Umuntu ashobora kumva akunda undi cyane, ariko nyuma y’igihe akazisanga yarakurikiye inyungu cyangwa ishusho yari afite kuri uwo muntu, aho gukunda uwo ari we koko.
Mbere yo gufata icyemezo cyo kurushinga, ni byiza kwibaza uti: “Ese nakomeza gukunda uyu muntu n’iyo yaba adafite ibintu bintera kumwifuza uyu munsi?”
Iki kibazo gishobora gufasha umuntu gusuzuma niba urukundo afitiye mugenzi we rushingiye ku miterere ye n’indangagaciro ze cyangwa ku bintu bishobora guhinduka.
Dore impamvu zirindwi zishobora gutuma umuntu yibeshya ko yakunze by’ukuri;
1. Gukunda umuntu kubera ubwiza bwe
Ubwiza bwo ku mubiri ni kimwe mu bituma abantu bakururana, cyane cyane mu ntangiriro z’urukundo. Icyakora, iyo ari bwo bwonyine umuntu ashingiraho ahitamo uwo bakundana, bishobora kumuteza ibibazo mu gihe kizaza.
Uko imyaka ishira, isura y’umuntu ishobora guhinduka bitewe n’imyaka, uburwayi cyangwa izindi mpamvu. Iyo urukundo rushingiye ku bwiza gusa, impinduka nk’izo zishobora gutuma umuntu atangira kubona mugenzi we mu buryo butandukanye n’ubwa mbere.
Ni yo mpamvu umuntu akwiriye kureba ibirenze isura, akita ku mico, indangagaciro, ubupfura, ubushobozi bwo kumva abandi n’uburyo uwo akunda yitwara mu bihe bikomeye.
2. Gukunda umuntu kubera ubutunzi
Hari abantu bahitamo abo bakundana na bo bashingiye ku mafaranga, umutungo cyangwa imibereho myiza bashobora kubagezaho. Bamwe bumva ko kugira umukunzi ufite amafaranga ari inzira yo kugera ku buzima bifuza.
Nubwo ubushobozi bwo kwita ku muryango ari ingenzi, amafaranga yonyine ntashobora gusimbura urukundo, kubahana no kwizerana.
Ubutunzi bushobora kugabanuka, umuntu akabura akazi cyangwa ubucuruzi bwe bukahomba. Iyo umubano wari ushingiye ku mafaranga gusa, ibibazo by’ubukungu bishobora kuwuhungabanya.
Ni byiza guhitamo umuntu mwubakana ubuzima, mugafatanya gushaka ibisubizo by’ibibazo, aho gukunda gusa ibyo afite.
3. Gukundana kubera gutinya irungu
Hari abantu binjira mu rukundo kubera ko batinya kuba bonyine. Iyo babona inshuti zabo zifite abakunzi, ziri kurushinga cyangwa zifite imiryango, na bo bashobora kumva ko bagomba kugira uwo bakundana na we kugira ngo batumva ko basigaye inyuma.
Ibi bishobora gutuma umuntu yemera uwo abonye wese umugaragarije urukundo, atabanje kumenya niba bahuje imico, indangagaciro n’intego z’ubuzima. Gutinya irungu bishobora gutuma umuntu afata icyemezo ahubutse, akazisanga mu mubano utamuhesha amahoro cyangwa utamubereye.
Kuba umuntu adafite umukunzi ntibivuze ko hari icyo abuze. Kwiyubaha, kumenya agaciro kawe no kubanza kumenya icyo ushaka mu buzima bishobora kugufasha guhitamo neza uwo muzabana.
4. Gukunda umuntu kubera imiterere y’umubiri we
Imiterere y’umubiri ishobora gukurura umuntu, ariko gukururwa n’uko undi ateye ntibihita bisobanura ko habayeho urukundo rwimbitse.
Hari igihe umuntu abona umukobwa cyangwa umusore afite imiterere y’umubiri akunda, agahita yemeza ko yamukunze, ataramenya imyitwarire ye, uko afata abandi cyangwa niba bazashobora kubana neza.
Iyo abantu bashingiye ku gukururana ku mubiri gusa, bashobora gusanga badafite byinshi bahuriyeho igihe batangiye kumenyana byimbitse.
Urukundo rwubaka rusaba kumenyana, kuganira, kubahana no kureba niba abantu bombi bahuje indangagaciro n’intego z’igihe kizaza.
5. Gushaka uwo bashakana kubera igitutu cy’abantu
Mu miryango imwe n’imwe, gushaka no kubyara bifatwa nk’intambwe umuntu agomba kuba yaragezeho mu gihe runaka cy’ubuzima. Ibi bishobora gutuma abatarashaka bumva bahatirwa kwihutira gushaka kugira ngo bahunge amagambo y’abantu cyangwa bashimishe imiryango yabo.
Iyo igitutu kibaye kinini, umuntu ashobora kwinjira mu rukundo atabanje gusuzuma neza uwo agiye kubana na we. Ashobora kwemera gushyingiranwa n’umuntu atazi bihagije, kubera ko yumva ko igihe cye kiri gushira.
Gushaka si irushanwa, kandi buri muntu agira igihe cye. Icy’ingenzi si ukugera ku bukwe vuba, ahubwo ni uguhitamo uwo muzashobora kubakana ubuzima burambye.
6. Kwitiranya ibyishimo by’akanya gato n’urukundo
Hari igihe abantu bahura mu bihe byiza, bakishimana, bakaganira neza cyangwa bakumva bakururana cyane, maze umwe agatangira kwibwira ko yakunze undi
Ibyo byiyumvo bishobora kuba intangiriro y’urukundo, ariko ntibihagije kugira ngo hemezwe ko umubano uzaramba. Bisaba igihe kugira ngo umuntu amenye imico ya mugenzi we, uko yitwara mu bibazo n’uko yubahiriza ibyo yiyemeje.
Umuntu ashobora gukururwa n’ibyishimo byo kuba hamwe n’undi, ariko akaza kubona ko badahuje intego cyangwa ko batumvikana ku bintu by’ingenzi mu buzima.
Ni yo mpamvu ari byiza guha umubano umwanya wo gukura, aho gufata ibyemezo bikomeye ushingiye ku byiyumvo by’akanya gato.
7. Gukunda umuntu kubera izina cyangwa icyubahiro afite
Hari abantu bakururwa n’umwanya undi afite muri sosiyete, kuba ari icyamamare, kuba akomoka mu muryango ukomeye cyangwa kuba afite ububasha n’ubushobozi.
Muri ibi bihe, umuntu ashobora gukunda ishusho mugenzi we agaragariza abandi aho gukunda uwo ari we koko. Ashobora kwifuza gukundana n’icyamamare kugira ngo na we amenyekane, cyangwa guhitamo uwo bashakana kubera icyubahiro n’inyungu azakura mu muryango we.
Icyakora, izina, ububasha n’umutungo bishobora guhinduka. Iyo ibyo umuntu yari ashingiyeho bitakiriho, ni bwo bishobora kugaragara niba umubano wari ushingiye ku rukundo nyakuri cyangwa ku nyungu.
Icy’ingenzi ni ukumenya uwo muntu ari we mu buzima busanzwe, uko afata abandi, uko akemura amakimbirane n’indangagaciro ze, aho kwibanda gusa ku byo afite cyangwa ku mwanya afite muri sosiyete.
Ni gute wamenya ko ukunda umuntu by’ukuri?
Kugira ngo umuntu amenye niba akunda mugenzi we by’ukuri, akwiriye kwibaza impamvu amukunda n’icyo amubonamo kirenze ubwiza, amafaranga cyangwa icyubahiro.
Urugero, niba ukunda umuntu kubera inseko ye, wakomeza kumwitaho igihe ababaye cyangwa arakaye? Niba umukunda kubera ubwiza bwe, wakomeza kumukunda mu gihe isura ye ihindutse?
Ibi ntibivuze ko gukunda ubwiza, ubutunzi cyangwa indi mico myiza ari bibi. Ahubwo bivuze ko ibyo bitagomba kuba ari byo byonyine urukundo rushingiraho.
Urukundo nyakuri ntirugaragarira gusa mu magambo meza cyangwa mu byishimo byo mu ntangiriro z’umubano. Rugaragarira no mu kubahana, kwizerana, kuvugana ukuri, kumva ibitekerezo bya mugenzi wawe no gufatanya mu bihe byiza n’ibigoye.
Mu by’ukuri, gukunda umuntu si ugukunda gusa ibyo afite, uko asa cyangwa umwanya afite muri sosiyete, ahubwo ni ukumumenya no kumuha agaciro nk’umuntu.
Gufata umwanya wo kumenyana mbere yo gufata ibyemezo bikomeye bishobora gufasha abantu kwirinda kwibeshya ku marangamutima no kubaka umubano ufite icyerekezo cyiza.