ko yamaze no gutanga ikirego mu Urwego rw'Igihugu rw'Ubugenzacyaha (RIB). 

Iyi ndirimbo ye 'Turn Up' yakozwe na Producer Holybeat, ni mu gihe amashusho yakozwe na Julien Bmjizzo.

2.Charly na Nina

Aba bakobwa bari muri Leta Zunze Ubumwe kuva ku wa 26 Nzeri 2022. Bagiye bavuga ko bitabiriye inama y'abashoramari bo muri Afurika y'Iburasirazuba batumiwemo muri Leta ya Texas muri Amerika, ariko kuva icyo gihe ntibigeze bagaruka.

Buriye indege hashize iminsi basohoye indirimbo 'Lavender' ari nayo ya nyuma yumvikanamo ijwi ryabo. Iyi ndirimbo yagiye hanze ku wa 21 Gashyantare 2022, ndetse ku rubuga rwa Youtube imaze kurebwa n'abantu barenga ibihumbi 511.

Charly na Nina babyinishije benshi binyuze mu bihangano byabo bagiye bashyira hanze mu bihe bitandukanye; ndetse baririmbye mu bitaramo byinshi, imbere mu gihugu ndetse no hanze.

Ni abakobwa b'ikimero, byatumye ubwo binjiraga mu muziki barigwijeho igikundiro mu buryo bworoshye. Ariko kandi gutandukana na Alex Muyoboke wari umujyanama wabo byakomeye mu nkokora iterambere ry'abo.

3.Queen Cha

Ni umwe mu bakobwa b'ijwi ridasanzwe; ndetse ibihangano bye byumvikanye igihe kinini hirya no hino. Umuyoboro wa Youtube akoresha ugaragaza ko indirimbo ya nyuma iriho ari iyitwa 'Ntawe Nkura'.

Yasohotse ku wa 10 Ukwakira 2018, aho imaze kurebwa n'abantu barenga ibihumbi 143. Iyi ndirimbo yayikoze ubwo yari akibarizwa muri sosiyete y'umuziki ya The Mane.

Kuva kiriya gihe, uyu mukobwa ntiyongeye gukora umuziki. Ariko aherutse kubwira InyaRwanda, ko ateganya kugaruka mu muziki. Gusa, hari amakuru avuga ko asigaye yarerekeje amaso mu bucuruzi.

Indirimbo ye yabaye ikimenyabose yitwa 'Icyaha ndacyemera' yasohotse mu 2013.

4.Allioni

Yitwa Allioni Buzindu ariko wamumenye nka Allioni. Yamenyekanye nk'umukobwa w'umunyamafaranga, wagiye anashyira imbaraga cyane mu bihangano bye, ariko amakuru avuga ko yatengushywe cyane n'abo yigiye yizera mu muziki byatumye abihagarika.

Uyu mukobwa yafashe ikiruhuko mu muziki, ariko yasize asohoye indirimbo 'Tuku Tuku' yagiye hanze ku wa 18 Nyakanga 2019. Imaze kurebwa n'abantu barenga ibihumbi 148.

Ni indirimbo yakozwe mu buryo bw'amajwi na Made Beat ubwo yari akibarizwa mu Rwanda, ndetse ikorwa na Sasha Vybz uri mu bakomeye mu gihugu cya Uganda. Ni nawe wakoze 'video' y'indirimbo ya Diamond na Bruce Melodie.

5.Scillah

Umuratwa Priscilllah wahisemo izina rya Scillah mu muziki ni umwe mu bakobwa bavuzwe cyane mu myaka 15 ishize ari mu muziki, ndetse ijwi rye ryumvikanye cyane mu bihangano by'abaraperi n'abandi banyuranye.

Muri iki gihe abarizwa muri Houston ho muri Leta Zunze Ubumwe za Amerika. Shene ye ya Youtube igaragaza ko aheruka kugenera abafana be indirimbo 'Overdose' yasohotse ku wa 17 Kamena 2021.

Iyi ndirimbo imaze imyaka ine. Ubwo yayishyiraga hanze, yavuze ko yayanditse afatanyije na Kenny Sol watandukanye na 1:55 AM, ndetse yerekana ko yagizwemo uruhare na studio ya Giggz.  Kuva kiriya gihe, uyu mukobwa ntiyongeye kumvikana mu muziki.

Icyo aba bahanzikazi bahuriyeho ni uko bafite amateka, impano n’inkuru zihariye zasize igikundiro gikomeye mu muziki Nyarwanda. Ariko ku rundi ruhande, urugendo rwabo rwagiye rushegeshwa n’imbogamizi zitandukanye zituma baramburwa.

Ibi bibaye mu gihe hakenewe uburyo buhamye bwo gushyigikira abahanzikazi – haba binyuze mu baterankunga, amasoko yihariye, amarushanwa, ndetse no gushyiraho politiki zifasha abagore mu buhanzi.

Ku rwego mpuzamahanga, hari abahanzikazi benshi bigeze kwamamara cyane ariko baza guhagarika umuziki cyangwa bagasubira inyuma mu buryo bugaragara. Impamvu zatanzwe ni zitandukanye—zishingiye ku buzima bwite, umunaniro w’akazi, ibibazo by’amafaranga, ubuzima bwo mu mutwe, umuryango cyangwa imyemerere.

IMYAKA ITANDATU IRASHIZE QUEEN CHA AHAGARITSE UMUZIKI, AHO AHERUKA GUSOHORA INDIRIMBO YISE 'NTAWE NKURA'

KANDA HANO UREBE INDIRIMBO 'OVERDOSE' UMUHANZIKAZI SCILLAH AHERUKA GUSHYIRA HANZE