Element, Tom Close na Chryso Ndasingwa mu basusurukije Abanyarwanda muri Mata 2025 – VIDEO

Nk’uko bisanzwe bigenda buri gihe ku mpera z’ukwezi, InyaRwanda ibagezaho indirimbo zakanyujijeho zigasusurutsa abanyarwanda muri rusange ndetse n’abakunzi b’umuziki wo mu Rwanda by'umwihariko.

Ikigamijwe ni ugutanga umusanzu mu iterambere ry’umuziki no gufasha abadukurikira kuruhuka no kunogerwa n’impera z’ukwezi. Kuri iyi nshuro abahanzi batandukanye bakoze mu nganzo batanga ibihangano bishya.

Muri uku kwezi dusoje kwa Mata, abahanzi nyarwanda baba abakora umuziki usanzwe barimo n’abakizamuka ndetse n’abakora uwo kuramya no guhimbaza Imana, bose bakoze mu nganzo.

Mu bahanzi bakoze mu nganzo indirimbo zabo zigakundwa cyane muri uku kwezi harimo Element Eleéeh, Tom Close wahuje imbaraga na Jay C na Khalfan Govinda, Bosco Nshuti witegura igitaramo gikomeye "Unconditional Love" kizaba kuwa 13/07/2025 muri Camp Kigali, Ish Kevin, Chryso Ndasingwa wakoze igitaramo gikomeye kuri Pasika akanashyira hanze EP, Patient Bizimana, Uwase Yvette, n'abandi benshi.

1.     TOMBÉ - Element Eleéeh

Ni indirimbo nshya y’umuhanzi ubikomatanya no gutunganya indirimbo Element Eleéeh. Muri iyi ndirimbo yifashishijemo mu mashusho yayo umubyinnyi w’Umunyarwanda mpuzamahanga Sherrie Silver. Aba aririmba agaragaza uko rimwe na rimwe urukundo rutuma umuntu yirya akimara kugira uwo yihebeye atababara.

2.     AGACA - Tom Close Ft Jay C & Khalfan Govinda

Tom Close yavuze ko akurikije uko yahuje na Khalfan na Jay C mu ndirimbo ‘Agaca’, asanga yari yaratinze gukorana na bo kuko ari abahanga ku rwego rwo hejuru. Yagize ati: “Ni ubwa mbere nari nkoranye n’aba baraperi, ngira ngo ariko abumvise indirimbo nabo babikubwira cyangwa dushobora kuba duhuje kwemeranya ko twari twaratinze gukorana. ni abahanga mu by’ukuri bafite impano zidasanzwe.”

Tom Close avuga ko uretse kuba yarakoranye n’abaraperi beza, ikindi yishimira ari ubutumwa bburi muri iyi ndirimbo. Ati: “Nibaza ko ku Isi nta muntu ubayeho adafite abamurwanya cyangwa ibimurwanya. Ni indirimbo iri mu Kinyarwanda cyumvikana ntekereza ko buri wese atoramo ubutumwa bwe. Icyakora icyo nabwira abantu baba bashaka kurwanya abandi bakwiye kwibuka ko ukubaho ku imishwi atari impuhwe z’agaca, byose bigenwa na Nyagasani.”

Jay C umwe mu baraperi bakoranye na Tom Close muri iyi ndirimbo, we ahamya ko yanyuzwe n’uburyo yanditse ndetse n’ubutumwa buyigize. Ati: “Ubundi uriya niwe Tom Close wa nyawe, muribuka indirimbo nka ‘Sinarinkuzi’, ‘Sibeza’ n’izindi, ikizamukubwira ni uko agira ubutumwa wumva bidasabye guca ku ruhande ariko kandi bugahura n’ubuzima bwacu bwa buri munsi.”

Tom Close amaze iminsi ari gukorana n’abaraperi cyane ko indirimbo yaherukaga gusohora ari iyitwa ‘Cinema’ yakoranye na Bull Dogg.

3.     Nobody – Ish Kevin

Ni indirimbo nshya y’umuraperi Ish Kevin. Uyu musore aba aririmba agaragaza ukuntu yatangiye umuziki yishakisha ubu akaba amaze ku rwego rwo kuba icyo akoze cyose yishyurwa. Hari aho agira ati “Kungeraho ubanza kurwana n’ingabo nk’ijana kandi nazo zikurusha imbaraga.”

4.     Wera Wera Wera – Chryso Ndasingwa ft Sharon Gatete

Mu kwezi gushize, Chryso Ndasingwa yagiye anyura imitima ya benshi binyuze mu bihangano bitandukanye ariko by'umwihariko indirimbo yakoranye na Sharon Gatete zirimo n'iyo bise 'Wera Wera Wera' ikubiyemo ubutumwa buramya Imana.

Mbere y'uko uyu muramyi akora igitaramo gikomeye cya Pasika yise ‘Easter Experience’, yashyize ahagaragara EP (Extended Play) ye nshya igizwe n’indirimbo esheshatu. EP ya Chryso Ndasingwa ifite indirimbo esheshatu zirimo ‘Mbega Ukuntu Uri Mwiza’, ‘Great Things’, ‘Ku Musozi Wera’, ‘Ibyo Wakoze’ na ‘Ulikuwepo’.

Ni EP yagiye hanze nyuma y’indirimbo yari amaze iminsi asohora nka ‘As I Know More’, ‘Iyo Mana’, ‘Nzakujya Imbere’ yakoranye na Rachel Uwineza n’izindi nyinshi. Kanda HANO wumve indirimbo zigize iyi EP 

5.     Kilode – Fela Music

Ni indirimbo nshya ya Fela Music. Aba bahanzi baba bishyize mu mwanya w’umuntu ubaza umukunzi we niba ko ibyo barimo aribyo. Feikel na Labii ni abavandimwe bahuriye mu itsinda rya Fela Music ritangiye kugenda rishinga umuziki gake gake, ndetse abantu bamwe batangiye kurimenya cyane mu ndirimbo zitandukanye rimaze gushyira hanze.

6.     Umucunguzi  - Ngabo

Ni indirimbo nshya y’umuhanzi Ngabo uririmba indirimbo zo kuramya no guhimbaza Imana. Muri iyi ndirimbo uyu muhanzi aba aririmba urukundo rw’Imana ruhebuje, akavuga ko yamubereye inshuti ya bugufi azajya abitsaho amabanga ye.

7.     Dejavu – Fifi Raya ft B-Threy

Ni indirimbo Fifi Raya yahuriyemo na B-Threy. Igaruka ku mukobwa ufite ibyifuzo by’amafaranga ku mukunzi we, undi akamubaza niba bikunda ko bahura cyangwa ayamuha kuri telefoni.

8.     Ushimwe – Elie Bahati

Ni indirimbo nshya ya Elie Bahati uri mu bahanzi bamaze kugenda bagwiza igikundiro mu muziki wo kuramya no guhimbaza Imana. Muri iyi ndirimbo uyu muhanzi aba aririmba avuga kuvuga ngo ‘urakoze’ ari ijambo ryonyine afite ryo gushima Imana, ariko akaba nta rindi yabona.

9.     Umusinzi - Yee Fanta Ft Diez Dola , The Joshkid & Ruganzu

Ni indirimbo nshya y’abahanzi Yee Fanta, Diez Dola , The Joshkid na Ruganzu. Muri iyi ndirimbo aba bahanzi baririmba bagaragaza ko umuntu mu gihe ari gusindira amafaranga ye, abantu baba badakwiriye kumwibazaho.

10. Agakiza – Patient Bizimana

Ni indirimbo nshya ya Patient Bizimana iri kuri album yitegura kumurikira i Kigali umwaka utaha. Iyi album nshya igiye kujya hanze nyuma y’iya mbere yise ‘Ikime cy’igitondo’ iriho indirimbo nka Menye neza, Nongeye naje, Iyo neza n’izindi. Album ya kabiri ya Patient Bizimana yo yitwaga ‘Impumuro yo guhembuka’ iriho indirimbo nka Ubwo buntu, Amagambo yanjye, Ndanyuzwe n’izindi nyinshi.

Iya gatatu uyu muhanzi yakoze yitwa ’Ibihe byiza’ yariho indirimbo nka Ibihe, Wagendanye natwe n’izindi. Izi zose ziyongera kuri ‘Ikimenyetso’ yaherukaga kumurikira abakunzi be, ikaba iriho indirimbo nka Ikimenyetso, ijambo rya nyuma, Ikamba n’izindi zakunzwe.